Amostra hosi teste swab ne’ebé médiku-sira foti hosi komunidade. Imajen Tatoli/António Gonçalves.

DILI, 19 marsu 2021 (TATOLI)—Sala Situasaun Centro Integrado Gestão de Crise (SS-CIGC), rejista tan kazu pozitivu foun COVID-19 na’in 23 hosi Dili ho Baucau, rekoperadu na’in-haat no pasiente ne’ebé baixa iha sala izolamentu na’in 138.

“Kazu foun 23, rekoperadu haat, ativu 138. Kazu 23 ohin, iha mane na’in-ualu, feto na’in 15. Idade entre tinan 10-14 ema na’in-tolu, tinan 18-60 na’in 20. Sintomátiku na’in-ida, asintomátiku 22. Hosi horisehik to’o ohin halo ezame laboratáriu ba ema na’in 543,” Koordenadór Forsa-Tarefa ba Prevensaun no Mitigasaun, Rui Maria de Araújo fó-sai kazu pozitivu hirak ne’e, liu hosi konferénsia imprensa, iha Centro Convenções Dili (CCD), sesta ne’e.

Notísia relevante:COVID-19: pozitivu foun 13 hosi Dili-Viqueque, baixa 119

Evolusaun iha Dili

Hosi kazu foun iha leten, na’in 22 iha Munisípiu Dili ho detalla, kazu pozitivu tolu, kontaktu ho profisionál saúde hosi cluster aldeia 05 ho cluster aldeia São Miguel, Suku Comoro, ne’ebé serbisu iha HNGV, unidade hemodiálize.

Kazu pozitivu lima, kontaktu-besik ho profisionál saúde ida iha cluster EMONC (Emergency Obstetrics and Neonatal Care).

Kazu pozitivu hitu, kontaktu-besik ho Kazu konfirmadu ida iha BTN III, aldeia Terra Santa, Suku Madohi, Postu Administrativu Dom Aleixo.

Kazu pozitivu neen, kontaktu-besik ho kazu ida iha cluster aldeia Maucocomate, Suco Becora, Postu Administrativu Cristo Rei.

Kazu pizitivu ida, kontaktu-besik ho kazu konfirmadu ida iha cluster HNGV, hela iha aldeia Au-hun, Suku Becora, Posto Administrativu Cristo Rei.

“Ho nune’e, kazu detetadu ka pozitivu iha Munisípiu Dili hosi 7 to’o 19 marsu 2021, hamutuk hotu 117,” médiku ne’e subliña.

Ho baze ba informasaun foun ne’ebé ekipa konjunta saúde nian rekolla, foku ka cluster kazu pozitivu iha Dili, hetan revizaun foku ka agrupamentu ka cluster 7, 18, no 19 marsu, BTN II-Terra Santa, Suku Madohi sia, BTN III –Terra Santa, Suku Madohi hitu (foun), aldeia Gólgota, suku Madohi tolu, aldeia Loron matan, Suku Madohi haat, aldeia Tasi Mean, Suku Comoro ida, aldeia 4 Setembru, suku Comoro rua, aldeia Fomentu I, Suku Comoro tolu, aldeia Fomentu II, Suku Comoro ida, aldeia Fomentu III, Suku Comoro rua, aldeia Ai-mutin, Suku Comoro ida, aldeia São Miguel, Suku Comoro ida, aldeia 03, Suku Fatuhada hitu, aldeia 05, Suku Fatuhada neen, aldeia 20 Setembru, Suku Bebonuk haat, aldeia Metin 3, Suku Bebonuk ida, aldeia Teki-Teki, Suku Bairru Pité ida, aldeia Frekat, Suku Bairru Pité haat, aldeia 5 outubru, Suku Bairru Pité ida, aldeia Avansa, Suku Bairru Pité sia, aldeia Mate Restu, Suku Vila Verde rua, aldeia Hura, Suku Motael ida, aldeia Lirio, Suku Motael rua, aldeia Maucoco Mate, Suku Becora hitu (foun), aldeia Au-hun, Suku Becora ida (foun), Hospital Nasional Guido Valadares lima, Kuarentena Carla Masion ida, Ministériu Finansa tolu, SEFOPE sia, Ministériu Transporte no Komunikasaun rua, EMONC (Emergency Obstetrics and Neonatal Care) training iha Hospital Nacional Guido Valadares 12.

“Kazu detetadu 117 iha Dili ne’e, fahe ba cluster 30, namkari iha instituisaun haat, eventu ida no Suku ualu, kuarentena ida, iha Postu Administrativu Dom Aleixo, Vera Cruz ho Cristo Rei,” nia hateten.

Doutór Rui Maria de Araújo mós fó hatene ba públiku katak, unidade hemodiálize iha HNGV hahú funsiona hikas, hafoin paradu durante liu oras 24 nia laran, serbisu seluk iha HNGV la’o hanesan bai-bain.

Evolusaun iha Baucau

Iha Munisípiu Baucau, ohin iha kazu foun ida. Hamutuk hotu Munisípiu Baucau deteta ona kazu konfirmadu na’in-ualu.

“Kazu foun ida-ne’e, hela iha aldeia Lamegua, Suku Bahu, Baucau Vila. Kazu konfirmadu ida-ne’e halo viajen hosi Dili ba Baucau iha 5 marsu no iha Dili hela iha aldeia 25 abril, Suku Santa Cruz, Postu Administrativu Na’in Feto,” nia esplika.

SS-CIGC fó sai katak, atividade prevensaun no mitigasaun COVID-19 iha munisípiu sira seluk, no Rejiaun Administrativa Espesiál Oe-cusse Ambeno (RAEOA), la’o hanesan bai-bain.

SS-CIGC mós konsidera dadus ne’ebé iha hatudu katak, kazu hirak ne’ebé detetatu iha Baucau na’in-ualu no iha Viqueque na’in-tolu, hanesan kazu ne’ebé lori-sai hosi Dili, entre 5 ho 9 marsu 2021.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here