Aviaun Citilink. Imajen/Citilink

DILI, 29 marsu 2021 (TATOLI)-Reprezentante Ajénsia Viajen Cammer pc, unip, Rui Pires, informa, aviaun Citilink, aban sei repatria timor-oan 163 hosi nasaun Inglaterra, Cuba, Portugál no Israel.

“Pasajeiru timor-oan hamutuk 163, kompostu hosi traballadór no estudante,” Reprezentante Ajénsia Viajen ne’e hateten, hafoin halo enkontru ho ekipa Ministériu Negósiu Estranjeiru no Kooperasaun (MNEK) iha edifísiu Praia dos Coqueiros, Dili, segunda ne’e.

Autoridade Nasionál Aviaun Sivíl Timor-Leste, (AACTL, sigla portugés) aprova ona pedidu voo charter ho aviaun Citilink hosi Ajénsia Viajen, ho destinasaun Kuala Lumpur-Dili, ne’ebé sei to’o iha Aeroportu Internasionál Prezidente Nicolau Lobato, Comoro, iha tuku 11:55, tersa (30/03) no tuir ajenda aviaun ne’e sei filafali iha tuku 12:55 loron hanesan.

Totál pasajeiru, kompostu hosi traballadór timor-oan hosi Inglaterra 61 inklui mate isin ida, estudante hosi Cuba na’in-13, Portugál na’in-rua no Israel 71 inklui funsionáriu Ministériu Obra Públika (MOP) no Sekretaria Estadu Formasaun Profisionál no Empregu (SEFOPE) hamutuk na’in-neen.

“Ita-nia estudante  hosi Israel to’o ona iha Kuala-Lumpur, estudante hosi Cuba  to’o ohin no hosi Inglaterra no Portugal sei to’o iha lorokraik ho aviaun Qatar, nune’e aban sira mai hamutuk ho aviaun Citilink,” nia akresenta

Nune’e, Reprezentante ne’e hato’o agradesementu ba MNEK no Ajénsia Viajen ne’ebé koopera ho Governu Malázia liuhosi Embaixada iha Timor-Leste hodi tulun prosesu viajen timor-oan sira.

Aleinde ne’e, Ajénsia Viajen liuhosi voo ne’e, sei transporta timor-oan hamatuk 169, ne’ebé bá Korea Súl hamutuk 51 no Inglaterra no Irlanda na’in-118.

Notísia relevante: Semana oin, Citilink transporta timor-oan 168 bá rai-li’ur

“Sira-nia prosesu atu viajen no repatria ami husu ba parte seguransa atubele limita sira-nia familia ne’ebé mak ba hein iha Aeroportu,” nia sujere.

Antes ne’e, Ministru Transporte no Komuniaksaun, José Agostinho da Silva, hateten pedidu voo ne’e tama iha ninia gabinete iha sesta (26/03) ho diskrisaun sei transporta no repatria timor-oan sira no viajen ne’e sei kumpre protokolu saúde ne’ebé estabelese ona.

Voo ne’e koordean ona ho liña ministeriál hanesan MNEK, Ministériu Interiór (MI), Ministériu Saúde, inklui Sala Situasaun Sentru Inetgradu Jestaun Krize (CIGC, sigla Portugés).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here