Ministru Administrasaun Estatal (MAE), Miguel Pereira de Carvalho . Imajen/Media MAE.

DILI, 17 marsu 2021 (TATOLI)–Ministru Administrasaun Estatál (MAE), Miguel Pereira de Carvalho, hatete MAE garante ho Administradór Covalima foun sei atinje Planu Estatéjiku Dezenvolvimentu Nasionál (PEDN) ho di’ak no susesu.

“Administradór Covalima foun, iha tarefa boot tebes hodi hala’o no iha dezafiu barak iha oin hodi asegura katak servisu administrasaun públika nian ne’ebé deskonsentra ona ba Munisípiu Covalima bele implementa ho didi’ak hodi garante katak objetivu husi desentralizasaun administrativa ne’ebé temin iha Planu Estratéjiku Desenvolvimentu Nasionál 2011-2030 bele atinje ho di’ak no susesu,” Miguel Pereira de Carvalho hateten iha ninia diskursu iha serimónia fó tomada de pose ba Administrador Covalima foun, Francisco de Andrade, iha salaun STAE, Dili, kuarta ne’e.

Nia hatete objectivu hosi desentralizasaun administrativa ba iha munisipál sira mak garante dezenvolvimentu setór privadu iha área rurál, kria opurtunidade foun ba participasaun demokrátika iha nível lokál, halo promosaun instituisaun Estadu sira-ne’ebé mak forte no asegura prestasaun hosi servisu públiku ho forma ida efetiva, efisiente no ekuitativa liu.

“Administradór Munisípiu Covalima sei organiza servisu hotu iha administrasaun lokál Estadu Covalima nian ne’ebé halo koordenasaun ho servisu sentrál administrasaun públika nian hodi garante katak komunidade sira iha Covalima sei hetan prestasaun servisu públiku ida ne’ebé ideál duni,” Miguel hateten.

Nia dehan, ho apoiu hosi servisu sentrál Administradór Munisípiu Covalima sei garante katak alunu sira iha Covalima, iha kondisaun mínima hodi tuir prosesu ensinu aprendizajen ho di’ak iha nivel pre-primaria no ensinu báziku.

Governante ne’e hatutan, populasaun sira hetan atendimentu saúde di’ak iha postu saúde no sentru saúde komunitáriu, inklui infraestrutura rurál ho urbana adekuadu hodi fasilita populasaun nia-moris, no kanalizasuan bee ba komunidade nia-uma no saneamentu adekuadu.

“Presiza apoiu no koordena atividade estensaun agríkola, vasinasaun animál no apoia inisiativa reflorestasaun nian inklui hadi’ak funsionamentu merkadu munisipál.

Maibé, nia hateten, servisu ne’ebé Administradór foun atu hala’o ne’e todan maibé ezije esforsu atu ho badinas bele servisu hodi tane ema hotu.

Dala barak tenke hakraik-aan, hodi bele sai nu’udar instrumentu Estadu nian ida, ne’ebé halibur sidadaun sira hotu hodi implementa planu dezenvolvimentu nasionál no planu dezenvolvimentu munisipál.

“Ha’u hakarak bolu atensaun ba administradór katak programa munisipál labele haketak-aan hosi progrma nasionál ne’ebé trasa on iha PEDN nian,” nia dehan. 

Nia hateten, servisu munisipál sira tenke kolabora ho parte hotu iha adminsitrasaun munisipál nian hodi promove atuasaun unitária, integrada no koerente administrasaun publika nian hodi ezekuta PEDN, Programa Governu, Planu Desenvolvimentu Munisipál no Plano Asaun Anual (PAN) nian ho loloos.

“Iha-ne’e, Administradór Munisípiu Covalima sei koordena, akompaña no avalia atuasaun hosi órgaun servisu administrasaun lokál nian inklui garante sira-nia atuasaun ne’ebé mak tuir duni orientasaun maihosi Governu sentrál,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here