Uma-kain sira ne'ebé seidauk hetan eletrisidade iha Liquiça. Imajen Tatoli/Hortencio Sanchez

LIQUIÇA, 27 marsu 2021 (TATOLI)—Administrador Postu Administrativu Maubara Domingos Alves Coreia, informa maioria suku hitu (7) iha Postu Administrativu Maubara asesu ona eletrisidade maibé aldeia balun iha Suku Vatuvou no Guguleur mak seidauk asesu eletrisidade.

Notísia Relevante: Suku rua iha Liquiça seidauk asesu eletrisidade

Administradór Postu Administrativu Maubara, Domingos Alves Coreia. Imajen TATOLI/Hortencio Sanchez.

“Eletrisidade iha Maubara ne’e suku hitu (7) hanesan Lisadila, Vatuvou, Guguleur, Vaviquinia, Guiço, Maubaralisa no Vatuboro asesu ona eletrisidade. Falta de’it mak aldeia balum hanesan Aldeia Gariana iha Suku Vatubou no Aledia Rainaba-Eriko Lisara iha Suku Guguleur mak seidauk asesu eletrisidade,” Domingos Alves Coreia informa ba Agéncia Tatoli, iha Maubara, Liquiça, sábadu ne’e.

Domingos Alves Coreia hatutan, iha aldeia hirak ne’e seidauk bele asesu eletrisidade tanba iha 2018 to’o ohin loron, Governu ida-ne’e la’o ho orsamentu duodésimu ne’ebé afeta mós ba prosesu dezenvolvimentu iha área rurál sira.

“Lolos parte sira ne’e ahi tama ona. Ita haree iha 2018 mai to’o agora, ita hasoru hela krize no Governu la’o de’it ho orsamentu duodésimu, entaun impaktu ba prosesu dezenvolvimentu,” nia dehan.

Maibé, nia dehan, antes ne’e nia parte hatama ona proosta ba nasionál maibé laiha resposta to’o ohin loron. Daudaun ne’e, nia hakaas aan nafatin hodi kontinua hatama tan proposta ba nasionál ba 2022 para bele haree no tetu.

Entretantu, hahú hosi 2018-2021, dezenvolvimentu ne’ebé la’o iha Maubara ne’e hetan apoiu hosi Koria International Cooperation Agency (KOICA) ho organizasaun seluk hodi harii eskola no International Labour Organization (ILO) mak hadia estrada diresaun Loes ba Faulara kuaze kilometru 12-resin.

Jornalista: Hortencio Sanchez

Editór: Cancio Ximenes

HAKEREK NO HATÁN

Please enter your comment!
Please enter your name here