Forsa Unidade Territoriál; UPF ho F-FDTL hala’o operasaun intensivu iha liña fronteira Munisípiu Covalima. Imajen TATOLI/Eugénio Pereira.

DILI, 26 marsu 2021 (TATOLI)—Maski Governu termina ona serka sanitária no konfinamentu domisiliáriu jerál obrigatóriu iha munisípiu Covalima, maibé Sala Situasaun Sentru Integradu Jestaun Krize (CIGC, sigla portugés) seidauk deside hodi retira Unidade Forsa Territoriál hosi munisípiu ne’e.

“Realmente serka sanitária rua (Covalima no Bobonaro) termina ona, maibé labele haluha katak munisípiu rua ne’e la dook hosi fronteira. Tanba realidade kazu ne’e daudaun tama iha Timór no da’et tun sa’e ona bá munisípiu seluk, la’ós monu hosi lalehan no la mai hosi tasi maibé mai hosi rai, tanba ne’e ita-nia atensaun bá fronteira, maski serka sanitária levanta ona maibé forsa sira nafatin mantein hodi asegura fronteira no evita entrada ilegál,” Diretór Sala Situasaun CIGC, Brigadeiru Jenerál João Miranda ‘Aluk Descartes’, relata hafoin hamutuk ho ekipa hasoru malu ho Primeiru-Ministru, Taur Matan Ruak, iha Palásiu Governu, sesta ne’e.

Notísia relevante: Forsa Unidade Territoriál 150 destaka iha Covalima

Forsa ne’e kompostu hosi FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) hamutuk batallaun ida hodi reforsa seguransa iha liña fronteira terrestre no tasi, ho misaun fó apoiu autoridade munisipál no halo sosializasaun nesesidade implementasaun asaun.

Relasiona ho hahán ne’ebé la saudável ba ekipa Unidade Forsa Territoriál iha munisípiu Covalima, komandante ho deviza fitun ida ne’e rekoñese katak situasaun ne’e forsa instituisaun rua ne’e hasoru.

“Lojistikamente ita hasoru problema, maibé ida-ne’e la sai hanesan obstákulu ba instutuisaun rua, tanba ne’e di’ak ba Estadu no povu maski ho kondisaun hanesan ne’e maibé ami aseita no implementa medida ne’ebé Governu foti atu asegura vida populasaun Timór”, Brigadeiru Jenerál ne’e dehan.

Antes ne’e, CIGC destaka membru Forsa Unidade Territoriál hamutuk na’in-150 iha área jurisdisaun Covalima hodi asegura desizaun serka sanitária iha munisípiu refere.

Forsa batallaun hala’o misaun asegura implementasaun Estadu Emerjénsia no serka sanitária iha liña fronteira munisípiu Bobonaro, Covalima no Rejiaun Administrativa Espesiál Oé-cusse Ambeno (RAEOA).           

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here