Responsável Uma Mahon Fundasaun Forum Komunikasaun Juventude (F-FCJ, sigla portugés) Oratóriu Don Bosco Balide-Miguel Magone, Domingas Perreira. Imajen Tatoli/Cipriano Colo.

DILI, 31 marsu 2021 (TATOLI)—Hafoin Konsellu Ministru aprova rezolusaun Governu númeru 12/2021, 08 marsu, ne’ebé impoin serka sanitária no konfinamentu obrigatóriu iha munisípiu Dili to’o ohin loron, fó impaktu ba labarik vítima sira-ne’ebé oras-ne’e hela iha Uma Mahon sira. 

Notísia Relevante: 2020, Uma Mahon F-FCJ Don Bosco rejista vítima violasaun 72

Responsável Uma Mahon Fundasaun Forum Komunikasaun Juventude (F-FCJ, sigla portugés) Oratóriu Don Bosco Balide-Miguel Magone, Domingas Perreira, hateten durante implementasaun serka sanitária ne’e, Uma Mahon Balide iha situasaun defisil nia laran tanba hetan difikuldade ba orsamentu atu bele sustenta vítima sira-ne’ebé hela iha uma mahon refere.

Tanba ne’e, nia husu ba Governu liuliu ba Ministériu Solidariedade Sosiál no Inkluzaun (MSSI) atu bele fó apoiu no tau matan ba vítima sira-ne’ebé oras ne’e daudaun hamahon aan iha uma mahon.

“Ami husu ba na’i-ulun (Governu) sira, karik bele, tau matan ba uma mahon sira. Tanba, vítima sira-ne’ebé ami halibur tau iha uma mahon ne’e, la’ós estranjeiru nia oan maibé Timor nia ema. Tanba ne’e, iha situasaun difsil hanesan ne’e, ha’u husu ba Governu atu tau matan mós ba labarik vítima sira-ne’e,” Domingas Perreira hateten ba Agência TATOLI, liuhosi telefónika, tersa ne’e.

Nia hatutan, difikuldade ne’ebé sira hasoru durante iha serka sanitaria ne’e mak finanseiru tanba durante ne’e sira-nia duadór úniku mak Governu liuhosi Ministériu Solidaridade Sosiál no Inkluzasaun (MSSI) ne’ebé kada tinan fó apoiu ba uma mahon sira maibé iha tinan ida-ne’e MSSI seidauk fó apóiu.

“Ami-nia duadór úniku mak Ministériu Solidaridade Sosiál no Inkluzasaun. Tinan-tinan ami asina kontratu hosi MSSI. Maibé tinan ne’e, hosi janeiru to’o agora, ami seidauk asina kontratu, tanba sira responde mai ami katak tanba pandemia COVID-19 ne’e, entaun seidauk promete mai ami dehan bainhira mak ami hetan tan apoiu hosi sira,” nia informa.

Maibé, nia hateten, durante serka sanitária nia laran ne’e sira hetan apoiu hosi The Ásia Fundation hanesan fó apoiu foos, labarik sira-nia susu-been no nesesidade bázika hanesan pastadente, eskova, sabaun no popok labarik nian.

Aleinde ne’e, Domingas Perreira informa, hosi fulan janeiru to’o fulan marsu tinan 2021 ne’e, Fundasaun Forum Komunikasaun Juventude (F-FCJ) Oratóriu Don Bosco Balide-Miguel Magone rejistu kazu violénsia doméstika no violénsia hasoru labarik minoridade hamutuk 51.

“Hosi janeiru to’o ohin ramata ba fulan marsu 2021 nian, ami rejistu kazu hamutuk na’in-51. Hosi númeru ne’e vítima ne’ebé tama uma mahon iha tipu neen (6) hanesan violénsia seksuál ka insestu na’in-16, violénsia doméstika na’in-10, abuzu seksuál na’in-tolu (3), kazu konflitu ho lei na’in-ida (1) no akompañamentu na’in-15,” nia informa.

Hosi númeru kazu 51 ne’e, nia hatutan, vítima balun fila-fali ona ba sira-nia família no daudaun ne’e sira-ne’ebé sei hela iha uma mahon ne’e hamutuk na’in-38. Vítima sira-ne’ebé hela iha uma mahon ne’e ho idade hosi 0-40, no sira nafatin halo akompañamentu no fó asisténsia ba vítima sira-nia kondisaun.

Nia hateten, durante ne’e parte uma mahon kontinua servisu nafatin hanesan baibain tanba hakarak ka lakohi vítima eziste kada loron hodi la haree ba situasaun saida de’it tanba vítima sira presiza sira-nia suporta.

Vítima sira-ne’ebé agora iha uma mahon ne’e, nia dehan, sira-nia kazu rejistu hotu ona iha Ministériu Públiku tanba sira la’os ba diretamente lori vítima mai iha uma mahon maibé liuhosi parseiru sira hanesan pesoál PNTL Vulneravel Person Unit (PNTL-VPU) no sira seluk tan.

Nia argumenta, vítima sira-ne’ebé tama iha uma mahon F-FCJ la’os hosi Munisípiu Dili de’it maibé hosi munisípiu 12 inklui Rejiaun Administrativa Espesiál Oé-Cusse Ambeno (RAEOA).

Iha serka sanitaria ne’e, tuir nia, atividade ne’ebé sira halo iha uma mahon mak foku hodi halo asiténsia ba vítima sira tanba vitíma sira-nia família labele mai halo vizita ba nia oan sira-ne’ebé hela iha uma mahon.

“Iha uma mahon, vítima sira hala’o atividade hanesan suku hena, halo jinastiku no halo dosi, nune’e vítima sira labele hanoin barak,” nia dehan.

Nia hateten, vítima sira-ne’ebé hela iha uma mahon ne’e mak bainhira hetan moras ruma, nia parte telefone ba ambulánsia hodi bele tula vítima sira ba konsulta iha sentru saúde sira ne’ebé besik, maibé ambulánsia mai tarde mak sira sei uza sira-nia mikrolete hodi tula vítima moras ne’e ba sentru saúde hodi kontrola.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here