iklan

EKONOMIA

Stock foos iha Lautém hahú menus

Stock foos iha Lautém hahú menus

Funsionáriu CLN halo limpeza armazen Tibar. Imajen/CLN

DILI, 17 marsu 2021 (TATOLI)-Administradór munisípiu Lautém, Domingos Sávio, informa, daudaun stock foos iha munisípiu ne’e hahú menus, tanba ne’e autoridade fasilita kompañia no loja atubele ba sosa iha Dili.

Governu liuhosi rezolusaun aplika ona períodu serka sanitária no konfinamentu obrigatóriu, hahú loron 16 marsu to’o 02 abríl iha munisípiu Dili no loron 16 to’o 29 marsu iha munisípiu Baucau no Viqueque, tanba ne’e difikulta movimentu populasaun.

“Ami iha Lautém hahú menus stock ai-han, espesiálmente foos tanba daudaun negosiante hosi Baucau la tama no ami labele ba Dili, maibé nesesidade sira seluk laiha problema,” Administradór Lautém informa ba Agência TATOLI, via telefónika, kuarta ne’e.

Maski enferenta situasaun menus foos, maibé folin kontinua normál tuir regra hosi Governu.

Ba kestaun ne’e, autoridade halo ona rejistu ba kompañia sira ne’ebé hakarak ba sosa neseidade Bázika iha Dili hodi bele fasilita movimentu.

“Ami hahú rejista kompañia hitu ne’ebé hakarak ba sosa nesesidade bázika iha Dili, relasiona ho dokumentu sira no ami manda ba Sala Situasaun Sentru Integradu Jestaun Krize (CIGC, sigla portugés) no bainhira aprova mak ami halo guia de marça atu ba Dili sosa nesesidade bázika,” nia akresenta.

Aleinde ne’e, Administradór mós halo ona pedidu ba Ministériu Koordenadór Asuntu Ekonómiku (MKAE), Ministériu Turizmu, Komérsiu no Indústria (MTKI) atu koopera ho Sentru Lojístika Nasionál (CLN, sigla portugés) atubele halo intervensaun merkadu.

Notísia relevante: Governu hakarak halo intervesaun merkadu iha munisípiu hotu

Diresaun Jestaun Merkadu no Turizmu munisípiu Lautém halo observasaun iha merkadu no loja no nota katak stock foos iha munisípiu Lautém sei la to’o ona semana rua.

Enkuantu, estrada dirasaun Lautém-Baucau taka hela, maibé hanoin atu loke hodi fasilita negosiante nesesidade bázika hosi Baucau bele tama.

“Ami presiza negosiante fa’an nesesidade bázika hosi Baucau tanba iha fronteira Laiva, tanba ekipa saúde no Polísia iha ne’ebá bele haree no autoriza tama mai fa’an nesesidade bázika,” nia hatutan.

Notísia relevante: Autoridade munisipál no Polísia Lautém blokeia estrada fronteira ho Baucau-Viqueque

Antes ne’e, Ministru Koordenadór Asuntu Ekonómiku, Joaquim Amaral, informa, Governu sei halo intervensaun merkadu ba munisípiu hotu liuhosi kooperasaun ho CLN no setór privadu sira.

Populasaun munisípiu Lautém hamutuk 71.285 (sensus 2015) no iha postu administrativu lima hanesan Lospalos, Luro, Iliomar, Lautém no Tutuala, ne’ebé fahe ba suku 34 no aldeia 151.

Jornalista: Florêncio Miranda Ximenes

Editora: Julia Chatarina

iklan
iklan

Comments are closed.

iklan
error: Content is protected !!