Komunidade sira iha Comoro, kapitál Dili, entuziasmu troka voucher Cesta Bázika iha loja Leader, kinta (10/12). Imajen TATOLI/António Gonçalves

DILI, 22 marsu 2021 (TATOLI)–Ministériu Finansa (MF) halo ona pagamentu programa Cesta Bázika ba kompañia lokál hamutuk 11 ho montante totál $3.316.500.

Pagamentu ne’e halo hafoin Sekretariadu Tékniku Fundu COVID-19 simu pedidu pagamentu Cesta Bázika hamutuk 42 hosi Ministériu Turizmu, Komérsiu no Indústria (MTKI).

“Iha semana ida-ne’e nia laran, Ministériu Finansa liuhosi Sekretariadu Tékniku Fundu COVID-19 mós sei halo tan pagamentu ba kompaña lokál hamutuk 26 ne’ebé kumpre ona sira-nia dever hodi ba selu impostu rendimentu (income tax) 0,5% hosi totál rendimentu,” relata nota ne’ebé mak Agência TATOLI asesu, segunda ne’e.

Ministériu implementadór kontrata empreza fornesedór no distributór hamutuk 173 atu envolve iha programa distribuisaun Cesta Bázika.

Notísia relevante: MF foin simu pedidu pagamentu 42 Cesta Bázika hosi MTKI

Aleinde ne’e, iha mós pedidu pagamentu hamutuk 10 ne’ebé MF sei hein MTKI atu kompleta dokumentu hodi aneksu iha sistema Government Resouce Planning (GRP) molok realiza pagamentu.

Nune’e, ohin loron Sekretariadu Tékniku mós simu ona pedidu pagamentu hamutuk lima hosi Sekretaria Estadu Kooperativa (SEKoop), ne’ebé daudaun sei verifika hela dokumentu molok realiza pagamentu.

MF liuhosi Sekretariadu Tékniku kontinua nafatin kolabora ho ministériu impelementadór sira seluk hanesan Ministériu Agrikultura no Peska (MAP), SEKoop, Sekretaria Estadu Ambiente (SEA) no Sentru Lojístiku Nasionál (CLN, sigla portugés) atu aselera prosesu pagamentu ba kompaña sira ne’ebé mak partisipa ona iha programa Cesta Bázika.

“Bainhira dokumentu pedidu pagamentu kompletu, loos no prienxe ona rekezitu pagamentu tuir lei haruka, ministériu implementadór sira sei submete ba Sekretariadu Tékniku Fundu COVID-19. Hafoin simu pedidu pagamentu hosi ministériu implementadór, Sekretariadu Tékniku sei prosesa dokumentu hotu no sei realiza pagamentu ba pedidu hirak ne’ebé mak prienxe ona rekezitu tuir regra ne’ebé vigora,” nota ne’e esplika.

Kompañia tenke selu impostu rendimentu

Molok realiza pagamentu, kompañia hotu tenke kumpre dever selu impostu rendimentu 0,5% hosi totál rendimentu, bazeia Lei Tributária haruka.

“Kompañia sira tenke aprezenta resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál,” subliña nota hosi MF.

Karik kompañia fornesedór iha pergunta ruma ka presiza informasaun liután kona-ba asuntu impostu, bele dirije diretamente ba Autoridade Tributária-MF ka bele vizita portál Autoridade Tributária iha https://attl.gov.tl/ relasiona ho pagamentu impostu, submisaun relatóriu mensál/annuál no pedidu emisaun ba Certidao de Dividas.

Autoridade Tributária disponível simu pagamentu impostu sira liu mákina Automated Teller Machine (ATM) P24, ne’ebé kontribuinte sira la presiza ba forma iha banku komersiál sira.

“Ba pedidu pagamentu Cesta Bázika ne’ebé mak la prienxe ka seidauk prienxe rekezitu tuir lei haruka, Sekretariadu Tékniku Fundu COVID-19 sei devolve ba ministériu implementadór hodi kompleta no submete filafali,” nota ne’e esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here