Diretór Sala Situasaun, CIGC, Brigadeiru Jenerál João Miranda ‘Aluk’. Imajen TATOLI/Egas Cristóvão

DILI, 16 marsu 2021 (TATOLI)—Sala Situasaun Centro Integrado Gestão de Crises (SS-CIGC), ofisialmente fó-sai ona katak, kualkér sidadaun ne’ebé hakarak atu tama ka sai hosi munisíupiu-sira ne’ebé Governu impoin ona Serka Sanitária (SS), tenke halo pedidu no dirije ba Diretór SS-CIGC, Brigadeiru Jenerál João Miranda ‘Aluk’.

Informasaun ne’e fó-sai hosi Koordenadór Forsa-Tarefa ba Prevensaun no Mitigasaun, Rui Maria de Araújo, liu hosi konferénsia imprensa zoom iha Centro Convenções Dili (CCD), tersa ne’e.

Notisia relevante:COVID-19: pozitivu foun lima iha Dili, izolamentu 104

“Aproveita informa ba públiku katak, pedidu ne’e tenki diriji hotu ba Brigadeiru Jenerál João Miranda ’Aluk’, liu hosi email centrointegradogestaodecrises@gmail.com. Bele mós haruka WhatsApp ba 77575151 ka 74236509, bele mós telefona ba 77539773 hodi halo follow up,” Rui Maria de Araújo esplika.

Nia dehan, populasaun ne’ebé presiza autorizasaun espesiál atu tama ka atu sai hosi serka sanitária iha Munisipiu Dili, Baucau no Viqueque, tenke haruka pedidu liu hosi meiu ne’ebé temi ona.

SS-CIGC husu favór evita mai halibur-malu iha CCD nune’e redúz risku atu hada’et moras ba malu, tanba ekipa Sekretariadu no ekipa Estadu Maiór Koordenadór nian sei halo esforsu atu la demora hodi responde pedidu-sira ne’ebé tama.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here