Aviaun euroAtlantic Airlines. Imajen/wikiwand

DILI, 15 marsu (TATOLI)—Pasajeiru na’in 190 ne’ebé mai hosi Portugál iha segunda (15/03) ho aviaun euroAtlantic (EAA sigla inglés), submete ona iha kuarentena obrigatóriu.

Diretora Jerál Prestasaun Saúde, Odete da Silva Viegas, hateten aviaun ne’e tula pasajeiru ne’ebé rejistadu tuir billete ne’ebé iha hamutuk 190, enkuantu pesóal sira iha aviaun ne’e rasik hamutuk na’in 15 kompostu hosi pilotu ho ekipa.

Notísia relevante:Aban, Euro Atlantic sei halo voo Portugal-Dili tula pasajeiru 241

“Pilotu ho ekipa  hamutuk ema na’in 15,   no ita sura hamutuk ema ne’ebé tama  iha Aeroportu  hamutuk na’in 205,’’  Odete da Silva Viegas hateten ba jornalista Agência Tatoli via telefónika, segunda ne’e.

Hosi númeru 190 ne’e, Odete esplika, maioria profesór ne’ebé sei hanorin iha eskola CAFE no mós  trabalhadór Timoroan-sira ne’ebé uza pasaporte Portugál, inklui sidadaun ne’ebé uza pasaporte Timor na’in 45.

“Iha lista ne’e, profesór CAFE hamutuk ema na’in 104, sira halo ona konfinamentu obrigatóriu iha Otél Gólgota,  Garden Beach no Otél Timor,” nia informa.

Alokasaun pasajeiru-sira hodi halo konfinamentu obrigatóriu tuir fatin ne’ebé Governu prepara mak hanesan, Otél Gólgota na’in  56, Otél Timor na’in  24, Beach Garden na’in 37, Palm Otél na’in ualu,  Otél Luksuri na’in 15,   Otél Audian  na’in 18, Otél Fortuna na’in 19,  Otél Kilatama  na’in rua, Otél  Arbiru na’in 10 no na’in ida  iha Otél Vila Verde.

“Ema sira ho pasaporte Timor ne’e Governu mak sei selu. Sidadaun estranjeiru tenki ba Otél ne’ebé Governu hatudu, maibé sira selu rasik. Signifika profesór CAFE selu rasik otél hodi halo konfinamentu obrigatóriu. Tanba ne’e, Ministériu Saúde koloka ona pesoál saúde atu halo akompañamentu ba sira to’o loron 14,” Odete subliña.

Tuir planu, aviaun euroAtlantic  sei fila hikas ba Portugál iha tersa (16/03).

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here