Inan feton na'in-rua tuur hein hela sira-nia modo ne'ebé fa'an iha estrada ibun área Comoro, Dili. Imajen/TATOLI.

DILI, 09 marsu 2021 (TATOLI)—Xefe Departamentu Jestaun Merkadu Guarda Munisípiu Dili, Berta Santa Gonçalves Vieira, husu vendedór ne’ebé faan modo labele faan modo-tahan hodi tau de’it iha rai ka trotoár letan.

Notísia Relevante: Durante Serka Sanitaria, Merkadu Taibesi-Manleuana kontinua loke

Berta Santa hatutan, objetivu bandu vendedór sira faan modo labele tau iha rai ka trotoár leten tanba ho situasaun COVID-19 ne’ebé agora iha ona trasmisaun lokál liuliu Munisípiu Dili, bainhira la haree sasán sira-ne’e ho di’ak mak virus fasil tebes da’et lalais.

“Nune’e ha’u husu ba kompradór sira tenke evita labele sosa modo ne’ebé faan tau iha rai ka trotoár leten. Tanba dala ruma ita la hetene fatin ne’ebé vendedór sira uza ba faan ne’e ema tafui kabeen tasak mós ita la hatene. Ne’ebé, kompradór sira hakarak evita moras ne’ebé agora iha ona trasmisaun lokál ne’e di’ak liu ba sosa iha merkadu sira-ne’ebé faan ho fatin ne’ebé mós,” Berta Santa Gonçalves Vieira, ba Agência TATOLI liuhosi telefónika, tersa ne’e.

Tanba, nia dehan, dala barak vendedór barak ne’ebé faan iha trotoár leten ne’e sira la hatene fatin refere ijiene ka lae, tanba sira rasik mós ba hili tan kaixa mamuk ne’ebé iha lixeira mai nahe tau tan modo mak faan iha leten, ida-ne’e perigu tebes iha sitausaun agora COVID-19 iha trasmisaun lokál, ne’ebé idak-idak uza konsiénsia nune’e bele kombate moras COVID-19.

Nia dehan, atu evita vendedór sira faan modo labele tau iha rai, daudaun ne’e merkadu kiik-oan sira hanesan Jardin Bairu Pité, Foho Osan mean, Becora, Elemloi, no Kampung Baru, jestaun merkadu tau ona ninia seguransa atu kontrola atividade merkadu nian.

“Ita tau hotu ona seguransa hosi Jestaun Merkadu nian no ita mós koordena ona Xefe Aldeia sira atu kontrola no haree jestaun ka atividade merkadu kiik sira-ne’e,” nia dehan.

Aleinde ida-ne’e, nia dehan, parte jesatun merkadu nia mós koordena nafatin seguransa merkadu nian nune’e kompradór ka vendedór sira halo movimentu iha merkadu tenke kumpre nafatin regra hosi saúde nian. 

Nia argumenta, maluk vendedór sira-ne’ebé kontinua faan modo ho iha trotoár leten ka dalan ninin, loloos ne’e labele. Tanba dektretu Lei númeru 33/2008, 27 agostu, iha artigu 5-7 ko’alia kona-ba bandu vendedór sira faan iha dalan ibun ka trotál leten, maibé to’o agora vendedór barak mak sei kontinua nafatin faan iha fatin sira-ne’ebé Esatdu bandu.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here