Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (16/09). Imajen Tatoli/Egas Cristovão

DILI, 16 setembru 2020 (TATOLI)-Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta dos Santos, aprezenta projetu dekretu-lei iha reuniaun Konsellu Ministru (KM) no hetan aprovasaun, ba estabelesimentu fundu rezerva ba seguransa sosiál (FRSS) no ba definisaun modelu jestaun rasik.

Ministru Prezidénsia Konsellu Ministru, Fidelis Manuel Leite Magalhães, hateten FRSS ne’e membru Governu responsável ba seguransa sosiál mak tutela no superviziona.

“Objetivu ba kriasaun fundu ne’e atu asegura no iha ligasaun direta ho estabilizasaun finanseira no sustentabilidade hosi rejime kontributivu seguransa sosiál no ninia finalidade ne’ebé temi ona,” relata Ministru Fidelis hafoin reuniaun ezekutivu, Palásiu Governu, kuarta ne’e.

Notísia Relevante: MSSI aprezenta modelu jestaun fundu seguransa sosiál ba KM

Aleinde ne’e, verba hosi fundu sei foti hosi seguransa sosiál no sei la konsidera nu’udar fundu públiku.

FRSS sei administra no jere tuir rejime kona-ba kapitalizasaun públika hosi estabilizasaun nian, hakruk ba kritériu seguransa nian, rentabilidade no likidéz, ho kuidadu no tuir prinsípiu sira ba boa-governasaun nian hodi benefisia kontribuinte rejime kontributivu seguransa sosiál.

Iha tinan 2020, Institutu Nasionál Seguransa Sosiál (INSS) rejistu funsionáriu públiku no traballadór setór privadu pur volta 100.000.

Dekretu-lei númeru 47 mensiona katak kontribui ba seguransa sosiál ne’e hamutuk pprsentu 10, ne’ebé kompostu hosi porsentu haat maihosi traballadór no porsentu neen maihosi empregadór.

Nune’e, bainhira kada fulan simu saláriu, seguransa sosiál sei ko’a osan porsentu haat hosi traballadór no porsentu neen kontribui hosi empregadór.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here