Vendedór ida dudu hela karosa nakonu ho batar-nurak ne’ebé atu faan ba konsumidór sira iha Merkadu Taibesi. Imajen Tatoli/Antonio Gonçalves.

DILI, 18 marsu 2021 (TATOLI)—Xefe Departamentu Jestaun Merkadu Guarda Munisípiu Dili, Berta Santa Gonçalves Vieira, husu vendedór sira iha Merkadu Manleuana no Taibesei atu iha situasaun serka sanitaria ne’e, evita halibur malu no labele joga bingo no karta iha merkadu laran.

Notísia Relevante: Jestaun merkadu husu vendedór faan modo labele tau iha rai

Nia hatutan, iha situasaun serka sanitária vendedór sira bele hala’o atividade faan maibé loloos ne’e tenke kumpre nafatin regra hosi Organizasaun Mundiál Saúde (OMS), ne’ebé fó sai iha Ministériu Saúde (MS).

“Ha’u husu ba vendedór sira iha situasaun serka sanitária bele faan maibé tenke kumpre nafatin regra prevensaun COVID-19 nian ne’ebé fó sai iha Ministériu Saúde. Ha’u husu labele joga fali karta ka bingo no halibur malu iha merkadu laran. Tanba, ida ne’e hatudu katak laiha ona distánsia sosiál, entaun perigu tebes no fasil loos moras ne’e da’et ba ema id aba ema seluk,” Xefe Jestasaun Merkadu Dili, Berta Santa Gonçalves Vieira, hateten ba Agênsia TATOLI liuhosi telefónika bainhira halo hela observasaun iha Merkadu Manleuana, kinta ne’e.

Nia dehan, Estadu aplika serka sanitária ne’e ba nasaun nia di’ak, oinsá atu prevene no halakon moras COVID-19 ne’e entaun nu’udár sidadaun tenke hatudu konxiénsia hodi kumpre regra ne’ebé Estadu hatuur ona, tanba moras ne’e mai la haree ema.

“Ho situasaun sira-ne’e, mak ha’u agora iha hela Merkadu Manleuana fó orientasaun ba jestór merkadu nian, oinsá sira haree bele kontrola atividade merkadu nian tanba daudaun ne’e vendedór balu hahú la tuir regra OMS nian liuliu distansiamentu sosiál, tanba sira tuur halibur malu,” nia dehan.

Tanba ne’e, nia apela ba Jestaun Merkadu Manleuana tenke haree atividade merkadu nian ho sériu tanba antes ne’e superiór fó ona orientasaun katak, vendedór sira tenke aplika regra hosi MS nian hanesan prepara bee fase liman ho sabaun ka uza hand sanitizer, uza máskara no importante liu mak distánsia sosiál.

“Ha’u fó hela orientasaun ba jestór sira atu halo avizu ba vendedór sira katak merkadu la taka maibé tenke evita halibur malu. Karik, atu faan di’ak liu ema ida mak faan depois faan troka malu no tenke tuir regra merkadu loke tuku neen 06:00 dadeer to’o tuku 18:30 lorokraik ne’e tenke taka,” Berta hateten.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here