Komandu PNTL Munisípiu Dili halo konferénsia imprensa hodi aprezenta mós suspeitu na'in-hitu. Imajen Tatoli/Eugénio Pereira

DILI, 23 marsu 2021 (TATOLI)- Komandu Polísia Nasionál Timor-Leste (PNTL) Munisipiu Dili detein ona suspeitu na’in-hitu (7) ne’ebé halo kapturasaun ilegál hodi detein juventude na’in-rua iha área Fomentu, Dili.

Suspeitu na’in-hitu  ho inisiál DDJ, AS, JG, JODC, CM, ALBDC no MS ne’e PNTL detein iha sira idak-idak nia rezidénsia hodi ezekuta mandadu Tribunál Distritál Dili (TDD) ho NUC.0157/21.DICMR.

Notísia Relevante : PNTL detein joven na’in-rua, ida tattoo anti Polísia no F-FDTL

Suspeitu na’in-hitu detein iha Komandu PNTL Munisípiu Dili. Imajen Tatoli/Eugénio Pereira

Komandante PNTL Munisípiu Dili, Superintendente Xefe, Henrique da Costa, haktuir kronolojia kazu ne’e akontese iha loron 21 marsu 2021, tuku 14:20 Otl,  mosu asidente Sekuestru no Raptu” ne’ebé komete hosi suspeitu na’in-hitu halo detensaun ilegál hodi transfere no kaptura juventude na’in-rua ho inisiál  AC no AB iha área Fomentu, Suku Comoro no Beto Tasi (Kampung Marinir), Suku Madohi, Postu Administrativu Dom Aleixo, Dili.

“Suspeitu na’in hitu ne’e halo detensaun ilegál hodi transfere no kaptura AC no AD,” Komandante Henrique da Costa, informa liuhosi konferénsia imprensa iha Komandu PNTL Dili, tersa ne’e

Nia hatutan, bainhira detein joven na’in-rua ne’e, suspeitu sira halo gravasaun vídeo hodi hatudu sira nia asaun torturasaun no publika iha rede sosiál Facebook ho intensaun atu provoka reasaun hosi grupu arte marsiál 77 ne’ebé juventude na’in-rua ne’e pertense ba.

Iha loron 22 marsu, Komandu PNTL Dili liuhosi Seksaun Investigasaun Kriminál (SIK) no Servisu Informasaun Polísia (SIP) buka tuir suspeitu halo investigasaun no rekolla mós informasaun hosi sasin balun no koordena ho Ministériu Públiku hodi husu mandadu detensaun buska no apreensaun.

PNTL mós rejeita informasaun kona-ba suspeitu na’in-hitu maka obriga juventude ida hodi tattoo iha kakorok ho liafuan Anti PNTL, F-FDTL no Batallaun Orden Públiku (BOP) nu’udar informasaun laloos.

PNTL halo mós apreensaun ba sasán sira ne’ebé suspeitu sira uza hodi tortura joven na’in-rua hanesan, karreta pickup ida, telemovel rua, katana ida, atributu organizasaun arte marsiál IKS (Ikatan Keluarga Silat) Kera Sakti hanesan kalsa, kamiza, sintu no broxura Kera Sakti nian inklui gás lakrimojéniu ida ne’ebé pertense ba evidénsia sira kontra lei arma branka númeru 5/2017.

La tolera Kera Sakti ho 77 halo problema

Superintendente Xefe Henrique da Costa, afirma tan parte PNTL Dili koopera ho Batallaun Orden Públiku (BOP), Komandu Operasaun Espesiál (COE), Unidade Polísia Marítima (UPM), Unidade Polísia Fronteira (UPF) no Komandu F-FDTL liuhosi Unidade Polísia Militár (PM) sei halo seguransa másimu hodi evita konfrontu entre grupu juventude hosi organizasaun Kera Sakti no 77 iha kapitál Dili.

“Ita halo medida prevensaun no husu juventude sira ne’ebé envolve iha grupu 77 no Kera Sakti atu la bele kria problema, tanba polisia sei la tolera kualkér krime atu mosu,” nia afirma tan.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here