DILI, 15 marsu 2021 (TATOLI)—Governu liuhosi reuniaun Konsellu Ministru (KM) iha segunda ne’e aprova Projetu Rezolusaun Governu, ne’ebé deside impoin serka sanitária no konfinamentu obrigatóriu iha munisípiu Baucau no Viqueque, hahú iha oras 00:00 loron 15 to’o oras 23:59 loron 29 marsu 2021.
“Iha períodu ne’e, ein jerál kuaze hanesan ho munisípiu Dili, maibé iha Baucau sei loke korridór de’it ba nesesidade urjente populasaun Lautém bele hakat liu Baucau, maibé ho rekezitu atu para iha Baucau no hetan autorizasaun hosi Sala Situasaun Sentru Integradu Jestaun Krize (CIGC, sigla portugés) setór leste atu halo atividade ruma ne’ebé maka iha autorizasaun permanense iha ne’ebá,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun KM iha salaun Ministériu Finansa (MF), Aitarak-laran, segunda ne’e.
Notísia relevante: Governu deside estende serka sanitária iha Dili to’o 02 abríl
Aleinde ne’e, bandu deslokasaun ema hosi munisípiu seluk ba Baucau no Viqueque ba munisípiu seluk ba munisípiu rua, exetu iha kazu ho fundamentu forte ho razaun seguransa públika, saúde públika, asisténsia umanitária, manutensaun sistema abastesimentu públiku ba interese públiku.
Enkuantu, regra aplikasaun serka sanitária no konfinamentu iha munisípiu rua ne’e hanesan ho munisipiu Dili, ho ajustamentu no adaptasaun ba realidade munisipiu rua ne’e.
Portavós Governu ne’e esplika, bainhira iha nesesidade urjente ruma iha munisípiu seluk, tenke hetan autorizadaun hosi CIGC via email, ne’ebé halo verifikasaun no asegura katak liu ona teste no la lori risku ba fatin seluk no Sala Situasaun sei funsiona iha Baucau no Viqueque.
Razaun deside impoin serka sanitária no konfinamentu obrigatóriu iha munisípiu rua ne’e tanba daudaun rejista ona kazu COVID-19.
Kazu konfirmadu COVID-19 iha Timor-Leste desde rejista dahuluk iha marsu 2020 to’o 15 marsu hamutuk 203, ne’ebé kompostu hosi Dili 164, Covalima 19, Bobonaro neen, Baucau neen, Oé-cusse haat, Liquiçá rua no Viqueque rua, rekuperadu 108 no baixa hela iha sala izolamentu (kazu ativu) hamutuk 99.
Jornalista: Antónia Gusmão
Editora: Julia Chatarina
