Arguidu na’in-hitu (7) ne’ebé tortura joven na’in-rua, kinta ne’e, submete ona ba primeiru interrogatóriu iha TDD. Imajen Tatoli/Nelson de Sousa

DILI, 25 marsu 2021 (TATOLI)-Polísia Nasionál Timor-Leste (PNTL), kinta ne’e, lori ona arguidu na’in-hitu (7) ne’ebé tortura joven na’in-rua ba hatán justisa iha Tribunál Distritál Dili (TDD) hodi submete ba primeira interrogatóriu.

Notísia Relevante : Tortura joven na’in-rua, PNTL detein suspeitu na’in-hitu

Arguidu sira ho inisiál DDJ, AS, JG, JODC, CM, ALBDC no MS kumpre ona detensaun iha sela polísia  durante oras 72 no daudaun ne’e arguidu sira iha hela sela detensaun TDD no sira-nia advogadu privadu na’in-rua; Octavio Cardoso ho Ismael Asunção Lopes,  halo hela aproximasaun hodi hein tama sala audiénsia.

Komandu Polísia Munisipiu Dili detein arguidu na’in-hitu (7) ne’ebé halo kapturasaun ilegál hodi detein juventude na’in-rua iha área Fomentu, Dili, no PNTL detein iha sira idak-idak ninia rezidénsia hodi ezekuta mandadu Tribunál Distritál  Dili (TDD) ho NUC 0157/21.DICMR.

Kronolojia kazu ne’e akontese iha loron 21 marsu 2021, tuku 14:20 Otl, mosu asidente Sekuestru no Raptu” ne’ebé komete hosi arguidu na’in-hitu halo detensaun ilegál hodi transfere no kaptura juventude na’in-rua ho inisiál AC no AB iha área Fomentu, Suku Comoro no Beto Tasi (Kampung Marinir), Suku Madohi, Postu Administrativu Dom Aleixo, Dili.

Hafoin kaptura joven rua ne’e, arguidu sira halo gravasaun vídeo hodi hatudu sira nia asaun torturasaun hodi fó sai iha rede sosiál Facebook.

Iha loron tuir mai, segunda (22/03/2021), Komandu PNTL Dili liuhosi Seksaun Investigasaun Kriminál no Servisu Informasaun Polísia (SIP) buka tuir arguidu sira halo investigasaun no rekolla mós informasaun hosi sasin balun no koordena ho Ministériu Públiku hodi husu mandadu detensaun buska no apreensaun.

PNTL halo mós apreensaun ba sasán evidénsia sira ne’ebé arguidu sira uza hodi tortura joven na’in-rua maka hanesan, karreta pick-up ida, telemovel rua, katana ida, atributu organizasaun Ikatan Keluarga Silat Pemuda Timor-Leste (IKS-PTL) Kera Sakti, hanesan kalsa, kamiza, sintu no broxura IKS-PTL Kera Sakti nian, inklui gás lakrimojéniu ida.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here