Pesoál seguransa Gardamor destakadu iha MNEK. Imajen/Espesiál

DILI, 17 marsu 2021 (TATOLI)–Diretór Gardamor, Eduardo Belo, informa, Ministériu Negósiu Estrajeiru no Kooperasaun (MNEK), ne’ebé kontrata ho kompañia nasionál ne’e seidauk halo pagamentu durante fulan hitu.

“MNEK seidauk halo pagamentu ba ami, desde iha fulan setembru tinan kotuk to’o mai agora. Pagamentu ikus ami simu iha dezembru, ba fulan molok tama agostu,” Responsável  empreza ne’e dehan ba Agência TATOLI, via telefónika, kuarta ne’e.

Maski nune’e, Diretór ne’e dehan, empreza sempre garante saláriu mensál ba pesoál seguransa Gardamor ne’ebé destaka iha MNEK.

“Saláriu ba funsionáriu no pesoál seguransa hosi setembru to’o agora laiha problema inklui gaji 13 tinan kotuk mós sira simu hotu. Sira simu osan to’o fevereiru, marsu maka seidauk tanba fulan seidauk ramata. Kompañia la deve funsionáriu, maibé MNEK maka deve kompañia hosi setembru to’o agora, to’o hapara de’it kontratu ho kompañia,” nia akresenta.

Nia haktuir, saláriu mensál ba pesoál seguransa Gardamor destakadu iha MNEK $120, ne’ebé kompañia laiha hanoin atu trava saláriu.

“Kompañia nunka atraza sira-nia osan fulan ida, Governu maka selu atraza mai kompañia,” nia hatutan.

To’o notísia ne’e publika, Agência TATOLI seidauk hetan konfirmasaun hosi parte MNEK relasiona ho pagamentu ba Gardamor to’o hapara pesoál seguransa destakadu iha ministériu ne’e.

Jornalista: Natalino Costa 

Editora: Julia Chatarina

HAKEREK NO HATÁN

Please enter your comment!
Please enter your name here