DILI, 15 marsu 2021 (TATOLI)—Iha ámbitu impozisaun serka sanitária no konfinamentu obrigatóriu iha munisípiu Dili, Baucau no Viqueque, Governu deside suspende provizóriu hahú loron 16 marsu to’o períodu ne’e ramata.
Serka sanitária iha Dili estende hosi loron 16 marsu to’o 02 abríl no Baucau no Viqueque hosi loron 16 to’o 29 marsu.
“Munisípiu tolu impoin ona serka sanitária ne’ebé Ministériu Edukasaun, Juvetude no Desportu (MEJD) la presiza hasai ona despaisu maibé suspende de’it ona atividade prosesu aprendijazen iha munisípiu tolu ne’e,” Ministru Edukasaun, Juvetude no Desportu, Armindo Maia, informa hafoin reuniaun Konsellu Ministru, iha salaun Ministériu Finansa, segunda ne’e.
Notísia relevante: Governu impoin serka sanitária iha Baucau no Viqueque to’o 29 marsu
Desizaun ne’e hafoin Ministériu Saúde no Sala Situasaun Sentru Integradu Jersaun Krize (CIGC) rejista kazu pozitivu COVID-19 hamutuk neen iha Baucau no Viqueque rua, nune’e kazu ativu inklui iha Dili sa’e ba 99.
Nune’e, governante ne’e dehan, ekipa tékniku ministériu sira diskute ona sistema eskola iha uma liuhosi televizaun ba estudante sira iha munisípiu tolu ne’e.
“Ita uza ona meiu kontinua nafatin uza sistema eskola iha uma, ne’ebé daudaun ne’e ministériu diskute hela atu hadi’a di’ak liután sistema ne’e,” nia akresenta.
Serka sanitária no konfinamentu obrigatóriu bandu sirkulasaun ema nian entre munisípiu tolu ba munisípiu seluk, exetu iha kazu ho fundamentu forte ka razaun siguransa públika, saúde públika, asisténsia umanitária, manutensaun sistema abastesimentu públiku ba interese públiku.
Jornalista: Florêncio Miranda Ximenes
Editora: Julia Chatarina
