Ekipa médiku halo teste swab ba komunidade aldeia 03, suku Fatuhada, (17/03/21). Imajen Tatoli/António Gonçalves.

DILI, 18 marsu 2021 (TATOLI)—Sala Situasaun Centro Integrado Gestão de Crise (SS-CIGC), rejista tan kazu pozitivu foun COVID-19 na’in 13 hosi Dili ho Viqueque, no pasiente ne’ebé baixa iha sala izolamentu hamutuk na’in 119.

“Dadus jerál ohin, kazu foun 13, kazu rekoperadu ida, kazu ativu 119. Na’in 13 ne’e, iha mane na’in sia, feto na’in haat,” Koordenadór Forsa-Tarefa ba Prevensaun no Mitigasaun, Rui Maria de Araújo fó-sai kazu pozitivu hirak ne’e, liu hosi konferénsia imprensa zoom iha Centro Convenções Dili (CCD), kinta ne’e.

Notísia relevante:COVID-19: pozitivu foun ualu hosi Dili-Baucau-RAEOA, izolamentu 107

Kona-bá kategoria idade, nia esplika, idade entre 11-12 ema na’in-rua, entre tinan 18-50 na’in 11, no mós sira ne’ebé sintomátiku na’in-tolu, asintomátiku na’in 10.

Alende ne’e, SS-CIGC mós fó sai katak, teste PCR ne’ebé hala’o hahú janeiru mai to’o 17 marsu 2021, hamutuk hotu-hotu 16.959.

“Iha janeiru hala’o 2.567 teste PCR, fevereiru 6.390, hosi 1 to’o 17 marsu hala’o ona 8.002 teste. Hosi horisehik mai ohin halo 233 teste,” nia esplika.

Evolusaun iha Dili

Hosi kazu foun iha leten, na’in 12 iha Munisípiu Dili, ho detalla hanesan tuir-mai, kazu pozitivu rua, hetan kontájiu hosi profisionál saúde hosi cluster aldeia 05 ho cluster aldeia São Miguel, Suku Comoro, iha HNGV, unidade hemodiálize.

Kazu pozitivu neen, hosi aldeia Avansa, Suku Bairru Pité, Postu Administrativu Dom Aleixo. Pozitivu rua ne’e kontaktu- besik ho kazu pozitivu iha cluster hanesan, ne’ebé anunsía iha 16 marsu.

Kazu pozitivu ida iha aldeia Metin 03, Suku Bebonuk, Postu Administrativu Dom Aleixo. Kazu ne’e ba aprezenta-an iha HNGV hakarak teste tanba deskonfia iha kontaktu-besik ho kazu iha Bebonuk.

Kazu pozitivu rua iha aldeia Lirio, Suku Motael, Postu Administrativu Vera Cruz. Kazu ne’e ba aprezenta-an iha HNGV hakarak teste tanba deskonfia iha kontaktu besik ho kazu iha Bebonuk.

Kazu pozitivu ida iha aldeia Maucocomate, Suco Becora, Postu Administrativu Cristo Rei. Kazu pozitivu ida ne’e kontaktu iha serbisu fatin ho kazu ida iha cluster aldeia Mate Restu, Suku Vila-Verde.

“Ho nune’e, kazu detetadu ka pozitivu iha Munisípiu Dili hosi 7 marsu to’o ohin, hamutuk hotu 95,” nia subliña.

Ho baze ba informasaun foun ne’ebé ekipa konjunta saúde nian rekolla, foku ka cluster kazu pozitivu iha Dili, hetan revizaun tuir foku ka agrupamenteu ka cluster 7, 17, no 18 marsu  iha BTN II-Terra Santa, Suku Madohi sia, aldeia Gólgota, Madohi tolu, aldeia Loron matan, Suco Madohi haat, aldeia Tasi Mean, Suku Comoro ida, adeia 4 Setembru, Comoro rua, aldeia Fomento I, Suku Comoro tolu, aldeia Fomentu II, Suku Comoro ida, aldeia Fomentu III, Suku Comoro rua, aldeia Ai-mutin, Suku Comoro ida, aldeia São Miguel, Suku Comoro ida, aldeia 03, Suku Fatuhada hitu, aldeia 05, Suku Fatuhada neen, aldeia 20 Setembru, Suku Bebonuk haat, aldeia Metin 03, Suku Bebonuk ida (foun), aldeia Teki-Teki, Suku Bairru Pité ida, aldeia Frekat, Suku Bairru Pité haat, aldeia 5 outubru, Suku Bairru Pité ida, aldeia Avansa, Suku Bairru Pité sia, aldeia Mate Restu, Suku Vila Verde rua, aldeia Hura, Suku Motael ida, aldeia Lirio, Suku Motael rua (foun), Hospital Nasional Guido Valadares rua (foun), Kuarentena Carla Masion ida, Ministériu Finansa tolu, SEFOPE sira, Ministériu Transporte no Komunikasaun rua, EMONC (Emergency Obstetrics and Neonatal Care) training iha Hospital Nacional Guido Valadares hitu.

“Kazu detetadu 95 iha Dili ne’e, fahe ba cluster 27, namkari iha instituisaun haat, eventu ida Suku ualu, no fatin kuarentena ida, iha Postu Administrativu Dom Aleixo, Vera Cruz ho Cristo Rei,” nia subliña tan.

Doutór Rui Maria de Araújo mós aproveita informa nafatin ba públiku katak, diresaun HNGV hola ona medida hodi tau iha kuarentena kolega serbisu-sira iha unidade hemodiálize, halo dezinfesaun, no buka-tuir kontaktu besik hosi kazu ne’ebé pozitivu inklui serbisu-sira iha HNGV la’o hanesan baibain.

Evolusaun iha Viqueque

“Iha Munisípiu Viqueque, ohin iha kazu foun ida,” Rui Maria de Araújo informa.

Nia dehan, hamutuk hotu Munsípiu Viqueque iha kazu konfirmadu na’in-tolu. Kazu foun ne’e profisionál saúde halo kursu pós-laborál iha UNTL, fila hosi Dili ba Viqueque iha 8 marsu.

Apelu

SS-CIGC apela ba populasaun Timor-Leste tomak, liu-liu iha Munisípiu Dili, Baucau ho Viqueque atu nafatin hakmatek.

Maski kazu konfirmadu aumenta ba beibeik, no naklekar mós ona ba Munisípiu Baucau no Viqueque, husu atu tu’ur nafatin hakmatek, atu nafatin matan moris neon na’in, lalika sé tilun ba lia-anin ka rumór, pratíka nafatin medida-sira uza máskara, fase liman beibeik ho sabaun, evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak, hamri’ik ka tur do’ok hosi ema seluk, mínimu metru ida ho balun.

Jornlista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here