Médiku halo teste swab ba komunidade aldeia 03 suku Fatuhada Dili, kuarta (17/03/21). Imajen Tatoli/António Gonçalves.

DILI, 23 marsu 2021 (TATOLI)— Sala Situação Centro Integrado Gestão de Crise (SS-CIGC), fó-sai tan kazu pozitivu foun COVID-19 na’in 16 hosi Dili ho Viqueque, no pasiente ne’ebé baixa na’in 227.

“Kazu foun 16 no kazu ativu 227,” Koordenadór Forsa-Tarefa ba Prevensaun no Mitigasaun, Rui Maria de Araújo fó-sai kazu pozitivu hirak ne’e, liu hosi konferénsia imprensa iha Centro Convenções Dili (CCD), tersa ne’e.

Notísia relavente:COVID-19: kazu foun sia, rekoperadu haat no ativu 211

Hosi kazu na’in 16 ohin, iha mane na’in-neen, feto na’in 10. Ema sintomátiku na’in-haat, asintomátiku na’in 12.

Tuir dadus hosi SS-CIGC, Ohin iha Munisípiu Dili iha kazu foun 14, ho detalla hanesan tuir mai, kazu pozitivu tolu, hela iha aldeia Bidau Tokobaru 2, Suku Kulu-hun, Postu Administrativu Cristo Rei. Pozitivu hirak ne’e kontaktu-besik ho kazu iha cluster hanesan, ne’ebé anunsía horisehik.

Kazu pozitivu sia, hela iha aldeia 20 Setembru, Suku Bebonuk, Postu Administrativu Dom Aleixo. Pozitivu hirak ne’e kontaktu-besik ho kazu iha cluster hanesan.

Kazu pozitivu ida, hela iha aldeia Kakeu-laran, Suku Becora, Postu Administrativu Cristo Rei. Pozitivu ida-ne’e detetatu iha vijilánsia sentinela iha HNGV. Ekipa sira sei buka-tuir ninia ligasaun ho cluster sira seluk.

Kazu pozitivu ida, hela iha aldeia Mota-klaran, Suku Bidau, Postu Administrativu Cristo Rei. Pozitivu ida-ne’e detetatu iha MTKI. Ekipa-sira sei buka-tuir ninia ligasaun ho cluster sira seluk.

“Ho nune’e, kazu detetadu ka pozitivu iha Munisípiu Dili hosi 7 marsu 2021, to’o ohin, hamutuk hotu 197,” nia relata.

Ho baze ba informasaun ne’ebé ekipa konjunta saúde-nian rekolla, foku ka cluster kazu pozitivu iha Dili, hetan revizaun tuir cluster ka foku totál kumulativu iha 7, 14, 19, 20, 21, 22, no 23 marsu, BTN II-Terra Santa, Suku Madohi sia, BTN III –Terra Santa, Suku Madohi 10, aldeia Gólgota, suku Madohi tolu,  aldeia Loron matan, Suku Madohi haat.

Aldeia Tasi Mean, Suku Comoro ida, aldeia 4 Setembru, suku Comoro rua, aldeia Fomentu I, Suku Comoro tolu, aldeia Fomentu II, Suku Comoro ida, aldeia Fomentu III, Suku Comoro rua, aldeia Aimutin, Suku Comoro ida, aldeia São Miguel, Suku Comoro ida.

Aldeia 03, Suku Fatuhada hitu, aldeia 05, Suku Fatuhada neen, aldeia 20 Setembru, Suku Bebonuk 50, aldeia Metin 3, Suku Bebonuk ida, aldeia Teki-Teki, Suku Bairru Pité ida, aldeia Frekat, Suku Bairru Pite haat, aldeia 5 Outubru, Suku Bairru Pité ida, aldeia Avansa, Suku Bairru Pité sia, aldeia Aninfuik, Campo Alor ida, aldeia Mate Restu, Suku Vila Verde rua, aldeia Gideon, Suku Vila Verde ida, aldeia Hura, Suku Motael ida, aldeia Lirio, Suku Motael rua, aldeia Formosa, Suku Gricenfor ualu.

Aldeia Maucoco Mate, Suku Becora ualu, aldeia Auhun, Suku Becora ida, aldeia Berbidu, Suku Becora tolu, aldeia Kakeu-Laran, Becora ida (foun), aldeia Toko Baru 2, Suku Kulu-Hun lima, aldeia Mota-Klaaran, Bidau ida (foun), Hospital Nasional Guido Valadares lima, Kuarentena Carla Masion ida, Ministériu Finansas tolu, SEFOPE sia, Ministériu Transporte no Komunikasaun rua, EMONC (Emergency Obstetrics and Neonatal Care) training/Hospital Nacional Guido Valadares 12.

“Kazu detetadu 197 iha Dili ne’e, fahe ba cluster 35, namkari iha instituisaun haat, eventu ida, Suku 10, fatin kuarentena ida, iha Postu Administrativu Dom Aleixo, Vera Cruz, Na’in Feto no Cristo Rei,” Rui Maria de Araújo subliña.

Evolusaun surtu COVID-19 iha Munisípu Baucau, Rui Maria de Araújo dehan, ohin laiha kazu foun.

Hamutuk hotu iha Baucau iha kazu 19 detetadu no rejistradu, iha cluster hitu, hanesan tuir cluster ka foku propagasaun totál kumulativu kazu konfirmadu iha 2, 13, 14, 17, 19, 21 no 23 marsu, aldeia Lutumutu, Suku Tirilolo haat, aldeia Caiubilale, Caibada ida, aldeia Afagua, Wailili tolu, aldeia Casmuto, Suku Buruma ida, aldeia Lamegua, Suku Bahu ida, aldeia Buile, Suku Bahu ida, aldeia Builai, Suku Buibau ualu.

Alende ne’e, evolusaun surtu COVID-19 iha Munisípiu Viqueque tuir SS-CIGC katak, ohin iha kazu foun 2.

Hamutuk hotu Munisipiu Viqueque deteta ona kazu konfirmadu na’in 10. Kazu foun hirak ne’e, hela iha Aldeia Umaneiku, Suku Ossu de Cima, Postu Administrativu Ossu.

Kazu konfirmadu hirak ne’e kontaktu-besik ho kazu ne’ebé deteta iha fatin hanesan. Ho nune’e, kazu detetadu iha Munisípiu Viqueque fahe ba cluster tolu, propagasaun kumulativu kazu konfirmadu iha 15, 18, 21, 22 no 23 marsu, aldeia Lari, Suku Afaloikai, Uatulari ida, aldeia Umaneiku, Suku Ossu de Cima, Ossu tolu, aldeia Mamulak, Kuku Karaubalu, Viqueque neen.

Nune’e mós evolusaun COVID-19 iha Munisípiu Lautém, ohin laiha kazu foun.

Hosi horisehik mai ohin, SS-CIGC halo teste PCR ba ema hamutuk hotu na’in 689, no hosi horisehik mai ohin, teste PCR ba ema atu hetan autorizasaun esesionál hodi sai-hosi serka sanitária hosi Munisípiu Dili, hamutuk 171.

Parte SS-CIGC apela nafatin ba populasaun ne’ebé saí hosi Dili ba munisípiu sira seluk, entre 5 to’o 9 marsu madrugada, molok serka sanitária hahú tama iha vigór iha Dili, atu favór ida aprezenta-an ba autoridade saúde-sira ne’ebé besik-liu, iha imi nia hela fatin, hodi bele hetan atendimentu.

Ba komunidade iha munisipiu-sira hotu, SS-CIGC fó hanoin katak, bainhira hatene kona-bá ema ruma ne’ebé sai hosi Dili molok serka sanitária hahú iha Dili, halo favór informa hela autoridade-sira atu bele halo atendimentu ba sira.

Husu populasaun iha Munsípiu Dili no mós munisípiu-sira seluk, bainhira sente isin manas, kakorok moras, inus-been, mear, favór hakat ba Sentru Saúde ne’ebé besik-liu atu bele hetan atendimentu.

Apela ba populasaun Timor-Leste tomak, liu-liu iha Munisípiu Dili, Baucau, Viqueque ho Lautém, atu nafatin hakmatek iha uma-laran no kontinua uza máskara, fase liman beibeik ho sabaun, evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak, hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here