Produtu Cesta Bázika iha bote Imajen TATOLI/Antónia Gusmão

DILI, 15 marsu 2021 (TATOLI)–Governu liuhosi Ministériu Koodenadór Asuntu Ekonómia (MKAE) deside hapara provizóriu distribuisaun Cesta Bázika iha munisípiu Baucau no Viqueque.

“Ita deside hapara provizóriu Cesta Bázika iha munisípiu rua ne’e tanba impoin serka sanitária durante loron 14,” Ministru Koordenadór Asuntu Ekonómiku, Joaquim Amaral, informa hafoin reuniaun Konsellu Ministru (KM) iha salaun Ministériu Finansa, Aitarak-Laran, segunda ne’e.

Notísia relevante: Governu impoin serka sanitária iha Baucau no Viqueque to’o 29 marsu

Desizaun ne’e ho baze Projetu Rezolusaun Governu, ne’ebé aprova iha reuniaun KM ba impozisaun serka sanitária no konfinamentu obrigatóriu iha munisípiu Baucau no Viqueque hahú loron 16 to’o 29 marsu.

Durante períodu ne’e, bandu sirkulasaun ema nian entre munisípiu tolu ba munisípiu seluk, exetu iha kazu ho fundamentu forte ka razaun siguransa públika, saúde públika, asisténsia umanitária, manutensaun sistema abastesimentu públiku ba interese públiku.

Regra aplikasaun serka sanitária no konfinamentu nian iha munisípiu Baucau no Viqueque hanesan ho munisipiu Dili, ho ajustamentu no adaptasaun ba realidade munisipiu rua.

Programa iha ámbitu rekuperasaun ekonómika rai-laran ne’e, ho objetivu hodi kria kondisaun liuhosi  aumenta rendimentu agrikultór inklui apoia família ho nesesidade bázika hodi kombate hamlaha liuhosi kontribuisaun alimentar ne’ebé iha nutrisaun ba uma kain hotu iha Timór laran tomak.

 Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here