Atividade iha Merkadu Taibesi, Dili. Imajen TATOLI/Antonio Goncalves

DILI,17 marsu 2021 (TATOLI)- Polísia Nasionál Timor-Leste (PNTL) Munisípiu Dili ho grupu Movimentu Tasi Moos (MTM) “Mama Bolu’’, kuarta ne’e, fahe máskara  hamutuk 1500 ba negosiante ho kompradór sira iha Merkadu Taibesi, Dili, hodi bele utiliza halo prevensaun ba COVID-19.

Negosiante iha Merkadu Taibesi uza máskara Imajen Tatoli/Antonio Goncalves

PNTL ho MTM mós fahe face shield 20 ba guarda jestaun merkadu no membru polísia sira ne’ebé destaka iha Merkadu Taibesi, Dili.

Iha atividade ne’e, PNTL mós disemina ba negosiante no kompradór sira kona-ba prosedimentu simples saúde públika nian iha luta konta propagasaun COVID-19 no regra sanitária.

Notísia Relevante : MTM kontinua dizinfeta fatin públiku ne’ebé risku ba propagasaun COVID-19

“Ita espera atu ema hotu kontribui luta kontra propagasaun COVID-19 liuhosi kumpre nafatin regra saúde públiku no prosedimentu sira kona-ba serka sanitaria no konfinamentu domisiliáriu nian,” Segundu Komandante PNTL Munisípiu Dili, Superintendente Euclides Belo, hateten ba Agência Tatoli.

Regra serka sanitaria la aplika rigór  ba atividade negósiu iha merkadu,  Euclides Belo esplika, atividade merkadu nian  hahú tuku 6:00 dadeer to’o  tuku 18:00 Otl, tenke taka ona.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here