Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 22 marsu 2021 (TATOLI)—Sekretaria Estadu Kooperativa (SEKoop) foin simu dokumentu pedidu pagamentu hosi kompañia fornesedór Cesta Bázika hamutuk 14, ne’ebé sei submete ba Sekretariadu Tékniku Fundu COVID-19, Ministériu Finansa (MF).

Tuir Diretór Nasionál Planu no Programa hosi SEKoop, Tomas Gusmão, Sekretaria Estadu ne’e kontratu kompañia ne’ebé hanesan fornesidór Cesta Bázika hamutuk 26, maibé rua maka la liu prosesu no falta de’it 24 mak partisipa.

“Ami scan hotu ona dokumentu hosi kompañia 14 no atu haruka ba Ministériu Finansa, ne’ebé ami laiha problema. Agora ami hein fali dokumentu hosi kompañia 10 maka seidauk,” Diretór Nasionál ne’e informa ba Agência TATOLI, via telefónika, segunda ne’e.

Notísia relevante: MF finaliza pagamentu Cesta Bázika ba kompañia 11

Dirijente ne’e dehan, parte SEKoop komunika kompañia responsável sira desde semana kotuk, tanba tenke hakibur hamutuk iha instituisaun ne’ebé fó kontratu mak foin lori dala-ida ba MF.

“Ami labele lori fali ida-idak ba Ministériu Finansa ne’ebá, kuandu sira seidauk submete hotu ami sei hein nafatin,” nia akresenta.

Nia esplika, razaun kompañia balun seidauk submete dokumentu tanba seidauk selu taxa rendimentu (income tax) 0,5% iha banku.

“Selu taxa ne’e rekezitu ida, tanba ne’e kuandu dokumentu kompletu lai maka ami simu hodi prosesa no haruka ba Ministériu Finansa atu halo pagamentu ba kompañia sira,” nia hatutan.

Nu’udar ministériu implementadór programa Cesta Bázika, SEKoop responsabiliza distribuisaun iha munisípiu hitu hanesan Covalima, Aileu, Ainaro, Same, Manatuto, no Liquiçá, ne’ebé antes ne’e parte Sekretaria Estadu ne’e fó dateline atu konklui distribuisaun to’o 05 fevereiru, ne’ebé maioria konklui ona.

Bazeia ba dekretu-lei númeru 48/2020, 07 outubru, kona-ba medida apoiu família, atribuisaun Cesta Bázika, operadór ekonómika lokál iha ámbitu planu rekuperasaun ekonómika no kria rejime espesiál aprovizionamentu ba efeitu, iha artigu 10 mensiona kona-ba modalidade aprovizionamentu, temi katak aprovizionametu ba akizisaun produtu Cesta Bázika realiza bazeia ba modalidade ajudikasaun direta to’o limite verba ne’ebé aloka ba entidade ajudikante ne’ebé ministériu indika ona.

Ajudikasan direta ba kompañia sira tanba natureza programa Cesta Bázika ne’e emerjénsia, tanba difísil atu hili aprovizionamentu normál tanba lori fulan-tolu to’o neen mak foin finaliza, enkuantu programa ne’e implementa ba fulan-rua iha inisiál (to’o dezembru 2020), maibé to’o ikus estende tan ba 31 marsu 2021.

Enkuantu, daudaun iha períodu serka sanitária no konfinamentu domisiliáriu jerál, Ministériu Koordenadór Asuntu Ekonómiku (MKAE) deside suspende provizóriu distribuisaun iha munisípiu Dili, Baucau no Viqueque.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here