Ilustrasaun COVID-19. Imajen/Espesiál

DILI, 21 marsu 2021 (TATOLI)—Sala Situasaun Sentru Integradu Jestaun Krize (CICG, sigla portugés) relata ohin loron deteta kazu ativu COVID-19 hamutuk 55, kompostu hosi Dili 43, Baucau 11 no Viqueque ida.

Nune’e, kazu ativu COVID-19 ne’ebé baixa iha sala izolamentu hamutuk 206, rekuperadu tolu no hosi kazu ativu foun 55, mane na’in-23 no feto na’in-32, ho idade tinan 0-14 hamutuk na’in-13, idade entre tinan 16-67 hamutuk na’in-42, ema ho sintomátiku sia no ema ho asintomátiku 46.

Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, hosi Sala Situasaun CIGC, Rui Maria de Araújo, hateten ohin loron kompleta tinan ida deteta kazu dahuluk iha Timor-Leste iha 21 marsu 2020, ne’ebé  hosi loron ne’e to’o 22 fevereiru 2021, kazu COVID-19 iha Timor-Leste konsidera hanesan importadu no esporádik.

“Hahú 22 fevereiru 2021, hafoin deteta kazu iha aldeia Klauhalek, suku Belulik Leten, postu administrativu Fatumea, munisípiu Covalima, Timor-Leste hahú tama faze transmisaun cluster ka transmisaun lokál, tuir definisaun Organizasaun Mundiál Saúde (OMS), ne’ebé iha fulan ida ikus nia laran, fenómenu transmisaun espalla mós iha kapital Dili, munisípiu Baucau no Viqueque,” Koordenadór Forsa-Tarefa informa liuhosi vídio konferénsia, iha Sentru Konvensaun Dili (CCD, sigla portugés), domingu ne’e.

Kazu ativu 43 hosi Dili, kompostu hosi ema ida hosi aldeia Berbidu, suku Becora, postu administrativu Cristo Rei, ne’ebé pozitivu ne’e kontaktu besik ho kazu konfirmadu iha cluster Hospital Nacional Guido Valadares (HNGV), kazu pozitivu hitu hela iha aldeia Bidau Tokobaru 2, suku Kuluhun, postu administrativu Cristo Rei, ne’ebé pozitivu hirak ne’e kontaktu besik ho kazu iha cluster hanesan, ne’ebé anunsia horiseik.

Notísia relevante: COVID-19, na’in-tolu rekuperadu no kazu foun 19

Enkuantu, kazu pozitivu 26 hela iha aldeia 20 de Setembro, suku Bebonuk, postu administrativu Dom Aleixo, ne’ebé pozitivu hirak ne’e kontaktu besik ho kazu iha cluster hanesan, no kazu pozitivu hitu hela iha aldeia Grilos, suku Gricenfor, postu administrativu Nain-Feto, ne’ebé pozitivu hirak ne’e kontaktu besik ho kazu hosi cluster hanesan.

“Ho nune’e, kazu detetadu ka pozitivu iha munisípiu Dili hosi loron 07 marsu 2021 to’o ohin loron hamutuk 179,” tenik Portavós CIGC.

Cluster iha Dili

Kazu detetadu 179 iha Dili fahe ba cluster 34, ne’ebé namkari iha instituisaun haat, eventu ida, suku 10, no fatin kuarentena ida, ne’ebé cluster hirak ne’e espalla iha postu administrativu Dom Aleixo, Vera Cruz, Nain-Feto no Cristo Rei.

Hosi cluster 34 ne’ebé iha, cluster 14 maka kazu la aumenta iha semana ida nia laran.

Tabela cluster iha Dili. Imajen/CIGC

Evolusaun COVID-19 iha Baucau no Viqueque

Iha munisípiu Baucau ohin deteta kazu foun 11, nune’e totál kazu ativu iha munisípiu ne’e hamutuk 19.

“Kazu foun hirak ne’e, hela iha aldeia Builai, suku Buibau, postu administrativu Baucau Villa, munsípiu Baucau no kazu konfirmadu hirak ne’e kontaktu besik ho kazu hosi aldeia Lamegua ne’ebé anunsia iha loron 19 marsu 2021,” Rui Araújo tenik.

Iha munisípiu Viqueque, ohin deteta kazu foun ida, nune’e totál kazu ativu COVID-19 hamutuk haat.

“Kazu foun ida-ne’e, hela iha aldeia Mamaluk (Beloi), suku Karaubalu, Viqueque no kazu konfirmadu ne’e iha kontaktu besik ho profisionál saúde ne’ebé halo kursu pós-laborál iha Universidade Nasional Timor Lorosa’e (UNTL) no fila hosi Dili bá Viqueque iha loron 08 marsu,” Koordenadór Forsa-Tarefa esplika.

Nune’e, tuir planu kontinjénsia Governu nian, Timor-Leste iha faze alerta 3 ka iha faze ‘Mitigasaun’.

Kazu ativu ida kategoria moderadu

Hosi kazu ativu ne’ebé iha izolamentu, iha pasiente ida tama kategoria moderadu, ne’ebé sofre insufisiénsia renal krónika no halo hemodiálize durante tinan rua ona.

“Kazu ne’e detetadu pozitivu loron rua liubá no ninia oráriu hemodiálize iha kinta no segunda, ne’ebé iha kinta, 18 marsu la konsege halo hemodiálize tanba unidade hemodiálize HNGV taka hodi halo dezinfesaun,” haktuir Koordenadór Forsa-Tarefa.

Maibé horikalan iha sala izolamentu Tasitolu, pasiente ne’e iha problema oksijenasaun ne’ebé ekipa médika izolamentu deside transfere ba Vera Cruz nu’udar fatin ne’ebé preparadu atu halo izolamentu ba kazu moderadu sira.

“To’o lorokraik ne’e ninia kondisaun estável no kontinua halo tratamentu ba hipertensaun no aban ninia oráriu atu halo hemodiálize iha HNGV, ne’ebé prepara ona fatin espesiál ba halo hemodiálize ba ema sira ne’ebé mós pozitivu COVID-19,” nia esklarese.

Populasaun desloka hosi Dili-munisípiu seluk aprezenta-an ba autoridade saúde

Sala Situasaun CIGC apela ba populasaun ne’ebé desloka hosi Dili bá munisípiu seluk durante períodu serka sanitária no konfinamentu obrigatóriu jerál, atubele aprezenta-an ba autoridade saúde ne’ebé besik-liu iha hela fatin hodi bele hetan atendimentu.

“Apela mós ba komunidade iha munisípiu sira hotu, bainhira hatene ema ruma ne’ebé sai hosi Dili molok serka sanitária hahú iha Dili, halo favór informa hela autoridade sira atubele halo atendimentu ba sira,” Rui Araújo subliña.

Sala Situasaun mós husu ba populasaun Timor-Leste tomak, liu-liu iha munisípiu Dili, Baucau ho Viqueque atu nafatin hakmatek no lalika fiar rumores, prátika nafatin medida hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun, kumprimenta malu la presiza ka’er liman, bensa-liman, rei-malu ka haku’ak malu, evita halibur malu barak, hamriik ka tuur dook hosi ema seluk mínimu metru ida ho balun.

Ho kazu ativu foun hamutuk 55 ne’ebé deteta ohin loron, totál kazu rejistadu iha Timor-Leste hahú marsu 2020 to’o agora hamutuk 326, rekuperadu 124, baixa iha sala izolamentu 206, no seidauk iha mak mate.

Totál komulativu teste hamutuk 35.407, rezultadu negativu 35.055 no hein hela rezultadu 22.

Hosi kazu rejistadu 326, iha Dili 271, Baucau 19, Covalima 19, Bobonaro neen, Oé-cusse lima, Viqueque haat no Liquiçá rua.

Daudaun ne’e, totál ema iha kuarentena hamutuk 519, kompostu hosi Dili 452, Bobonaro 26, Manufahi 20, Oé-cusse 17, no Covalima haat.

Númeru ema iha auto-kuarentena iha munisípiu hotu hamutuk 61 no pasa ona kuarentena loron-14 hamutuk 8.585.

Jornalista: Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here