Ekipa saúde konsola hela JdSNB iha ninia rezidénsia (28/03/21). Imajen Tatoli.

DILI, 28 marsu 2021 (TATOLI)—Sala Situação Centro Integrado Gestão de Crise (SS-CIGC), anunsia rezultadu teste swab hosi sidadaun JdSNB ne’ebé detetadu pozitivu COVID-19, no  kolabora hodi kumpre izolamentu iha otél Novo Horizonte ho transporte rasik.

Koordenadór Pilár VII, Nilton do Carmo da Silva, hateten ekipa konjuta ba duni iha JdSNB  nia rezidénsia iha bairru ida iha Dili laran, hanesan parte ida protokolu jestaun kazu nian, no konsege konsola hodi kolabora no ikus-mai pasiente ne’e rasik husu atu ba izolamentu ho karreta-rasik.

Notísia relevante:COVID-19: pozitivu foun 11, rekoperadu 13 no ativu 322

“Iha protokolu jestaun kazu la bandu ema ne’ebé hakarak ba izolamentu ho ninia-karreta rasik. Tanba ne’e, la’ós foin akontese maibé iha kazu barak ona, bainhira pasiente ida deside ba ho karreta rasik, ami akompaña de’it to’o izolamentu”, Nilton do Carmo da Silva hateten iha JdSNB  ninia-rezidénsia.

Ekipa saúde halo teste swab ba pasiente ne’e iha 26 marsu hamutuk ho nia-oan na’in-ida inklui  ema na’in-rua seluk ne’ebé serbisu iha JdSNB  ninia gabinete.

Rezutadu hosi teste ne’e JdSNB pozitivu tanba iha istória hatudu katak, antes ne’e iha duni kontaktu direta ho pasiente COVID-19.

Doutór Nilton informa mós katak, ho númeru kazu ne’ebé aumenta maka Ministériu Saúde serbisu hamutuk ho na’in ba otél Novo Horizonte, hodi transforma otél ne’e ba sala izolamentu.

Ohin, liu hosi konferénsia imprensa, Koordenador Forsa-Tarefa ba Prevensaun no Mitigasaun, Rui Maria de Araújo, hateten SS-CIGC hala’o serbisu la haree ba ema ne’e sé, bainhira deteta  pozitivu tenke kumpri regra ne’ebé iha, katak tenke ba izolamentu.

SS-CIGC mós mantein hala’o serbisu profisionál hodi proteje nafatin pasiente-sira, atu labele publika ema-nia naran, maibé relata de’it kona-bá kazu pozitivu.

“Kona-bá kazu pozitivu la ko’alia kona-bá naran, maibé ko’alia kona-bá ema ne’ebé detetadu pozitivu,” nia esplika.

Entretantu, Sala Situação Centro Integrado Gestão de Crise (SS-CIGC), ohin rejista kazu pozitivu foun COVID-19 na’in 11 ne’ebé detetadu hosi munisípiu Dili,  no númeru pasiente atuál 322.

Jornalista: Antónia Gusmão

Editór: Cipriano Colo

PUBLISIDADEiklan

1 KOMENTÁRIU

  1. Husu ba parte SIGC tenke halo teste swab ba sra JSBN nia espoza tnba sra hla hmtk sebele SIGC halo teste swab ulan ba sr, nia JSBN nia espoza atu bele hamnus korenti transmisaun nian iha sosiesdades noms iha parte Governo nian. Obrgdo

HAKEREK NO HATÁN

Please enter your comment!
Please enter your name here