Polísia detein joven na’in-rua (suspeitu) ne’ebé na’in-ida tattoo iha kakorok anti Polísia, F-FDTL no BOP. Imajen/Foti hosi Facebook

DILI, 22 marsu 2021 (TATOLI) – Komandu Polísia Munisípiu Dili detein joven na’in-rua (suspeitu) ne’ebé  na’in-ida tattoo iha kakorok anti Polísia, FALINTIL-Forsa Defeza Timor-Leste (F-FDTL) no BOP (Batallaun Orden Públiku).

Polísia lori joven na’in-rua (suspeitu) ba halo tratamentu saúde iha HNGV. Imajen/Foti hosi Facebook

Komandante PNTL Munisípiu Dili, Superintendente Euclides Belo, informa kronolojia kazu suspeitu na’in-rua ho inisiál AC no AD ne’e PNTL detein, tanba envolve konfrontu iha área Suku Kampung Alor, Dili, domingu (21/03/).

Konflitu ne’e halo komunidade pániku no  rezulta abitante balun nia sasán uma laran hetan estragus.

“Ami detein ona juventude na’in-rua ne’ebé komete krime danu estragus sasán. Sira na’in-rua ho inisiál AC no AD ne’ebé ida tattoo iha kakorok anti PNTL, F-FDTL no BOP,” Superintendente Euclides Belo, informa ba jornalista iha Komandu PNTL, Caicoli, Dili.

PNTL kontinua halo hela investigasaun kle’an ba asaun krime ne’ebé joven rua envolve hodi bele prosesa tuir lei.

Iha halo konfrontu ne’e, juventude na’in-rua ne’e mós hetan ataka espontánea hosi grupu juventude balun hodi halo torturasaun; tuku no tebe, rezulta suspeitu rua monu latan ba rai.

“Joven na’in-rua ne’e halo tiha asaltu, sira na’in-rua sai fali mós vítima ba asaun ba grupu ne’ebé tuku no tebe sira na’in-rua,” Euclides hateten.

Ekipa Servisu Informasaun Polísia (SIP) no Servisu Investigasaun Kriminál Nasionál (SIKN) halo ona investigasaun hodi buka tuir juventude sira ne’ebé halo torturasaun ba joven na’in-rua ne’e ne’ebé vídeo viral ona iha rede sosiál Facebook no WhatsApp.

“Ita buka tuir ona joven sira ne’ebé halo vídeo hodi tortura sira na’in rua,” nia hateten.

PNTL konsidera aktu violénsia torturasaun ne’ebé grupu juventude balun iha Dili hasoru juventude na’in-rua hodi halo gravasaun nu’udar krime sei prosesa autór sira tuir lei.

PNTL rasik lori ona juventude na’in-rua ne’e ba halo tratamentu saúde iha Ospitál Nasionál Guido Valadares (HNGV) tanba sira-rua hetan tebe no tuku hodi rezulta sira-nia oin no isin lolon bubu no kanek.

Iha segunda ne’e mós akontese konfrontasaun entre grupu juventude sira iha área Becora, Dili no PNTL to’o kedas fatin akontesimentu hodi halo intervensaun no hakalma situasaun.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here