Prezidente Komisaun G, Deputadu António Verdiál de Sousa. Imajen TATOLI/Evaristo Soares Martins.

DILI, 15 marsu 2021 (TATOLI)—Parlamentu Nasionál liuhosi Komisaun G ne’ebé trata asuntu Edukasaun, Juventude, Kultura no Sidadania husu Governu reptaria médiku espesialista timoroan na’in-15 ne’ebé ramata estudu iha Cuba.

Bolseiru médiku espesialista timoroan na’in-15 ne’ebé ramata ona estudu iha fulan-dezembru 2020 iha Cuba no oras ne’e hakarak fila ona mai Timor-Leste, maibé prosesu repatriasaun atraza.

Prezidente Komisaun G ne’ebé trata Edukasaun, Juventude, Kultura no Sidadania, Deputadu António Verdiál de Sousa, husu Governu buka meiu hodi fó solusaun ba kestaun ne’e.

Deputadu Verdiál fó-sai katak, timoroan na’in-15 ne’e ramata ona estudu iha área espesialidade kardiolojía na’in-tolu, terapia intensiva na’in-haat, nefrolojía na’in-tolu, neurolojía na’in-ida, endokrinolojía na’in-rua no imajenolojía na’in-rua.

Maibé tuir dadus ne’ebé Prezidente Komisaun G ne’e asesu, médiku hamutuk 23 mak sei iha Cuba, hala’o estudu iha espesialidade área klínika.

Hosi númeru ne’e, na’in-17 finaliza ona estudu dezde fulan Dezembru 2020 no na’in-15 mak simu ona diploma no hein hela repatriasaun atu mai Timor-Leste to’o ohin loron.

“Ami akompaña nafatin situasaun ida-ne’ebé timoroan sira eskola iha Cuba, maibé ami mós rona informasaun katak iha ema na’in-15 ne’ebé eskola hotu ona no agora sira hakarak fila lalais mai Timor-Leste ho objetivu atu mai serví ita-nia rain ida-ne’e ho di’ak liután,” Prezidente Komisaun G informa ba Agência TATOLI, tersa ne’e.

Nia parte agradese ba Estadu Timor-Leste tanba haruka ona timoroan sira ba eskola no agora daudaun sira espesializada hotu ona maibé preokupasaun mak estudante ramata ona estudu no oras ne’e halimar hela de’it iha Cuba.

“Estudante sira ejize atu ita-nia Governu bele ajuda sira fila lalais mai Timor-Leste. Informasaun ne’ebé sira hato’o katak, sira agora daudaun hein de’it voo, maibé voo dala-tolu ona maibé to’o ohin seidauk bele realiza. Sira lamenta tebes liña koordenasaun entre Ministériu Saúde, Ministériu Negósiu Estranjeiru no Kooperasaun, Ministériu Ensinu Superiór, Siénsia no Kultura no Fundu Dezenvolvimentu Kapitál Umanu,” nia dehan. 

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here