Edifisíu MNEK. Imajen/Espesiál

DILI, 17 marsu 2021 (TATOLI)—Ministériu Negósiu Estranjeiru no Kooperasaun (MNEK) deside la estende kontratu ho kompañia Gardamor hodi destaka pesoál seguransa iha ministériu tanba osan laiha.

Tuir Diretór Gardamor, Eduardo Belo, parte pesoál seguransa halo protesta hodi husu klarifiksaun kestaun ne’e.

“Ohin sira eziji, se bele kompañia nia kontratu maka para ho MNEK, maibé ba pesoál seguransa snafatin serbisu. Tanba ne’e, ha’u-nia prezensa ohin iha ne’ebá atu klarifika ba sira katak atu kontinua serbisu ne’e la’ós ha’u-nia kompéntesia maibé Governu dehan osan laiha ona,” nia hatutan.

Notísia relevante: Kompañia Gardamor la simu pagamentu durante fulan hitu

Kontratu Governu liuhosi MNEK ho Gardamor hotu ona, ne’ebé tuir responsável kompañia, parte rua asina iha tinan kotuk to’o de’it marsu 2021.

“Kontratu ramata horikalan tuku 00:00 no parte ministériu hapara pesoál seguransa Gardamor. Enkuantu kontratu entre parte rua ba tinan rua dala ida, maibé iha dezembru 2020 MNEK halo kontratu foun ramata iha marsu tinan ne’e,” nia akresenta.

Nia dehan, pesoál seguransa Gardamor destakadu iha MNEK hamutuk 31, ho saláriu mensál $120, ne’ebé Gardamor rasik mak selu.

“Sira na’in-31 para hotu no fatin serbisu laiha, mai kompañia mós laiha fatin, sira barak tanis iha ne’e. Situasaun pademia ne’e susar koloka serbisu ba pessoál seguransa hosi Gardamor,” nia hatutan.

 

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here