Sekretária Estadu Igualdade no Inklusaun, Maria Jose da Fonseca Monteiro de Jesus. Imajen TATOLI/ Egas Cristovão.

DILI, 24 marsu 2021 (TATOLI)—Sekretária Estadu Igualdade no Inkluzaun (SEII), Maria José da Fonseca Monteiro de Jesus, ho nia ekipa, ohin, halo sorumutu virtuál ho Prezidente Rede Feto no Reprezentante Word Vision hodi ko’alia kona-ba oinsá mak bele asegura feto no labarik feto hosi violénsia oioin iha família no komunidade.

Notísia Relevante: Marsu-juñu, SEII rejistu kazu violénsia hasoru feto hamutuk 277

Maria José da Fonseca Monteiro de Jesus hateten, objetivu hosi sorumutu virtuál ne’e mak Rede Feto ho nia ekipa hakarak hato’o informasaun no halo konsultasaun oinsá SEII bele haforsa liután serbisu sira relasiona ho papél rede referrál nian hodi bele hapara violénsia kontra feto no labarik-feto iha Timor-Leste.

“Forum nasionál ida-ne’e oportunidade ne’ebé di’ak atu ita bele fahe esperiénsia, matenek, kuñesimentu no lisaun saida mak ita aprende hosi intervensaun oioin ne’ebé mak ita halo, no oinsá ita bele hamutuk hadi’ak liután serbisu sira atu asegura feto no labarik-feto, maluk sira portadora defisiénsia, maluk sira hosi komunidade LGBTI, ferik no katuas, atu ita hotu bele moris livre hosi violénsia oioin iha família no komunidade,” Maria José da Fonseca Monteiro de Jesus hateten liuhosi komunikadu imprensa ne’ebé Ajénsia TATOLI asesu, kuarta ne’e.

Iha kolaborasaun integrada ida-ne’e, nia hateten, laiha enkontru keta-ketak tanba iha sosiedade sivíl no ekipa interministeriál ne’ebé haree ba implementasaun, koordenasaun no monitorizasaun ba Planu Asaun Nasionál Violensia Bazea Ba Jéneru (PAN-VBJ) ne’ebé tuir rezolusaun obriga tenke iha enkontru periódiku kada tinan.

“Iha PAN-VBJ identifika mós instituisaun ne’ebé tama iha pilár ida-idak nian hanesan programa inisiativa spotlight, programa hamutuk ba igualdade, hirak-ne’e parseiru sira implementa esforsu serbisu ne’ebé ita halo. Durante ne’e haree ba instituisaun sira implementa atividade bazea ba asaun foku tuir pilár ida-idak nian,” nia dehan.

Entretantu, Prezidente Rede Feto, Yasinta Luzinha, hateten forum nasionál hapara violénsia hasoru feto no labarik-feto ne’e hanesan meiu prátika kolaborasaun hodi halibur no tau hamutuk rekursu sira-ne’ebé iha ona esperiénsia, kuñesimentu no mós forsa sira-ne’ebé durante ne’e iha liuliu iha luta kontra violénsia hasoru feto no labarik-feto.

Nia hatutan, forum ne’e mós loke espasu ba grupu hirak-ne’ebé mak durante ne’e ladún fó atensaun ho sira-nia ezisténsia hanesan maluk portadora defisiénsia, maluk LGBTI no maluk kbiit laek ne’ebé iha sosiedade.

“Liuhosi forum ida-ne’e sei kontribui no haforsa di’ak liután mekanizmu hirak ne’ebé maka estabelisidu ona hanesan serbisu rede referrál ne’ebé eziste iha nasionál no munisípiu sira liuliu atu haforsa implementasaun PAN-VBJ iha parte prevensaun apoiu ba vítima sira bele asesu ba justisa no mós monitorizasaun, avaliasaun inklui koordenasaun,” nia hateten.

Tuir nia, serbisu hirak-ne’ebé mak sei hala’o durante tinan ida, Rede Feto hamutuk ho World Vision sei kolabora no serbisu besik ho ministériu relevante sira hanesan MSSI no SEII atu bele fahe hanoin ba malu oinsá hametin di’ak liután kolaborasaun serbisu ida-ne’e, atu haforsa luta kontra violénsia kontra feto no labarik-feto.

Antes ne’e, nia dehan, iha ona sorumutu ho Ministériu Solidariedade Sosiál no Inkluzaun (MSSI), ohin loron halo sorumutu ho SEII nu’udar instituisaun ne’ebé lidera advokasia iha implementasaun PAN-VBJ no oinsá bele asegura igualdade jéneru no kolaborasaun ida-ne’ebé integradu.

“Husu mós atu bainhira iha enkontru sira ita sei la halo keta-ketak maibé oinsá bele integra hamutuk programa sira hodi ita bele iha estratéjia ne’ebé mak sai forsa liután iha ita-nia asaun implementasaun sira,” Prezidente konsellu Rede Feto ne’e hateten.

Iha biban hanesan, Jerente Advokásia World Vision, António Rosário, hateten world Vision nia desizaun serbisu hamutuk ho rede feto hodi bele atinje serbisu hirak ne’ebé liga ba violénsia hasoru feto no labarik-feto. Tanba, World vision iha mehi ne’ebé boot hodi kontinua serbisu parseiru no Governu liuhosi SEII, hodi hamenus violénsia oioin hasoru feto no labarik-feto.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here