Prezidente Autoridade Munisípiu Baucau, Olivio “Bou Lesa” Freitas, halo juramentu iha serimónia tomada de pose ne’ebé akompaña hosi Pároku Manuel Ximenes, SDB. Imajen/Mídia MAE.

DILI, 24 marsu 2021 (TATOLI)—Prezidente Autoridade Munisípiu Baucau, Olívio Freitas ‘Bou Lesa’, informa ekipa konjunta saúde Munisípu Baucau kontinua halo vijilánsia ba área afetadu, hodi buka tuir ema sira-ne’ebé kontaktu besik ho pasiente na’in-19 ne’ebé identifikadu pozitivu COVID-19 iha Munisípiu Baucau.

Notísia Relevante: COVID-19: pozitivu 16, totál pasiente 227

“Pasiente pozitivu COVID-19 aumenta ba na’in-19 no barak liu iha Aldeia Builai, Suku Buibau nian, maibé ekipa konjunta pilar sira kontinua halo vijilánsia hodi buka tuir ema sira-ne’ebé halo kontaktu besik ho pasiente pozitivu COVID-19 hosi aldeia ba suku to’o postu administrativu hotu iha Baucau ne’e, liuliu área afetadu sira,” Olívio Freitas ‘Bou Lesa’, hateten ba Agência TATOLI liuhosi telefónika, kuarta ne’e.

Olívio Freitas ‘Bou Lesa’ hatutan, pasiente pozítivu COVID-19 na’in-19 iha Baucau ne’e barak liu hosi Suku Buibau ne’ebé hanesan suku sentru iha Postu Administrativu Baucau Vila nian, tanba ne’e presiza halo kontrolu másimu atu nune’e labele da’et ba abitante sira seluk iha suku sira-ne’ebé besik mak Suku Tirilolo, Samalari, Uailili, no Gariuai.

Nia informa, maske pasiente pozitivu COVID-19 hirak ne’e izola ona iha kuarentena maibé ekipa konjunta saúde Munisípiu Baucau kontinua halo vijilánsia hodi buka informasaun no buka tuir ema sé-sé mak halo kontaktu besik ho pasiente pozitivu sira ne’e.

“Ita sei halo teste swab hodi foti amostra ba abitante sira iha Baucau maibé ita sei buka informasaun, bainhira identifika ema ruma ne’ebé mak halo kontaktu besik mak foin halo teste swab ba ema sira-ne’e,” nia dehan.

Ho kazu pozitivu COVID-19 ne’e, nia husu ba abitante sira hotu-hotu tenke hakmatek iha ida-idak nia fatin, no bainhira presiza satu osa nesesidade urjente ruma mak bele sai maibé tenke uza máskara, fase liman ho sabaun bainhira sosa buat ruma no halo distansiamentu sosiál no fíziku maizumenus metro ida.

Sentru Integradu Jestaun Krize (CIJC-sigla portugés) fó sai informasaun katak Baucau iha kazu detetadu no rejistradu, iha cluster hitu, hanesan tuir cluster   ka foku preparasaun totál komulativu kazu konfirmadu iha 2, 13, 14, 17, 19, 21 no 23 marsu, aldeia Lutumutu Suku, Suku Tirilolo haat (4), Aldeia Caiubuilale, Caibada ida, Aldeia Afagua, Suku Uailili tolu (3), Aldeia Casmutu, Suku Buruma ida (1), Aldeia Lamegua, Suku Bahu ida (1), Aldeia Buile, Suku Bahu ida (1), Aldeia Builai, Suku Buibau hamutuk na’un-ualu (8).

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here