Mapa Lautém. Imajen/Espesiál

DILI, 23 marsu 2021 (TATOLI)--Autoridade Munisipál no Polísia munisípiu Lautém hamutuk ekipa task force prevensaun COVID-19, deside izola provizóriu suku Home atu fasilita ekipa saúde buka tuir kontaktu besik pasiente pozitivu COVID-19.

Administradór munsípiu Lautém, Domingos Sávio, informa hafoin deteta joven ida pozitivu, ne’ebé antes ne’e mai hosi Dili iha loron 18 marsu no iha autorizasaun hosi Sala Situasaun, Sentru Integradu Jestaun Krize (CIGC, sigla Portugés), mai partisipa seremónia iha mate uma, maibé pesoál saúde Lautém teste  swab deteta pozitivu COVID-19.

“Hafoin deteta kazu pozitivu, ami komunika kedan parte nasionál mai evakua joven ne’e ba Dili. Ha’u konvoka reniaun urjente ida ho task force ne’ebé estabelese iha munisípiu Lautém no Polísia sira deside izola provizóriamente suku Home atu fó biban ba pesoál saúde halo serbisu hodi buka tuir kontaktu besik hodi foti amostra,” Administradór Lautém ne’e informa ba Agência TATOLI, via telefónika, tersa ne’e.

Notísia relevante: COVID-19: kazu foun sia, rekoperadu haat no ativu 211

Nia dehan, bainhira finaliza ona rastreiu no teste swab, mak abitante suku Home bele halo movimentu, maski desizaun ne’e autoridade munisipál rasik mak foti, enkuantu Governu liuhosi Ministériu Saúde (MS) no CIGC seidauk deside.

Joven ho teste pozitivu ne’e hosi aldeia Reisoru, suku Home, Lospalos, hanesan estudante universitáriu iha Universidade Oriental Timor Lorosa’e (UNITAL), ne’ebé iha Dili hela iha aldeia Bedois, suku Camea.

“Husu ba abitante sira atu kontribui tanba ida-ne’e moras a’at, imi tuur hakmatek atu fó biban pesoál saúde no seguransa hodi teste swab ba kontaktu besik pasiente pozitivu ne’e,” nia akresenta.

Tuir Administadór, iha Lautém laiha kondisaun no fasilidade atu estabelese kuarentena izola abitante ne’ebé kontantu besik ho pasiente COVID-19.

“Ami uza meiu atu sira ne’ebé kontaktu besik iha auto-kuaretena ka uma de’it hodi halo teste swab no Polísia fó seguransa, tanba ne’e bainhira karik rezultadu pozitivu ami kontaktu autoridade sira iha nasionál mai evakua bá izolamentu iha Dili tanba ami laiha kondisaun atu tau sira iha kuarentena,” nia hatutan.

Nune’e, Domingos Sávio husu ba MS atubele apoia fasilidade no ekipamentu balun liuliu foku ona ba estabelesementu  kuarentena sira iha Lautém.

Alende ne’e, Polísia munisípiu Lautém no Pesoál Saúde sira halo vizilánsia iha fronteira besik mnisípiu Baucau no Viqueque atu evita abitante sira halo movimentu bá-mai.

“Ami mós deside ona sei la autoriza Lautém-oan ka ema ne’ebé de’it labele tama mai, não ser iha karta autorizasaun hosi CIGC no sertifikadu livre hosi COVID-19,” nia akresenta.

Daudaun ne’e, Autoridade Munisipál no Pesoál Saúde inklui Polísia kontinua esforsu halo diseminasaun ba abitante sira atu tuir protókulu COVID-19.

“Ami aviza ona ba abitante sira iha Lautém tomak atu halo vizilánsia maka’as hodi haree ema foun ruma, bele fó hatene pesoál saúde atu halo teste swab atu prevene propogasaun COVID-19,” nia tenik.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here