Komunidade suku Manleuana, postu adminisrativu Dom Aleixo, troka voucher ho produtu Cesta Bázika iha supermerkadu Leader, tersa (09/02). Imajen TATOLI/António Gonçalves

DILI, 24 marsu 2021 (TATOLI)-Ministériu Agrikultura no Peska (MAP) simu ona pedidu pagamentu kompañia fornesedór Cesta Bázika hamutuk 17 no submete ona ba Sekretáriu Tékniku Fundu COVID-19, Ministériu Finansa (MF) hodi verifika no prosesa pagamentu.

Hanesan ministériu implementadór programa, MAP halo kontratu ho kompañia hamutuk 38 no responsabiliza distribuisaun iha munisípiu Lautém, Baucau, Viqueque, no Bobonaro, ne’ebé maioria konklui ona atividade iha 05 marsu maibé iha munisípiu ne’ebé aplika serka sanitária mak sei suspende distribuisaun.

Tuir Ministru Agrikultura no Peska, Pedro dos Reis, ministériu prosesa pagamentu ba pedidu ne’ebé prenxe ona rekezitu.

“Kuaze kompañia hotu halo ona pedidu pagamentu, maibé ami foin prosesa pedidu 17 ne’ebé prenxe kritéria no submete ona ba Ministériu Finansa atu prosesa pagamentu tanba ita tama ona iha sistema,” Ministru Pedro, informa iha edífisiu Ministériu Finansa, Aitarak-laran-Dili, kuarta ne’e.

Notísia relevante: MF finaliza pagamentu Cesta Bázika ba kompañia 11

Enkuantu, alokasaun orsamentu ba MAP atu partisipa iha programa Cesta Bázika hamutuk millaun $5,7.

Nia dehan, empreza balun tenke selu taxa rendimentu (income tax) 0,5% iha banku tanba hanesan rekezitu ida atu empreza kompleta hafoin prosesa no haruka ba MF halo pagamentu.

“Pedidu pagamentu hosi kompañia 38 ne’ebé distribui maioria hotu ona, hela oituan no agora daudaun prepara hela prosesu pagamentu tanba tenke liuhosi prosedimentu,” nia akresenta.

Bazeia ba dekretu-lei númeru 48/2020, 07 outubru, kona-ba medida apoiu familia  atribuisaun Cesta Bázika, iha artigu 10 mensiona modalidade aprovizionamentu ba akizasaun produtu Cesta Bázika realiza bazeia ba ajudikasaun direita to’o limite verba ne’ebé aloka ba entidade ajudikasaun ne’ebé ministériu kontratu ona.

Ajudikasaun direita ba kompañia sira tanba natureza programa Cesta Bázika ne’ebé emerjénsia, tanba difísil atu hili aprovizionamentu normál tanba lori fulan-tolu to’o neen mak foin finaliza, enkuantu programa ne’e implement aba fulan-rua iha inisiál (to’o dezembru 2020), maibé ikus estende tanba 31 marsu 2021.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here