Pasajeiru sira tuun iha Aeroportu Comoro, tersa (30/03). Imajen TATOLI/António Gonçalves

DILI, 30 marsu 2021 (TATOLI)Aviaun Citilink ne’ebé aluga hosi Ajénsia Viajen, ho destinasaun Kuala Lumpur-Dili, aterra iha Aeroportu Internasionál Prezidente Nicolau Lobato, Comoro iha tuku 13:00 oras lokál.

Aviaun ne’e lori pasajeiru hamutuk 162, kompostu hosi bolseiru timor-oan hosi Israel na’in 72, estudante medisina hosi Cuba 15, Portugal rua, no pasajeiru seluk hosi Holanda, Portugal, Vietname no Korea inklui traballadór 61 hosi Inglaterra no mate-isin ida ne’ebé hakotu iis iha fulan-fevereiru.

Família hein mate- ida hosi Inglaterra, iha Aeroportu Comoro, tersa (30/03). Imajen TATOLI/António Gonçalves

Iha terrenu, Agência TATOLI nota katak, hafoin pasajeiru sira tuun hosi aviaun, ekipa saúde dizinfeta sasán no tuir protokolu saúde.

Notísia relevante: Aban, timor-oan 163 repatria ho aviaun Citilink

Ekipa saúde no Sala Situasaun Sentru Integradu Jestaun Krize (CIGC, sigla portugés) simu pasajeiru sira no prepara tula ba fatin kuarentena.

Pasajeiru sira tuun iha Aeroportu Comoro, tersa (30/03). Imajen TATOLI/António Gonçalves

Pasajeiru sira tama iha kuarentena ne’ebé prepara ona hanesan Otél Fortuna, Otél Colmera, Funan Buras, Hotel Timor, Hotel Luxury, Luz Clarita, salaun Institutu Nasionál ba Administrasaun Públika (INAP), Otél Audian, Otél Fantija, salaun Madre Salesiana Comoro, no salaun Santo Paulo II.

Voo ne’e koordena ona ho liña ministeriál hanesan MNEK, Ministériu Interiór (MI), Ministériu Saúde (MS), inklui Sala Situasaun CIGC.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here