Mapa Baucau-Viqueque. Imajen/Wiki

DILI, 17 marsu 2021 (TATOLI)–Autoridade munisipál no Polísia munisípiu Lautém, blokeia ona estrada fronteira ho munisípiu Baucau-Viqueque, no bandu abitante sira labele halo movimentu.

Antes ne’e, Governu hasai rezolusaun hodi impoin serka sanitária no konfinamentu obrigatóriu  iha Baucau no Lautém, hahú loron 16 to’o 29 marsu, tanba munisípiu rua ne’e rejista ona kazu pozitivu COVID-19.

Administradór munisípiu Lautém, Domingos Sávio, hateten, tanba munisípiu ne’e fronteira ho Baucau no Viqueque, maka deside blokeia estrada atu komunidade labele la’o livre bá-mai iha área ne’e.

“Ami identifika odamatan tama mai munisípiu Lautém iha haat, liuhosi estrada protokolu hanesan Baucau mai Laiva, Irabere-Iliómar ba Uatucarbau, Viqueque no hosi Luru bá Baguia ne’e rua kedan, ne’ebé ami monta ona postu Polísia atu haree abitante ne’ebé mak tenta atu ba munisípiu rua ne’e,” Administradór Lautém informa ba Agência TATOLI, via telefónika, kuarta ne’e.

Notísia relevante: Governu impoin serka sanitária iha Baucau no Viqueque to’o 29 marsu

Tuir Administradór, daudaun ne’e iha ekipa Polísia no Saúde mak destaka iha postu rua, iha dirasaun Irabere-Iliomar bá Uatucarbau, Viqueque no Laiva-Lautém bá Laga, Baucau.

Aleinde ne’e, autoridade mós orienta ona líder komunitáriu sira ne’ebé besik iha área fronteira entre munisípiu rua ne’e, atu kontrola populasaun labele halo movimentu.

“Ha’u husu ba xefe suku no aldeia sira, atu kontrola nia ema sira no karik hetan ema foun ruma, maski la’ós família, maibé mai hosi Baucau, Viqueque no Dili, tenke informa lalais atu ekipa saúde foti amostra hodi prevene moras ne’e labele hada’et mai ita,” nia hatutan.

Administradór mós simu ona orientasaun hosi Sala Situasaun, Sentru Integradu Jestaun Krize (CIGC, sigla Portugés) atu bele buka tuir abitante sira ne’ebé desloka hosi Dili mai Lautém iha loron hirak antes ne’e.

“Ami mós simu ona kontaktu hosi Sala Situasaun atu fó orientasuan administradór postu, xefe suku no xefe aldeia, atu sira identifika sira nia-ema karik mai iha loron 07 no 08 marsu, tanba  pozitivu COVID-19 na’in rua iha Viqueque hosi Dili mak mai,” nia akresenta.

Aleinde ne’e, autoridade munisipál, pesoál saúde sira no Polísia Lautém kontinua halo diseminasaun ba abitante iha postu sira atu kontinua kumpre medida Estadu Emerjénsia da-XI, ne’ebé uza maskára, fase liman bebeik no halo distansiamentu sosiál.

Daudaun ne’e, atividade sira iha munsípiu Lautém la’o normál hanesan servisu administrasaun públika, atividade prosesu aprendizajen, merkadoria no seluk tan.

 Jornalista: Florêncio Miranda Ximenes

Editora: Julia Chatarina