Komisaun A hala’o audiénsia públika ho Ministériu Administrasaun Estatál (MAE), diskute kona-ba proposta-lei divizaun administrativa territóriu. Imajen/Mídia PN.

DILI, 25 marsu 2021 (TATOLI)—Komisaun A ne’ebé trata asuntu Justisa no Konstitusionál, ohin, hala’o audiénsia públika ho Ministériu Administrasaun Estatál (MAE) hodi hahú diskute proposta-lei divizaun administrativa territóriu.

Notísia Relevante: Governu sei aprezenta proposta-lei finansa munisipál ba PN

Komisaun A hala’o audiénsia ho Ministru Administrasaun Estatál no Prezidente Autoridade Munisipál Dili kona-ba proposta-lei númeru 29/V/(3)-ne’ebé altera Lei númeru 11/2007, 7 outubru kona-ba Divizaun Administrativa Territóriu.

Governu liuhosi Ministériu Administrasaun Estatal aprezenta proposta-alterasaun ne’e bazea ba polítika administrasaun territoriál no desentralizasaun administrativa.

“Iha proposta-altesaun ne’e Governu propoin atu kria tán munisípiu espesiál ba Atauro no Postu Administrativu rua, ida iha Ermera (Hatulia B) no ida iha Lautém, Loré atu sai postu administrativu no mós kestaun Laivai nian. Suku Loré I no Loré II durante ne’e jurizdisaun Postu Administrativu Lospalos nian, maibé proposta Governu nian propoin atu sai postu administrative,” Ministru Administrasaun Estatál Miguel Pereira de Carvalho, informa ba jornalista sira, hafoin hala’o audiénsia ho Komisaun A, iha Parlamentu Nasionál, kuarta ne’e.

Nia fundamenta, razaun hamosu tán munisípiu espesiál no postu administrativu foun haree ba aprezentasaun sirkunskrisaun (circunscrição) hanesan Atauro no munisípiu sira nu’udar eskalaun dahuluk no postu administrativu sira hanesan eskalaun daruak.

Razaun hamosu tán postu administrativu foun ne’e, atu hakbesik liután atendimentu públiku di’ak liu ba komunidade sira-ne’ebé hela iha área izoladu, tanba durante ne’e komunidade sira-ne’ebé hela iha área izolatu la hetan atendimentu ne’ebé mak di’ak iha administrasaun públika.

Nia hatutan, justifikasaun seluk mak área sira-ne’ebé husik hela ne’e bele iha ekilíbriu, nune’e komunidade sira bele hetan atendimentu ne’ebé di’ak, no bele hetan mós rekursu umanu no rekursu finanseiru ne’ebé mak di’ak liután hosi administrasaun no autoridade munisipál sira.

Aleinde ne’e, Ministru Asministrasaun Estatál, Miguel Pereira de Carvalho, hateten suku no aldeia hanesan organizasaun komunitária liuhosi lei rekuñesidu hosi Estadu no depois fó dalan ba Governu hodi fó rekuñesimentu tanba pasadu iha de’it suku 442 no tinan tolu kotuk hamosu tán suku foun 10.

Entretantu, Prezidente Komisaun A, Deputadu Joaquim dos Santos, esplika Governu husu halo alterasaun ba lei divizaun administrativa territóriu hodi hatama tán matéria foun iha proposta-alterasaun ne’e.

“Governu propoin munisípiu espesiál mak Ataúro no postu administrativu foun rua (Hatulia B no Loré), ida Hatualia B nian ita sei haree, tau naran nafatin ka tau naran seluk. Laivai nian mós ami sei haree kritéria katak bele ka lae depende ba deputadu sira. Tanba Governu nia proposta, Laivai nian seidauk tama maibé ba ha’u polítika ne’ebé di’ak atu desentraliza ita-nia podér ne’e hakbesik liu ba povu, ita labele rejeita. Laivai nian sei haree iha faze jeneralidade iha diskusaun proposta-lei alterasaun ne’e,” nia dehan.

Notísia Relevante:Desentralizasaun Administrativa tama ona faze deskonsentrasaun territoriál

Jornalista: Evaristo Soares Martins

Editór: Cancio Ximenes

1 KOMENTÁRIU

  1. Ministru Administrasaun Estatal no Teitoriu precisa hare mos postu Administrasaun postu Bobonaro tanba area ne’ebe luan Liu no populasaun barak los, precisa mos fahe halo rua. Iha ne’eba iha suco 18, ho Suco ne’ebe barak susar tebes komunidade atu acesu ba administrasaun publikalu. Tanba ne’e Husu ba Ministru Administrasaun e Estatal precisa Toma atensaun tanba komunidade precisa administraun publiku ne’e besik i Fadil atu kontrola Nia populasaun i fasil mos precisa administraun publiku Ida ne’ebe efisiente no efikasia.
    Mak ne’e deit Ita bot sira Nia atensaun la haluha hoto’o obrigadu wa’in.

HAKEREK NO HATÁN

Please enter your comment!
Please enter your name here