DILI, 15 marsu 2021 (TATOLI)–Governu liuhosi Ministériu Koodenadór Asuntu Ekonómiku (MKAE) hamutuk ho Ministériu Turizmu, Komérsiu no Indústria (MTKI) koopera ho Sentru Lojístika Nasionál (CLN) inklui setór privadu sira atu lori foos ba munisípiu sira halo intervesaun merkadu.
“Ita sei kontinua halo intervesaun merkadu ba foos sira iha munisípiu hotu atu normaliza folin iha merkadu,” Ministru Koodenadór Asuntu Ekonómiku, Joaquim Amaral, hateten ida edifísiu Ministériu Finansa, Aitarak-laran, segunda ne’e.
Governu hahú halo intervesaun merkadu iha munisípiu lima hanesan Covalima, Bobonaro, Ainaro, Viqueque no Lautém.
Foos iha armazen Governu ka CLN hamutuk tonelada 25.000 ne’ebé sei sufisiente atu halo intervesaun merkadu.
Alende ne’e, foos iha armazen importadór foos sei iha tonelada 18.000 no agora foos iha dalan atu mai tonelada 14.000.
“Ita husu setór privadu sira atu apoia hodi halo intervesaun merkadu, atu nune’e sidadaun hotu bele foos,” nia fó hanoin.
Daudaun ne’e, kompañia Alva-Lili nia stock foos iha armazen tonelada 500 no tonelada 1.500 sei tama iha semana ida-ne’e.
Kompañia distribuitór Perisos nian foos iha tonelada 6.800, sobu ona iha portu no fulan oin sei tama tan tonelada 8.600.
Kompañia Lisun iha stock foos tonelada 700 ne’ebé prepara ba programa Cesta Bázika no prepera atu hatama tan tonelada 5.000.
Nune’e mós, sasán nesesidade bazika ne’ebé importa la’o ho di’ak hela tanba impaktu hosi kompañia kontribuitór selu kustu ró halo folin foos sae uitoan, maibé hasae la liu 10 to’o 15% tuir lei ne’ebé vigora ona.
Jornalista: Florêncio Miranda Ximenes
Editora: Julia Chatarina
