Sekretária Estadu Igualdade no Inklusaun, Maria José da Fonseca Monteiro de Jesus. Imajen Tatoli/ António Goncalves.

DILI, 17 dezembru 2020 (TATOLI)—Sekretária Estadu Igualidade no Inkluzaun (SEII), Maria José da Fonseca Monteiru de Jesus, hateten durante iha situasaun pandémia COVID-19 hosi fulan marsu mai to’o juñu 2020, SEII rejistu kazu violénsia hasoru feto no labarik feto sa’e makaas to’o númeru 277.

Maria José da Fonseca Monteiru de Jesus hatutan, haree ba kazu violénsia hasoru feto númeru sa’e beibeik entaun SEII hala’o sorumutu ho komisaun interministeriál sira fahe informasaun ba malu koordena esforsu sira no progresu ne’ebé mak halo ona hahú hosi despaixu Primeiru-Ministru atu nomeia reprezentante oioin hosi instituisaun sira-ne’ebé hola parte hosi komisaun interministeriál.

 “Ha’u hein katak maske agora ita foin mak halo sorumutu ba daruak tinan ida-ne’e maibé tinan-oin koordena esforsu di’ak liután ho servisu hamutuk,  bele hare dalan di’ak liután atu hadi’a ita-nia servisu sira ba oin. Tanba antes ne’e maske ita halo servisu lubuk bo’ot ida ona, maibé ita nota katak iha tinan ida-ne’e ho pandémia COVID-19, ita hatene katak violénsia ne’e makaas loos iha ita-nia le’et. Hosi marsu to’o juñu ita rezistu kazu violénsia hasoru feto no labarik feto sira hamutul 277,” Maria José da Costa Fonseca Monteiru de Jesus hateten ba jornalista sira iha Tower Fatuhada, Dili, kinta ne’e.

Tanba ne’e, nia dehan, SEII hato’o agradese ba Nasaun Unida tanba ajuda tan programa rua iha área prevensaun violénsia hasoru feto no labarik feto, ne’ebé lidera hosi SEII no apoiu hosi Uniaun Europeia (UE).

“Ita Agradese ba programa foun rua ne’ebé mai tan atu reforsa ita-nia servisu iha área hanesan prevensaun ba violensia hasoru feto no labarik feto, ho violensia domestika. Programa rua ne’e importante tebes no tenke halo esforsu lubuk bo’ot ida, ita halo ona tinan barak nia laran, ita rekoñese katak esforsu no ivestimentu hotu ne’ebé ita halo seidauk natón. Entaun, apoiu ida-ne’e bele ajuda ita di’ak liután iha ita-nia efosu, kombate violensia bazea ba jeneru,” nia hateten.

Nia haktuir, tinan uluk SEII halo ona relatóriu ba Parlamentu Nasionál kona-ba implementasaun  Planu Asaun Nasionál Violénsia Bazea ba Jéneru (PAN-VBJ) no tinan ida-ne’e hotu, tenke servisu hamutuk haree fila-fali saida mak akontese iha tinan ida-ne’e. Planu asaun nasional ida-ne’e hafoin tau informasaun hamutuk hodi halo fali relatóriu kona-ba implementasaun tinan ida-ne’e ba Parlamento Nasional iha tinan oin.

“Hanesan ita hatene tinan-tinan SEII rekoll dadus sira hodi bele prepara relatóriu. Maibé servisu ne’e ita hotu nian, no servisu instituisaun ida-idak iha nia-fatin tenke haree ba implementasaun. Planu asaun nasionál ne’e rasik fó informasaun sira atu ita bele halo relatóriu ba parlamentu nasional. Tinan oin nian, planu asaun nasionál ramata hotu ona. Ita presiza de’it halo revizaun ida no hamosu fila-fali planu asaun nasionál foun, nune’e sei sai servisu foun ida ba ita,” nia esplika.

Iha sorumutu Komisaun Interministeriál ba PAN-VBJ ne’e, lansa mós livru instituisaun ba promosaun Igualidade no Inkluzaun tinan 2020 nian.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here