Membru PNTL hala'o patrulla iha Dili durante serka sanitária (12/03/21). Imajen Tatoli/António Gonçalves.

DILI, 15 marsu 2021 (TATOLI)—Sala Situasaun Centro Integrado Gestão de Crises (SS-CIGC), kontinua rejista kazu pozitivu foun COVID-19 na’in hitu, rekoperadu na’in lima no ativu sa’e ba na’in 99.

Koordenadór Forsa-Tarefa ba Prevensaun no Mitigasaun, Rui Maria de Araújo informa kazu pozitivu hirak ne’e liu hosi konferénsia imprensa zoom iha Centro Convenções Dili (CCD), segunda ne’e.

Notísia relevante:COVID-19: pozitivu 18 hosi Dili-Baucau, baixa aumenta ba 97

“Dadus jerál ne’ebé ita iha, kazu foun hitu, kazu rekoperadu lima, kazu ativu 99. Hosi na’in hitu ne’e, iha mane na’in-lima no feto na’in-rua,”  Rui Maria de Araújo hateten.

Nia mós informa kona-bá klasifikasaun idade katak,  idade hosi 14 to’o 43 iha ema na’in 14, hotu-hotu asintomátiku, ka la hatudu síntomas.

“Hosi 1 janeiru to’o 14 marsu 2021, totál kazu detetadu pozitivu iha 143, 54% feto no idade média varia entre tinan 22-44. 38 % diagnostikadu iha kuarentena no 62% diagnostikadu iha komunidade, ka la’ós iha kuarentena nia laran,” nia subliña.

Hosi kazu hirak ne’ebé diagnostikadu iha komunidade nia le’et, 67% rezidente iha Dili, 24% iha Covalima, 8% iha Baucau, 1% iha Viqueque.

Evolusaun COVID-19 iha Dili

Kona-bá evolusaun surtu COVID-19 iha munisípiu Dili, hosi totál kazu foun iha leten, sira na’in-lima, ho detalla hanesan tuir mai, kazu pozitivu ida, iha kuarentena Carla Mansion. Kazu pozitivu ida, hosi aldeia Hura, Suku Motael, Postu Administrativu Vera Cruz. Pozitivu ida-ne’e kontaktu-besik ho kazu konfirmadu ida hosi Cluster aldeia 4 Setembru, ne’ebé mós hetan transmisaun hosi nia la’en hosi Cluster MTK. Kazu pozitivu ida, hosi aldeia Terra Santa, Suku Madohi, Postu Administrativu Dom Aleixo. Kazu ida-ne’e, hosi rastreiu aleatóriu. Kazu pozitivu ida, hosi aldeia Fomentu III, Suku Comoro, Postu Administrativu Dom Aleixo. Pozitivu ida ne’e kontaktu-besik ho kazu konfirmadu ida hosi Cluster aldeia Fomento III. Kazu pozitivu ida, hosi aldeia 5 Outubru, Suku Bairru Pité, Postu Administrativu Dom Aleixo. Pozitivu ida ne’e deteta hosi amostra vijilánsia sentinela iha HNGV.

Ho nune’e, kazu detetadu ka pozitivu iha Munisípiu Dili hosi  7 marsu to’o ohin, hamutuk hotu 72.

Ho baze ba informasaun foun ne’ebé ekipa konjunta saúde nian rekolla, foku ka cluster kazu pozitivu iha Dili, hetan revizaun hanesan tuir mai, foku ka agrupamentu ka cluster totál kazu iha 7, 14 no 15 marsu 2021  iha BTN II-Terra Santa, Suku Madohi ualu, aldeia Gólgota, Madohi tolu, aldeia Loron matan, Suku Madohi haat, aldeia Tasi Mean, Suku Comoro ida, aldeia 4 Setembru, Comoro rua, aldeia Fomentu I, Suku Comoro tolu, aldeia Fomentu II, Suku Comoro ida , aldeia Fomentu III, Suku Comoro rua, aldeia Ai-mutin, Suku Comoro ida, aldeia 03, Suku Fatuhada hitu, aldeia 05, Suku Fatuhada tolu, aldeia 20 Setembru, Suku Bebonuk rua, aldeia Teki-Teki, Suku Bairru Pité ida, aldeia Frekat, Suku Bairru Pité haat, aldeia 5 Outubru, Suku Bairru Pité ida (foun), aldeia Mate Restu, Suku Vila Verde rua, aldeia Hura, Suku Motael, ida (foun), Kuarentena Carla Masion ida (foun), Ministériu Finansa tolu, SEFOPE sia, Ministériu Transporte no Komunikasaun rua, EMONC (Emergency Obstetrics and Neonatal Care) training/Hospital Nacional Guido Valadares hitu.

Kazu detetadu 72 iha Dili ne’e, fahe ba cluster 22, namkari iha instituisaun tolu, eventu ida no Suku hitu iha Postu Administrativu Dom Aleixo, no mós Postu Administrativu Vera Cruz.

Evolusaun COVID-19 iha Baucau

Amostra hirak ne’ebé foti iha 10 no 11 marsu iha Munisípiu Baucau, hamutuk hotu 132, horisehik relata ona katak 37 mak sei hein rezultadu hosi laboratóriu, maibé ohin hakarak relata katak 37 ne’e negativu hotu.

Hosi kazu konfirmadu rua ne’ebé horisehik ralata, no mós vijilánsia sentinela, ekipa konjunta saúde rekolla amostra hamutuk 119. Hosi amostra 119, na’in-haat mak pozitivu no sira ne’e hotu profisionál saúde iha Sentru Saúde Wailili.

“Ho nune’e, iha Munisípiu Baucau, iha Cluster rua mak hanesan Cluster Baucau Vila kazu detetadu tolu, kompostu hosi ida iha 2 marsu, na’in-rua iha 13 marsu. Cluster Sentru Saúde Wailili kazu detetadu tolu profisionál saúde hotu,” Rui Araújo akresenta.

Nia mós informa liu tan katak, autoridade saúde Munisípiu Baucau deside taka temporariamente Sentru Saúde Wailili, halo ona dezinfesaun, hafoin sei organiza prestasaun kuidadu primária saúde ba populasaun iha área ida ne’ebá.

Kona-bá atividade buka-tuir kontaktu besik iha Munisipiu Baucau, médiku ne’e dehan kompleta ona, no  hahú ohin, amostra sira laboratóriu-nian hahú halo análiza iha Hospital Referénsia Eduardo Ximenes, Baucau. Baihira volume análiza bo’ot liu, maka sei lori mós mai Laboratóriu Nasionál iha Dili.

Governu deside ona atu impoin Serka Sanitária ba Munisípiu Baucau durante loron 14. Iha periúdu ida-ne’e ekipa konjunta saúde-nian sei buka-tuir kontaktu besik hosi kazu pozitivu sira hotu, no identifika grupu risku-sira hodi halo análiza laboratóriu.

COVID-19 iha Viqueque

Laboratóriu Nasionál Saúde simu  amostra 158 horisehik hosi Munisípiu Viqueque. Hafoin halo análiza deteta kazu pozitivu rua. Ida hosi aldeia Umane Iku, Ossu de Cima, Postu Administrativu Ossú, ida seluk hosi aldeia Lari, Suku Afaloikai, Postu Administrativu Uatu-Lari.

“Na’in rua ne’e hosi Dili, ida primeiru iha 12 marsu, ho autorizasaun CIGC atu ba hakoi ema mate, ida segundu iha 8 marsu,” médiku ne’e relata.

Ekipa konjunta saúde hala’o ona atividade buka-tuir kontaktu-besik hosi kazu pozitivu na’in-rua ne’e.

Apelu

SS-CIGC hakarak halo apelu espesiál ida ba profisionál saúde-sira, ho mós kolega-sira hosi profisaun seluk ne’ebé hamriik iha liña oin kedas, hosi kombate hasoru surtu COVID-19, ne’ebé naklekar daudaun iha Timor-Leste-nia laran.

“Ita-nia dezafiu importante maka buka identifika kontaktu-besik hosi kazu pozitivuosira hotu-hotu, foti amostra, impoin kuarentena ba sira ne’ebé iha risku, izola sira ne’ebé pozitivu, maski asimtomátiku, atu nune’e labele hada’et tutan ba ema seluk,” nia dehan.

Parte SS-CIGC  mós konsiente katak, ema balun seidauk bele, ka seidauk hakarak kompriende saida mak liña frente sira halo, sei insulta, sei habelar lia falsu, sei tuda ho fatuk nafatin. Ingratidaun ka falta gratidaun, halo fuan moras, maibé fuan moras labele sai obstákulu atu kumpri misaun importante hodi proteje komunidade, Povu, liu-liu sira ne’ebé vulnerável liu.

Nia mós apela ba populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek. Maski kazu konfirmadu aumenta ba beibeik, no naklekar mós ona ba Munisipiu Baucau no  Viqueque, husu atu tu’ur nafatin hakmatek, matan_moris neon na’in, lalika sé tilun ba lia-anin ka rumor.

Importante atu pratíka nafatin medida uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta-malu, lapresiza ka’er-liman, bensa-liman, rei-malu ka haku’ak-malu, evita halibur-malu barak, hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here