Prezidente Asosiasaun Jornalista Timor Lorosa’e (AJTL), Zevonia Vieira. Imajen Rita Almeida.

DILI, 20 marsu 2021 (TATOLI)—Prezidente Asosiasaun Jornalista Timor Lorosa’e (AJTL), Zevonia Vieira, hateten Timor-Leste tenke kontra rasizmu no promove diversidade iha sosiedade liuhosi publikasaun notísia iha mídia.

Notísia Relevante: Rasizmu la valoriza ema-nia dignidade

“Ita moris hanesan diversidade tanba ne’e presiza respeita malu. Nune’e mós, mídia sira tenke promove diversidade tanba dala barak ha’u haree no observa, ita iha Timor-Leste barak mak nafatin iha rasizmu. Maibé, ba ha’u ‘la’e’ ba rasizmu hodi promove diversidade. Ita tenke kontra rasizmu no promove diversidade iha sosiedade liuhosi  publikasaun notísia iha mídia,” Zevonia Vieira hateten ba Agência TATOLI iha ámbitu komemorasaun Loron Mundiál Ba Halakon Diskriminasaun Rasiál ne’ebé mundu selebra kada 21 marsu, iha nia knaar fatin, Palapasu, Dili, sesta ne’e.

Zevonia Vieira hatutan, iha era dijitalizasaun ne’e buat rasizmu akontese iha fatin-fatin inklui iha mídia sosiál hanesan ema pesoál, ema deskonesidu ne’ebé sempre hatún ema-nia diginidade no identidade liga ho relijiaun, polítika, kultura, etnia, rasa no seluk tan.

“Ida-ne’e, ha’u sente triste tanba ita haree no lee argumentu katak la edukativu liu. Tanba bainhira públika ona iha mídia sosiál konserteja ema apoiu tan, entaun saida mak sei akontese ba ema-ne’ebé moris ho diversidade mak diskriminasaun,” Zevonia hateten.

Nia esplika, misaun no vizaun AJTL nian mak luta ba liberdade imprensa no espresaun. Iha parte liberdade espresaun ne’e, nia dehan, ema hotu-hotu iha direitu hato’o nia espresaun ba buat ruma ne’ebé ladi’ak hasoru sosiedade.

Iha Konstituisaun RDTL, nia dehan, artigu 16 iha pontu 2 hateten ‘Labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mentál’ ne’e, sai baze ida ba AJTL hodi fó hanoin ba jornalista sira atu halo kobertura labele sees hosi rasizmu.

“Ida-ne’e mak esforsu ida-ne’ebé ami sempre halo liuhosi formasaun ba ita-nia jornalista sira bele promove diversidade, nune’e labele mosu diskriminasaun. Maibé presiza tempu, neineik ba beibeik, sei muda ema-nia mentalidade,” nia hateten.

Atu halakon diskriminasaun ka rasizmu, Zevonia hateten, jornalista sira tenke halo reportajen sensível ba jéneru iha jornalizmu boa paz, tanba iha jornalizmu boa paz hanorin ema atu oinsá respeita ema feto, grupu marjinalidade no oinsá fó opurtunidade hanesan hodi ema hotu espresa nia hanoin.

“Ita iha papél importante atu kontra ida-ne’e liuhusi era dijitál, halo advokásia no kampaña katak rasizmu ne’e ladi’ak. Ita hasai liafuan ne’ebé mak hatún ema-nia dignidade, ema-nia privasidade, ema-nia pesoál, relijiaun no kultura,” nia dehan.

Iha parte seluk, nia hateten, liuhosi advokásia atu kontra rasizmu no influénsia muda ema-nia hahalok atu respeita ema ida ka grupu ida, ka relijiaun ninia identidade, mak pontu importante presiza involve asaun halo advokásia kontra hahalok rasizmu no diskriminasaun ba grupu minoria sira no oinsá promove diversidade iha kobertura mídia ka jornalista nian iha terrenu.

Zevonia haktuir, AJTL influénsia ba malu atu kontra bainhira iha akontesimentu ka hahalok rasizmu no diskriminasaun ne’ebé ema ruma hamosu iha mídia sosiál.

“Hahalok rasizmu no diskriminazaun ne’e ladi’ak. Mai, ita promove diversidade, mai ita hamutuk halo sensível ba jéneru tanba rasizmu ne’e ladi’ak no hamate ema ida-nia karáter. Papél jornalista nian kontribui hodi kontra rasizmu ne’ebé mak akontese hodi  diskrimina grupu minoria sira ka maluk sira-ne’ebe mak sente vulnerável liuhosi publikasaun notísia,” nia dehan.

Nia dehan, bainhira jornalista balun ba halo kobertura ka entrevista fonte ruma mak iha liafuan ne’ebé mak mosu liafuan rasizmu, jornalista iha dever hasee direta no fo hanoin katak ida-ne’e la presiza públika tanba bele hamosu konflitu iha sosiedade.

“Iha komemorasaun Loron Mundiál ba Halakon Diskriminasaun Rasiál iha 20 marsu ne’e, mai ita hanoin ida, hamutuk kontra rasizmu labele akontese iha ita-nia kobertura. Ita mós iha papél importante hodi promove diversidade liuhosi ita-nia kódigu étika jornalizmu ida ne’ebé iha,” nia apela.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here