Prezidente Autoridade RAEOA-ZEESM, Arsénio Paixão Bano. Imajen TATOLI/Evaristo Soares Martins.

DILI, 23 setembru 2020 (TATOLI)—Rejiaun Administrativa Espesiál Oé-Cusse Ambeno-Zona Espesiál Ekonomia Sosiál Merkadu (RAEOA-ZEESM) lideradu Arsénio Paixão Bano, prioritiza medida prinsipál haat (4) iha proposta Orsamentu Jerál Estadu (OJE) 2020.

“Prioridade haat (4) de’it. Primeiru, Oé-Cusse tenke seguru hosi COVID-19 liuhosi medida prevensaun sira. Segundu, prioridade atu haree bee-moos tanba oras ne’e problema boot ba bee-moos, orsamentu 2020 nian atu ajuda rezolve problema bee-moos. Agora daudaun halo hela intervensaun emerjénsia,” Prezidente Autoridade RAEOA-ZEESM, Arsénio Paixão Bano, informa ba jornalista sira hafoin halo audiénsia ho Komisaun E (Infraestrutura), iha Parlamentu Nasionál, kuarta ne’e.

Programa prioridade datoluk, nia dehan, mak rekuperasaun eknómiku iha Oé-Cusse nian hanesan promove serbisu adminsitrasaun públika hotu-hotu tenke uza tais nune’e grupu suru-tais sira bele hetan osan.

Ikus liu, nia hateten, programa prioridade dahaat mak servisu intituisaun estadu nian tenke tama servisu loron ualu (8) no iha loron ida tenke on time ka pontuál, eskola hotu-hotu presiza re-ativa prosesu aprendizajen.

Entretantu, tuir livru C (RAEOA-ZEESM) ne’ebé Agência TATOLI, asesu proposta Orsamentu Jerál Estadu (OJE) hosi Rejiaun Administrativa Espesiál Oé-Cusse-Ambeno (REOA) hamutuk $76,000,000.00.

Hosi orsamentu millaun $76 ne’e komposta hosi saláriu no vensimentu $8,818,914.00, bens no servisu $14,483,795.00, kapitál menór $1,697290.00, kapitál dezenvolvimentu $11,216,695.00, transferénsia públika $4,783,306.00, Fundu Espesial Dezenvolvimentu (FED) $31,000,000.00 no fundu kontijénsia $4,000,000.00.

Despeza ba kategoria saláriu no vensimentu $8,818,914.00  hodi asegura saláriu no oras extraordináriu ba funsionáriu hamutuk ema na’in 2,136 ne’ebé dezagrega iha Gabinete PA, Adjuntu Prezidente Autoridade no Sekretáriu Regionál hitu (7) no inklui Membru Autoridade RAEOA no ZEESM-TL.

Despeza ba bens no servisu ho totál orsamentu $14,483,795.00 hodi asegura kustu operasionál ba Gabinete Presidente Autoridade, Adjuntu Prezidente Autoridade no Sekretáriu Rejionál sira hodi implementa programa ka atividade iha RAEOA no ZEESM.

Despeza ba kapitál minór hamutuk $1,697,290.00 ba tinan 2020 atu asegura kondisaun bázika ba Gabinete Prezidente Autoridade no mós ba gabinete sekretaria rejional sira seluk, liuliu ba komputadór ka labtop, printer, mobiliariu, AC no seluk seluk tan ne’ebé urjente.

Despeza ba kapital dezenvolvimentu ho montante $11,216,695.00 ba 2020, atu asegura obra sira-ne’ebé la’o hela no mós ba obra foun tuir prioridade VIII Governu konstitusionál.

Despeza ba transferénsia hamutuk $4,783.306.00 hodi asegura kustu ne’ebé ho natureza subvensaun públika hanesan asosiasaun koperativa sira, ONGs no UNDP, subsídiu ba Konsellu Suku, PAAS no dezastre natural, merenda eskolár no konsesaun eskolár.

Despeza ba fundu kontinjénsia ho montante $4,000,000.00 ba 2020 atu-bele utiliza ba pandemia COVID-19, no mós nesesidade emerjénsia ruma ne’ebe se akontese iha tinan 2020.

Tuir sumáriu despeza ne’ebé deskreve iha Livru 3 (RAEOA-ZEESM), fundamenta Orsamentu Jerál Estadu ba RAEOA no ZEESM-TL iha tinan 2020 la hetan alokasaun orsamentu tanba uza orsamentu iha RAEOA ne’ebé sentraliza iha kategoria transferensia públika hosi Governu Sentrál ba konta bankaria RAEOA bainhira orsamentu aprova.

Hosi totál ida-ne’e, RAEOA-ZEESM sei dezagrega fali ba kategoria sira seluk, atu nune’e bele fasilita iha prosesu ezekusaun. Totál hirak ne’e aloka ba kategroia saláriu vensimentu, bens servisu, kapitál minór, kapitál dezenvolvimentu, transferénsia públika no fundu kontinjénsia.

Hosi totál orsamentu 2020 ne’e maioria aloka iha kategoria fundu espesiál de dezenvolvimentu 40.79%, bens no servisu hamutuk 19.06 %, kapitál dezenvolvimentu 14.76 %, tuir mai ba saláriu vensimentu 11.61 %, transferénsia públika 6.29 %, fundu kontinjénsia 5.26 % no kapitál minór 2.23 %.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here