Ofisiál PNTL ida bandu apoiante sira Xanana Gusmão nian atu besik ba Edifísiu PGR, Colmera, Dili, segunda (29/03). Imajen Tatoli/Antonio Gonçalves

DILI, 29 marsu 2021 (TATOLI)-Komandante Em-Xefe FALINTIL, Kay Rala Xanana Gusmão, hakfodak bainhira nia to’o iha Edifísiu Prokuradór Jerál Repúblika  (PGR, sigla portugés) nian haree apoiante lubuk maka hatais kamiza ho foto Xanana nian hodi hakilar viva Xanana Gusmão.

Notísia Relevante : Xanana ba hatán notifikasaun MP hanesan testemuña

Xanana Gusmão, marka prezensa iha edifísiu PGR, Colmera, Dili, segunda (29/03). Imajen Tatoli/Antonio Gonçalves

Bainhira presta tiha deklarasaun hanesan testemuña ba Ministériu Públiku, segunda (29/03), purvolta tuku 08:50 Otl, Xanana sai mai husu kedas ba autoridade seguransa, Polísia Nasionál Timor-Leste (PNTL) Munisípiu Dili, atu haruka fila apoiante sira-ne’e no aviza ba sira ida-idak fila ba uma no kumpre aplikasaun serka sanitaria no konfinamentu domisiliáriu.

Xanana Gusmão, hatudu espresaun oin-hirus bainhira sai hosi arredores Edifísiu  PGR  haree ema lubun fó viva ba nia no halibur-malu hodi viola tiha regra Estadu Emerjénsia no regra serka sanitaria.

Mezmu haree Xanana hirus no Xanana buka fatuk atu tuda hasoru apoiante sira-ne’e, maibé sira kontinua fó apoiu ba Xanana hodi hakilar “Viva Xanana Gusmão”, “Viva Timor-Leste”, “Viva Timor nia manu-aman”.

“Polísia haruka sira fila, nusa maka mai barak fali ida-ne’e atu halo saida, fila… fila.., labele hamriik halibur-malu barak iha ne’e,”  Xanana hateten hodi husu Komandante PNTL Munisípiu Dili Superintendente Xefe, Henrique da Costa no Segundu Komandante PNTL, Superintendente Euclides Belo, ne’ebé akompaña Xanana la’o sai hosi Edifísiu PGR mai sa’e nia karreta.

Xanana mós ho nia karreta  privadu no eskolta hosi Korpu Seguransa Pesoál (CSP) fila kedas ba nia rezidénsia no kansela programa atu halo konferénsia imprensa ne’ebé preparadu ona iha área Jardin Bebora, Dili.

Informasaun ne’ebé Agência Tatoli rona hosi ema balun organiza konferénsia imprensa ne’e katak, Xanana kansela konferénsia imprensa ne’e tanba lakohi halibur-malu barak no evita atu ema interpreta oioin ka politiza situasaun sira-ne’e.

Komandante PNTL Dili, Superintendente, Henrique da Costa, fó orientasaun ba Batallaun Orden Públiku (BOP) no Polisia Tránzitu Dili haruka apoiante sira ne’ebé lidera hosi Veteranu Rezisténsia Amaro da Costa “Susar” fila ba ida-idak nia uma hodi kumpre regra serka sanitaria.

“Ita boot sira tenke fila hodi kumpre regra serka sanitaria,” Henrique fó  aviza ba apoiante sira Xanana nian ne’ebé halibur-malu iha Edifísiu PGR nia oin.

Iha fatin hanesan, Amaro da Costa “Susar” deklara sira-nia prezensa uza kamiza Xanana hodi hato’o solidariedade ba prosesu judisiál ne’ebé Komandante Em-Xefe FALINTIL, Xanana Gusmão enfrenta hela.

Susar dehan, sira-nia parte koopera ho PNTL hodi organiza masa sira fila hodi kumpre mós orden ne’ebé hato’o hosi prezidente partidu CNRT, Kay Rala Xanana Gusmão.

 Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here