Médiku halo teste swab ba komunidade Fatumeta, Dili, Segunda (15/03/21). Imajen Tatoli/António Gonçalves.

DILI, 25 marsu 2021 (TATOLI)—Sala Situação Centro Integrado Gestão de Crise (SS-CIGC), ohin, rejista hikas kazu pozitivu foun COVID-19 na’in 22 ne’ebé detetadu hosi munisípiu Dili 21 ho Covalima ida, no númeru pasiente baixa hamutuk 257.

“Kazu foun 22, rekoperadu na’in haat hosi Fatumea, ida hosi Bebonuk, tolu hosi BTN II Terra Santa, Madohi, haat hosi SEFOPE. Ita iha kazu ativu 257,” Koordenadór Forsa-Tarefa ba Prevensaun no Mitigasaun, Rui Maria de Araújo fó-sai kazu pozitivu hirak ne’e, liu hosi konferénsia imprensa iha Centro Convenções Dili (CCD), kinta ne’e.

Notísia relavente:COVID-19: pozitivu foun 21, ativu 247

Hosi kazu foun na’in 22 ohin, iha mane na’in 17, feto na’in-lima. Ema sintomátiku na’in-tolu, asintomátiku 19.

Evolusaun iha Dili

Ohin, iha Munisípiu Dili iha kazu foun 21, ho detalla hanesan tuir mai, kazu pozitivu hitu, hela iha aldeia no Suku sira ne’ebé afetadu iha Postu Administrativu Dom Aleixo. Pozitivu hirak ne’e halo teste PCR atu viajen ba estranjeiru.

Kazu pozitivu rua, hela iha Postu Administrativu Dom Aleixo ho Postu Administrativu Becora. Pozitivu hirak ne’e halo teste PCR atu viajen sai hosi Dili.

Kazu pozitivu sia, hela iha Postu Administrativu Dom Aleixo Postu Administrativu Cristo Rei. Pozitivu hirak ne’e kontaktu-besik ho kazu iha cluster sira ne’ebé eziste ona.

Kazu pozitivu rua, deteta iha vijilánsia sentinela, ida hosi aldeia Mura, Suku Santa Cruz, Postu Administrativu Na’in-Feto, ida hosi aldeia 30 Agosto, Suku Comoro, Postu Administrativu Dom Aleixo.

Kazu positivu ida, hela iha aldeia Taibessi Calma, Suku Lahane Oriental, Postu Administrativu Na’in-Feto. Kazu pozitivu ida ne’e, halo segundu teste, nu’udár kontaktu besik ho cluster ne’ebé eziste ona.

Ho nune’e, kazu detetadu ka pozitivu iha Munisípiu Dili hosi 7 to’o 25 marsu 2021, hamutuk hotu 238.

Ho baze ba informasaun ne’ebé ekipa konjunta saúde nian rekolla, foku ka cluster kazu pozitivu iha Dili, hetan revizaun hanesan tuir-mai, kazu detetadu 238 iha Dili ne’e, fahe ba cluster 48, namkari iha instituisaun haat, eventu ida no fatin kuarentena rua, suku 16, iha Postu Administrativu Dom Aleixo, Vera Cruz, Na’in-Feto no Cristo Rei. Hosi cluster 48 ne’e, iha cluster 16 mak semana ida-nia laran, laiha kazu foun.

Cluster ka foku propagasaun totál kumulativu kazu konfirmadu iha 7, 14, 19, 20, 21, 22, 23,  24, no 25 marsu, BTN II-Terra Santa, Suku Madohi sia, BTN III –Terra Santa, Suku Madohi 11, aldeia Gólgota, Madohi tolu, aldeia Loron matan, Suku Madohi haat, aldeia 7 Dezembru, Suku Madohi ida (foun).

Adeia Tasi Mean, Suku Comoro ida, aldeia 4 Setembru, Comoro tolu, aldeia Fomentu I, Suku Comoro tolu, aldeia Fomentu II, Suku Comoro rua, aldeia Fomentu III, Suku Comoro rua, aldeia Aimutin, Suku Comoro ida, aldeia São Miguel, Suku Comoro ida, aldeia 30 Agosto, Suku Comoro rua, aldeia Rosario, Suku Comoro ida (foun).

Aldeia 02, Suku Fatuhada haat, aldeia 03, Suku Fatuhada ualu, aldeia 05, Suku Fatuhada ualu.

Aldeia 20 Setembru Suku Bebonuk 57, aldeia Metin I, Suku Bebobuk ida, aldeia Metin II, Suku Bebonuk tolu, aldeia Lesibutak, Suku Manleuana ida (foun).

Aldeia Teki-Teki, Suku Bairru Pité ida, aldeia Frekat, Suku Bairru Pité haat, aldeia 5 outubru, Suku Bairru Pité ida, aldeia Avansa, Suku Bairru Pité sia, aldeia Aninfuik, Campo Alor ida.

Aldeia Mate Restu, Suku Vila Verde rua, aldeia Gideon, Suku Vila Verde ida, aldeia Hura, Suku Motael ida, aldeia Lirio, Suku Motael rua, aldeia Formosa, Suku Gricenfor ualu, aldeia Taibessi Calma, Suku Lahane Oriental ida (foun), aldeia Mura, Suku Santa-Cruz ida (foun).

Aldeia Maucoco Mate, Suku Becora ualu, aldeia Auhun, Suku Becora ida, aldeia Berbidu, Suku Becora haat, aldeia Kakeu-Laran, Suku Becora ida, aldeia Toko Baru II, Suku Kulu-Hun 16, aldeia Mota-Klaran, Bidau Santana haat, aldeia Sagrada Familia, Suku Bidau Santana ida, aldeia Bidau Manumata, Suku Bidaun Santana ida.

Hospital Nasional Guido Valadares lima, Kuarentena Carla Masion ida, Kuarentena Hotel Ramelau ida, Ministériu Finansa tolu, SEFOPE sia, Ministéri Transporte no Komunikasaun rua, EMONC (Emergency Obstetrics and Neonatal Care) training iha Hospital Nacional Guido Valadares 12.

Evolusaun iha Baucau

Ohin iha Munisípiu Baucau SS-CIGC  la rejita kazu foun. Maski nune’e, hamutuk hotu iha Baucau iha kazu 20 detetadu, iha cluster hitu, hanesan tuir mai, kazu konfirmadu iha 2, 13, 14, 17, 19, 21, 23, 24 no 25 marsu, aldeia Lutumutu, Suku Tirilolo haat, aldeia Caiubilale, Caibada ida, aldeia Afagua, Wailili tolu, adeia Casmuto, Suku Buruma ida, aldeia Lamegua, Suku Bahu ida, aldeia Buile, Suku Bahu rua, aldeia Builai, Suku Buibau ualu.

Evolusaun iha Viqueque

Iha Munisipiu Viqueque, ohin laiha kazu foun. Hamutuk hotu Munisípiu Viqueque deteta ona kazu konfirmadu na’in 10.

Ho nune’e kazu detetadu iha Munisipiu ne’e fahe ba cluster tolu hanesan tuir mai, cluster kazu konfirmadu iha 15, 18, 21, 22, 23, 24 no 25 marsu, aldeia Lari, Suku Afaloikai, Uatulari ida, aldeia Umaneiku, Suku Ossu de Cima, Ossu tolu, aldeia Mamulak, Kuku Karaubalu, Viqueque neen.

Evolusaun iha Covalima

Evolusaun COVID-19 iha Munisípiu Covalima ohin deteta kazu foun ida. Atividade iha Munisipiu ne’e funsiona hanesan baibain.

Família na’in sia hosi kazu konfiirmadu iha cluster Campo Alor, oras ne’e daudaun iha hela kuarentena iha Suai Vila.

Kazu konfirmadu na’in-rua ne’ebé detetadu pozitivu iha aldeia Baleo, Suku Belulik Leten, Postu Administrativu Fatumea, iha 11 marsu 2021, hahú ohin konsidera rekoperadu, tanba rezultadu PCR negativu dala rua ona.

Hamutuk hotu, hosi Munispiu Covalima, kazu tolu  iha Cluster Maudemu, Tilomar ne’ebé detetadu iha 26 fevereiru, rekoperadu hotu ona.

Kazu 15 iha Cluster Belulik Leten, Fatumea, ne’ebé hahú deteta iha 22 fevereiru 2021, na’in 13 rekoperadu ona. Na’in rua mak sei iha Izolamentu Tasi Tolu.

Maski nune’e, horisehik deteta fali kazu pozitivu ida, labarik tinan 13, hosi Aldeia Baleo, Suku Belulik Leten, bei-oan hosi kazu detetadu ne’ebé horisehik hatudu negativu dala rua ona.

Labarik ne’ebé detetatu pozitivu ne’e, ekipa konjunta saúde lori mai kuarentena iha Suai vila, hahú 20 marsu 2021. Oras ne’e daudaun, labarik ne’e asintomatiku, no hala’o hela izolamentu iha Suai Vila.  

Evolusaun COVID-19 iha Munisípiu sira seluk no Rejiaun Administrativa Espesiál Oe-cusse Ambeno (RAEOA) ida. Munispiu Lautém ho RAEOA sei nafatin ho kazu detetadu ida no Munisípiu sira seluk, seidauk iha kazu detetadu.

SS-CIGC rejista kazu ativu to’o ohin  hamutuk 297, na’in 283 mak laiha síntoma, na’in 12 mak iha síntomas lijeiru hanesan ho flu baibain, na’in-rua mak iha síntomas moderadu.

Hosi horiseik mai ohin hamutuk hotu Laboratóriu Nasionál Saúde (LNS) halo testes PCR ba ema na’in 538.

Hosi horisehik mai ohin, teste PCR ba ema atu hetan autorizasaun esesionál sai hosi serka sanitária Munisipiu Dili hamutuk 123.

Hosi 11 de Marsu to’o ohin (semana rua nia laran) iha pedidu autorizasaun esesionál atu sai hosi no  tama mai serka sanitaria iha Munisipiu Dili, hamutuk hotu 2.129.

Sekretariadu CIGC responde ona ba hamutuk hotu pedidu 1.748 (82%). Hosi totál ida ne’e, 491 (28%) maka hetan autorizasaun. Sira seluk la hetan autorizasaun tanba la prienxe kritériu ne’ebé define iha Rezolusaun Governu, ou rezultadu teste PCR pozitivu.

Apelu

SS-CIGC  husu populasaun iha Munsípiu Dili no mós munisípiu-sira seluk, bainhira sente isin manas, kakorok moras, inus-been, mear, favór hakat ba Sentru Saúde ne’ebé besik-liu atu bele hetan atendimentu.

Apela mós ba Timor-oan sira ne’ebé serbisu iha loja Bravo Internacional iha Aldeia Formosa, Suku Gresenfor, Postu Administrativu Na’in-Feto, ne’ebé hetan kazu pozitivu na’in ualu iha loron hirak liu-bá, atu aprezenta-an iha sentru saúde besik-liu ba imi nia hela fatin, hodi bele hetan atendimentu.

SS-CIGC  aproveita informa mós ba sarani Katóliku-sira, katak orsida kalan tuku ualu, Arsebispu Arkedioseze Dili sei prezide orasaun Ami Aman, hosi Semináriu Maior São Pedro no São Paulo Fatumeta, hodi akompanã sarani iha mundu tomak ne’ebé sei simultaneamente, katak iha oras ne’ebé hanesan, sei hasa’e orasaun ne’e, tuir apelu hosi Papa Francisco. Konvida sarani sira atu bele akompaña transmisaun direta hosi GMN TV.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here