Administradór Covalima, Francisco de Andrade Imajen/Espesiál.

DILI, 17 marsu 2021 (TATOLI)—Governu liuhosi Ministru Administrasaun Estatál (MAE), Miguel Pereira de Carvalho, dezafia Administradór foun Covalima atu kolabora no servisu hamutuk ho entidade no funsionáriu sira hotu iha Covalima no tenke iha inisiativa partisipasaun sívika konstrutiva atu nune’e bele hetan esénsia hosi podér lokál ne’e, hodi bele dezenvolve Munisípiu Covalima.

Notísia Relevante: MAE garante Administradór Covalima foun sei atinje PEDN ho susesu

“Ha’u hakarak dezafia Administradór foun Munisípiu Covalima, atu konsentra nia-matenek no abilidade hodi servisu hamutuk ho entidade no funsionáriu hotu hodi dezenvolve Munisípiu Covalima. Ha’u husu atu administradór foun promove no iha inisiativa partisipasaun sívika konstrutiva ema hotu, basá iha ne’e mak ita bele hetan esénsia hosi podér lokál,” Miguel Pereira de Caravalho hateten iha nia diskursu, iha serimónia tomada de pose ba Administradór Covalima, Francisco de Andrade, iha salaun STAE, Vera Crus, Dili, kuarta ne’e.

Miguel hateten, presisa tebes atu garante populasaun lokál sira bele partisipa hodi envolve-aan iha prosessu identifikasaun ba kestaun hirak ne’ebé impede ka satan fali dezenvolvimentu no prosperidade.

Membru Governu ne’e hatutan, tenke asegura atu populasaun sira bele esklaresida kona-ba komplesidade governasaun nian, hodi sira bele hatuur estratéjia hirak ne’ebé nesesária hodi ultrapasa hamutuk obstákulu hirak ne’ebé sira identifika ona. Tanba fundamentu mak sidadaun hosi munisípiu sira, nune’e idak-idak bele moris iha dame, promove kompreensaun ne’ebé mútua, estabilidade no armónia sosiál.

“Ita hakarak atu populasuan hotu iha Covalima, bele hamutuk hakas-aan atu promove dezenvolvimentu. Ba ida-ne’e, ha’u apelu ba sidadaun sira iha Munisípiu Covalima atu hadok-aan hosi divisionizmu ka fahe malu ne’ebé la apoiu malu bainhira prosesu dezenvolvimentu iha munisipál no nasionál la’o,”  nia akresenta.

Tuir nia, obstákulu hirak ne’ebé populasuan enfrenta hanesan mós obstákulu ne’ebé impede dezenvolvimentu lokál. Ho-ne’e, nia husu ba adminsitradór foun atu buka hatuur estatéjia ne’ebé populasaun rekoñese estratéjia loos nian, nune’e bele fasilita dezempeñu implementasaun programa Governu sentrál nian iha Munisípiu Covalima.

Tanba, nia dehan, atu konkretiza meta no objetivu Estadu nian ne’ebé Governu sentrál pendente, atu atinje nomeadamente fó seguransa ba sidadaun sira no mós moris di’ak ba populasaun hotu iha Timor-Leste inklui iha Covalima.

Administradór Covalima, Francisco de Andrade, hasai retratu hamutuk ho MAE hafoin simu pose. Imajen/Espesiál.

“Ha’u enkoraja atu administradór, atu labele haluha koopera ho parte hirak ne’ebé hakarak kontribui ba dezenvolvimentu liuhusi sira-nia dedikasaun no profisionalizmu, liuliu funsionáriu públiku, xefe no dirijente iha Munisípiu Covalima ne’ebé iha esperiénsia. Karreira profisionalizmu administrasaun publika nian, ne’ebé prontu atu tulun ita-boot bainhira ita-boot presiza atu kumpre ita-boot nia-misaun to’o mandatu ramata,” Miguel hateten.

Ministru ne’e hateten, presiza servisu hamutuk ho parte hotu atu valoriza malu, kumpre kódigu étiku funsionalizmu públiku, kumpre dever no responsabilidade hanesan traballadór Estadu nian no importante tebes hodi garante susesu ba mandatu dirijente ida-nian.

“Ha’u laran-metin no fiar katak ho matenek no esperiénsia ne’ebé administradór foun iha, sei konta mós ho apoiu hosi populasaun Munisípiu Covalima sira, apoiu hosi lideransa komunitária sira no mós komponente hotu iha Covalima, bele lori dezenvolvimentu Munisipiu Covalima ba oin,” nia dehan.

Tanba Governu aplika serka sanitária ba Munisípiu Dili no mós serka sanitária iha Munisípiu Covalima iha tempu hirak liuba, mak serimónia tomada de pose ne’e realiza de’it iha Dili hodi fó pose ba Adminitradór Munisípiu Covalima, Francisco de Andrade iha salaun STAE, Dili, ne’ebé akompaña diretamente hosi dirijente Administrasaun Lokál Estadu tomak iha Munisípiu Covalima.

Tomada de pose hahú konkretiza pela primeira vez iha Timor-Leste, ne’ebé kumprimentu ba artigu 152 hosi Decreto-Lei Nú. 3/2016 ho ninia alterasaun sira-ne’ebé aprova Estatutu Administrasaun Munisipál, Autoridade Munisipál no Grupu Traballu Tékniku Interministeriál ba Desentralizasaun Administrativa.

Bainhira Dekreto-Lei Nú. 3/2016 hahú vigora iha loron 11/03/2016, la prejudika mandatu administradór munisipál sira iha tempu ne’ebá hodi konklui sira-nia mandatu ne’ebé anteriormente nomeadu husi Komisaun Funsaun Públika (KFP), to’o realizasaun selesaun pur méritu ba kargu administradór munisipál no Presidente Autoridade munisipál sira iha termu legál.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here