Koordenadór Forsa-Tarefa ba Prevensaun no Mitigasaun surtu COVID-19 iha Timor-Leste, hosi Sala Situasaun SIJK, Rui Maria de Araújo. Imajen Tatoli/Egas Cristóvão.

DILI, 26 marsu 2021 (TATOLI)—Sala izolamentu ne’ebé Governu instala iha Tasi-tolu, kompleta ho fatin própriu ka espasu ba pasiente COVID-19 atu bele halo ezersísiu fíziku, ho oráriu ne’ebé Sala Situação Centro Integrado Gestão de Crise (SS-CIGC) permite.

“Izolamentu ne’e iha espasu ba pasiente-sira atu bele halo ezersísiu no halo movimentasaun ba sira-nia an,’’ Koordenadór Forsa-Tarefa ba Prevensaun no Mitigasaun, Rui Maria de Araújo fó-sai asuntu ne’e, liu hosi konferénsia imprensa iha Centro Convenções Dili (CCD), sesta ne’e.  

Notísia relavente:COVID-19: pozitivu 58, rekoperadu 17 no ativu 298

Rui Maria de Araújo fó-sai asuntu ne’e hodi responde preokupasaun públiku ba vídeo ne’ebé espalla iha média sosiál, fó sai kona-bá pasiente-sira halo ezersísiu hanesan jogu futeból iha sala izolamentu ne’e.

Médiku ne’e klarifika liu-tan katak, iha sala  izolamentu ne’e la’ós espasu ba ezersísiu de’it, maibé iha mós atividade-sira seluk hanesan apoiu espirituál no psikolójiku ne’ebé oferese hosi grupu relijiozu no grupu profisionál-sira ne’ebé  ho voluntariamente oferese sira-nia an ba serbisu ida-ne’e.

Tanba ne’e, nia fó hanoin katak, hela iha sala izolamentu laran, moris no hala’o atividade hanesan baibain, la’ós hanesan baixa iha ospitál atu toba hela de’it maibé tenki halo mós ezersísiu.

“Ha’u hateten bebeik ona katak, ema sira ne’e laiha síntoma, tanba ne’e ita tenke izola sira atu moras ne’e labele da’et,” nia subliña.

Entretantu, kategoria pasiente tuir SS-CIGC ne’ebé izola iha Izolamentu Tasi-tolu mak hanesan, primeiru sira ne’ebé laiha síntoma, maibé detekta duni virus iha isin.

Segundu, ema ne’ebé iha síntoma hanesan inus-been no isin-manas maibé lizeiru, signifika sira la hetan tratamentu ho ai-moruk, importante mak sira tenke izola atu deskansa, nune’e moras ne’e labele da’et ba ema seluk.

To’o ohin, Sala Situação Centro Integrado Gestão de Crise (SS-CIGC), rejista tan kazu pozitivu foun COVID-19 na’in 58, ne’ebé detetadu hosi munisípiu Dili 54 ho Baucau haat, no númeru pasiente baixa sa’e ba 298.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here