Responsável Uma Mahon Fundasaun Forum Komunikasaun Juventude (F-FCJ, sigla portugés) Oratóriu Don Bosco Balide-Miguel Magone, Domingas Perreira. Imajen Tatoli/Cipriano Colo.

DILI, 04 fevereiru 2021 (TATOLI)—Responsável Ba Jestaun Kazu iha Uma Mahon Fundasaun Forum Komunikasuan Juventude (F-FCJ, sigla portugés) Oratóriu Don Bosco Balide-Miguel Magone, Domingas Pereira, hateten iha tinan 2020 uma mahon rejista labarik vítima violasaun hamutuk 72.

Notísia Relevante: Janeiru-Maiu 2020, F-FCJ Tau Matan ba Kazu Violasaun Labarik 23

Nia hateten, hosi vítima na’in-72 ne’e kompostu hosi mane na’in-12 no feto na’in-60 ne’ebé barak liu ne’e mesak labarik menór idade ho kazu violasaun ne’ebé diferensa.

“Ami simu vítima na’in-72 ho kazu ne’ebé mak la hanesan. Balun vítima ba violénsia seksuál, violénsia doméstika no insestu mak barak liu inklui violénsia ne’ebé hetan asaltu hosi ema ne’ebé la kuñese,” Domingas Pereira hateten ba Agência TATOLI iha nia knaar fatin, Balide, Dili. Kinta ne’e.

Nia informa, hosi vítima na’in 72 ne’e na’in-32 mak sei iha Uma Mahon maibé vítima barak mak uma mahon ne’e re-integra ona ba sira-nia komunidade liuliu sira-nia família no suspeitu ba violasaun sira-ne’e tama komarka.

Uma Mahon ne’e, nia hateten, iha nia kritériu rasik mak simu labarik sira hosi idade 0-18. Maibé, bainhira iha inan ida mak idade 40 ba leten mak isin rua, entaun uma mahon ne’e iha obrigasaun atu haree tanba ho intensaun hakarak ajuda labarik iha inan ne’e nia knotak.

“Maske kritériu mak simu hosi idade 0-18 maibé ami kontinua simu ema ka inan sira-ne’ebé mak idade liu 40 ba leten, bainhira sira hetan nia isin-rua. Ida-ne’e ami tenke ajuda para salva labarik iha inan ne’e nia knotak,” nia dehan.

Iha 2020 ne’e, nia haktuir, uma mahon refere atende vítima tuur-ahi hamutuk na’in-hitu (7) no iha tinan 2021 ne’e vítima ka inan tuur-ahi foin mak na’in-ida (1), no hosi parte uma mahon sempre akompaña vítima sira-ne’e hodi fó korajen, moral, no oferese atividade feto nian ba sira.

“Durante iha ne’e, ami akompañia sira ho morál, korajén, motiva, oferese atividade feto nian ba sira hanesan suku hena inklui ami bolu padre sira atu konvense sira. Ami kontrolu sira-nia saúde no karik sira hakarak eskola ami tenke akompaña hodi lori sir aba eskola,” nia hateten.

Ba tinan 2021 ne’e, nia informa, daudaun ne’e vítima violasaun seksuál sira ne’ebé hamahon aan iha uma mahon ne’e hamutuk ema na’in-35 ne’ebé kompostu hosi feto na’in-31 no mane hamutuk na’in-haat (4).

Notísia Relevante: Tinan 2019, F-FCJ Re-integra Labarik 35 Bá Eskola

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here