Bolseiru médiku espesialista Timoroan iha Cuba. Imajen/Espesiál.

DILI, 16 marsu 2021 (TATOLI)—Bolseiru médiku espesialista Timoroan iha Cuba lamenta ho liña koordenasaun interministeriál ne’ebé lidera hosi Ministériu Negósiu Estranjeiru no Kooperasaun (MNEK) tanba esklui iha viajen voo dala-rua.

Notísia Relevante: PN husu Governu repatria médiku espesialista Timoroan iha Cuba

Koordenadór Bolseiru Médiku Espesialista Timoroan iha Cuba, Herculano Seixas dos Santos, informa médiku Timoroan iha Cuba hamutuk na’in-23, hala’o estudu iha espesialidade área klínika.

Hosi na’in 23 ne’e ne’e na’in-17 finaliza ona estudu dezde fulan-dezembru 2020 no na’in-15 mak simu ona diploma no hein hela repatriasaun mai Timor-Leste to’o ohin loron (fulan 3 ona).

Médiku na’in-15 ne’e, kompostu hosi espesialidade kardiolojía na’in-tolu (3), terapia intensiva na’in-haat 4), nefrolojía na’in-tolu (3), neurolojía na’in-ida (1), endokrinolojía na’in-rua (2) no imajenolojía na’in-rua (2).

“Ami hakarak fila ba Timor-Leste hodi servi nasaun maibé ami triste tanba esklui ami dala-rua hosi viajen. Ami eskluidu iha voo ne’ebé previstu iha fulan-fevereiru sein hetan klarifikasaun ruma hosi grupu interministeriál no ami nafatin eskluidu hosi voo Euro Atlántic ne’ebé previstu ona ba loron 12 marsu 2021,” Herculano Seixas dos Santos informa liuhosi komunikadu imprensa ne’ebé Agência TATOLI asesu, tersa ne’e.

Kronolojia atrazu iha repatriasaun

Bolseiru sira hato’o ona preokupasaun ne’e ba Embaixada Timor-Leste iha Cuba mak hanesan iha loron 12 janeiru 2021, simu informasaun ne’ebé grupu interministeriál hato’o liuhosi karta eletronika (email) ba embaixada Timor-Leste iha Havana katak bolseiru sira sei fila mai Timor-Leste iha loron 02 fevereiru 2021 ho voo umanitária, rute Havana-Paris-Lisboa-Londres-Dubai no loron 07 fevereiru Kuala-Lumpur-Dili.

Iha momentu ne’ebá prosesu koordenasaun la’o regulár, bolseiru sira mós submete lista no kópia pasaporte, Embaixada mós trata vistu, ikus mai viajen refere realiza duni.

“Maibé ami-nia naran eskluidu hosi lista viajen sein hetan klarifikasaun loloos kona-ba razaun saida mak ami-nia naran eskluidu hosi viajen refere,” bolseiru sira lamenta ho situasaun ne’e.

Purtantu iha loron 03 fevereiru 2021, bolseiru sira simu informasaun liuhosi email ne’ebé haruka hosi grupu interministeriál ba embaixada Timor-Leste iha Cuba, informa katak bolseiru médiku espesialista na’in-15 sei hala’o viajen ho Euro Atlantic ho rute Havana-Lisboa iha loron 12 marsu 2021 no Lisboa-Dili iha loron 14 marsu 2021.

Iha momentu ne’ebá, prosesu koordenasaun la’o fulan ida-resin no re-submete kópia pasaporte no lista viajen bolseiru sira hala’o kontaktu kuaze loro-loron ho embaixada hodi husu informasaun kona-ba prosesu koordenasaun ba viajen refere.

Nune’e informasaun ne’ebé informa hosi Ministériu Negósiu Estranjeiru no Kooperasaun liderada Adaljiza Magno liuhosi Embaixada Timor-Leste nian Havana, katak billete alokadu ona hosi Fundu Dezenvolvimentu Kapitál Umanu (FDCH-sigla portugés) maibé ajénsia Soñandu (Sonhando) mak seidauk hato’o pedidu ofisiál ba Governu Timor-Leste tanba ne’e husu bolseiru sira pasiénsia nafatin hodi hein.

Resposta ne’e bolseiru sira simu dezde loron 18 fevereiru to’o primeira semana fulan-marsu katak orsamentu ba billete aloka ona, bolseiru sira-nia billete mós rezervadu ona, maibé hein de’it Governu halo aprovasaun ofisiál ba voo refere, depois mak FDCH sei hala’o pagamentu ba sira-nia billete. Grupu Interministeriál afirma mós katak kestaun téknika kona-ba sira-nia viajen laiha problema.

Iha loron 08 marsu 2021, bolseiru sira rasik ho kuriozidade hakerek email ba jerente ajénsia Soñandu hodi husu informasaun kona-ba billete no programasaun definitiva ba voo Euro Atlantic, nune’e ajénsia Soñandu responde katak bazea ba pedidu hosi embaixada Timor-Leste iha Lisboa, ajénsia Soñandu halo ona rezerva ba médiku na’in-15 nia billete maibé sira seidauk simu resposta ka konfirmasaun hosi entidade ne’ebé responsabiliza ba pagamentu.

Ajénsia ne’e mós konfirma katak partida Euro Atlantic hosi Lisboa-Dili ne’ebé planeadu ba loron 14 marsu 2020 aprovadu ona hosi Governu Timor-Leste.

“Ajénsia mós konfirma katak Ministériu Edukasaun Timor-Leste nian halo ona pagamentu ba profesór portugueza sira-nia billete maibé ami-nian mak seidauk,” situasaun ne’e halo bolseiru sira nakonu ho tristeza.

Loron 10 marsu 2021 dadeersan, bolseiru sira rasik konfirma ho Embaixada Timor-Leste iha Havana kona-ba asuntu refere no resposta mak Ministériu Transporte Telekomunikasaun seidauk fó aprovasaun ba voo refere tanba pista aeroportu Prezidente Nicolau Lobato ladi’ak.

Loron 10 marsu kalan oráriu Cuba nian no iha Timor-Leste loron 11 marsu dadeersan, bolseiru sira foin simu konfirmasaun loloos hato’o hosi grupu interministeriál ba Embaixada Timor-Leste iha Havana katak voo refere hetan ona aprovasaun hosi Governu no tenke halo kedas teste PCR (Covid-19) no trata vistu França nian iha 24 horas nia laran hodi nune’e bele halo viajen hosi Havana-Lisboa loron 12 marsu 2021 kalan.

Nune’e loron 11 marsu dadeersan oráriu Cuba nian, bolseiru sira hamutuk ho Embaixada Timor-Leste halo esforsu atu trata vistu França nian maibé la hetan aprovasaun tanba Embaixada França nia prosedimentu presiza demora mínimu 72 horas no presiza aprezenta uluk billete antes halo aprovasaun ba vistu.

“Realidade ne’ebé akontese mak mesmo que ami bele rezolve teste PCR (Covid-19) iha 24 horas nia laran maibé vistu ami labele hetan iha 24 horas nia laran tanba tempu la to’o no ami mós seidauk simu billete. Ikus mai ami-nia viajen labele realiza tanba grupu interministerial fó konfirmasaun tarde liu, no iha última 24 horas (loron 11 marsu 2020) ami la biban trata vistu, halo teste PCR (Covid-19) no la hetan billete hodi bele halo viajen tuir planu ne’ebé definidu ona ba loron 12 marsu 2021,” bolseiru sira lamenta.

Rekomendasaun

Bolseiru sira husu ba komisaun Interministerial ne’ebé trata viajen ne’e atu hadia di’ak liután koordenasaun no komunikasaun ho Embaixada Timor-Leste iha Havana no ajénsia ne’ebé responsabiliza ba bolseiru sira-nia viajen.

Bolseiru sira rekomenda Governu antes fó aprovasaun ba voo umanitária tenke konsidera mós paresér tékniku hosi embaixada Timor-Leste iha Havana hodi nune’e bele akomoda mós bolseiru sira iha planu repatriasaun ne’ebé define ona hosi Governu.

Médiku espesialista Timoroan hirak ne’e fó hanoin ba governu atu tetu mós ba prosedimentu internu Embaixada França no Embaixada sira seluk iha Cuba durante pandemia Covid-19, katak atu fó konfirmasaun sedu no hola uluk billete pelumenus semana rua ka semana ida antes hodi nune’e bele fó biban ba bolseiru sira halo teste PCR (covid-19) no trata vistu tránzitu nian.

“Ami konsiente katak asuntu ne’ebé relasiona ho ami-nia viajen ne’e kestaun interministeriál maibé ami-nia intensaun hato’o lamentasaun no rekomendasaun hirak ne’e la ofende espesífikamente ema ruma maibé atu kontribui hadi’a efisiénsia servisu. Ami mós hakarak hetan tratamentu ne’ebé justu un’udar ema Timoroan no n’uudar mós forsa traballu Ministériu Saúde nian ne’ebé kompromete-aan ho saúde povu Timor-Leste nian,” refere iha komunikadu imprensa ne’e.

Timoroan hirak ne’ebé un’udar mós forsa traballu Ministériu Saúde nian auzénsia tinan tolu resin hosi nasaun no família la’ós atu buka benefísiu ruma iha Cuba maibé halo sakrifísiu no dedika-aan hodi buka kuñesimentu atu fila mai serví Timor-Leste, tane aas nafatin espíritu nasionalizmu no patriotizmu hanesan saida mak sira halo tiha ona iha tempu kotuk serví ba povu iha área remota no iha fatin ne’ebé de’it.

Bolseiru sira argumenta, leál ba estadu la signifika tenke nonok de’it hodi aseita buat ne’ebé sala, maibé un’udar sidadaun atu kontribui ba boa governasaun ne’ebé saudável.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here