Membru PNTL hala'o kontrolu ba komunidade iha Díli atu mantein uza máskara, (12/03/21). Imajen Tatoli/António Gonçalves.

DILI, 13 marsu 2021 (TATOLI)—Sala Situasaun Centro Integrado Gestão de Crises (SS-CIGC), rejista tan kazu pozitivu foun-ualu, kompostu hosi neen iha Munisípiu Dili, rua iha Munisípiu Baucau, no númeru ativu ne’ebé baixa iha sala izolamentu 82.

“Horisehik mai ohin, hosi amostra ne’ebé rekolla iha Munisípiu Dili, durante atividade buka-tuir kontaktu-besik, iha tan kazu pozitivu na’in-neen iha Dili no na’in-rua hosi Munisípiu Baucau,” Koordenadór Forsa-Tarefa ba Prevensaun no Mitigasaun, Rui  Maria de Araújo informa liu hosi konferénsia imprensa iha Centro Convenções Dili, sábadu ne’e.

Notísia Relevante:COVID-19: pozitivu foun 11 iha Dili, ativu 76

Númeru pozitivu ho detallu  hanesan tuir mai, kazu pozitivu rua hosi aldeia Loron matan, Suku Madohi. Pozitivu hirak ne’e kontaktu-besik ho sira-nia família uma-laran.

Kazu pozitivu rua, profisionál saúde ne’ebé halo formasaun Emergency Obsterics and Neonatal Care (EMONC) iha HNGV. Sira na’in-rua kontaktu-besik ho profisionál saúde ida ne’ebé mós halo formasaun hanesan iha HNGV, ne’ebé anunsía pozitivu iha 10  Marsu.

“Hamutuk hotu sira na’in-hitu ne’ebé tuir formasaun EMONC no detetadu nu’udár kazu pozitivu,” nia informa.

Kazu pozitivu ida, rezultadu hosi rastreiu aleatóriu iha aldeia Terra Santa, Suku Madohi.  Kazu ida, idade tinan ida fulan ualu deteta iha fatin izolamentu. Nia bá izolamentu hamutuk ho nia-inan, ne’ebé atravesa irregularmente fronteira.

“Ho nune’e, kazu detetadu ka pozitivu iha Dili hosi 7 Marsu to’o ohin, hamutuk hotu 53,” doutór Rui Maria de Araújo subliña.

Ho baze ba informasaun foun ne’ebé ekipa konjunta saúde nian rekolla, foku agrupamentu cluster kazu pozitivu iha Dili, hetan revizaun hanesan tuir mai, BTN II-Terra Santa, Suku Madohi kazu hitu, Aldeia Gólgota Madohi  kazu  tolu, Aldeia Loron matan, Suco Madohi  kazu haat, Aldeia 4 Setembru, Comoro kazu rua, Aldeia Fomento I, Suku Comoro  kazu  tolu, Aldeia 05 Suku Fatuhada kazu  tolu, Aldeia 20 Setembru, Suku Bebonuk kazu rua, Delta  kazu ida, Aldeia Frekat Suku Bairru Pite  kazu  tolu,  Ministériu Finansa (MF) kazu  tolu, Sekretária Estadu Formasaun Profisionál no Empregu  (SEFOPE)  kazu sia, Ministériu Transporte no Komunikasaun kazu rua, EMONC (Emergency Obstetrics and Neonatal Care) training/Hospital Nacional Guido Valadares  kazu hitu, formoza kazu rua.

“Kazu detetadu 53 ne’e fahe ba cluster 14, namkari iha instituisaun tolu, eventu ida no Suku neen iha Postu Administrativu Dom Aleixo, no mós Postu Administrativu Vera Cruz,” nia salienta.

SS-CIGC relata mós progresu hosi atividade prevensaun no mitigasaun surtu COVID-19 iha munisípiu Covalima hanesan relata ona horisehik, atividade iha Suai vila, no postu administrativu sira, eseptu Fatumea la’o normal, fali ona.

Kazu pozitivu rua foun, ne’ebé anunsía iha 11 Marsu, halo deit izolamentu iha Fatumea. Sentru Saúde-sira iha Munisípiu Covalima, ho mós Hospitál Referénsia Suai, nafatin hala’o atividade vijilánsia sentinela.

Enkuantu, ba munisípiu sira-seluk inklui Rejiaun Administrativa Espesiál Oecusse Ambeno (RAEOA), ekipa konjunta saúde iha Munisipiu Baucau, hosi 10 no 11 marsu foti amostra 132, iha atividade buka-tuir kontaktu-besik hosi kazu pozitivu sira iha Dili, atividade vijilánsia sentinela, no mós atividade rastreiu aleatóriu ba ema ne’ebé bá hosi Dili iha 8 marsu, molok hahú serka sanitaria iha Dili.

Hosi amostra hirak ne’e, 92 negativu, 37 mak sei hein rezultadu no na’in-rua mak pozitivu. Sira na’in rua ne’ebé pozitivu,  ida estudante medisina ne’ebé halo estájiu iha Hospital Referénsia Eduardo Ximenes Baucau.

Kazu detetadu ida ne’e, hela iha Dili, Aldeia Monumentu Kalma, Suku Lahane Oriental, Postu Administrativu Nain Feto. Nia pozitivu tamba kontaktu-besik ho profisionál saúde ne’ebé anunsia iha 10 marsu no  estudante  ida seluk ema Baucau, estuda iha Instituto Ciencias Saúde. Iha Baucau hela iha Aldeia Caibilale, Suku Caibada, Baucau Vila. Iha Dili, hela iha Aldeia Fomento 3, Suku Comoro.

Kazu pozitivu ida ne’e, sai hosi Dili ba Baucau, maibé iha Dili nia hela hamutuk ho ema ne’ebé iha kontaktu-besik ho kazu pozitivu ne’ebé antes ne’e relata tiha ona.

Ekipa konjunta saúde Munisípiu Baucau, ohin rekolla ona  amostra 65 hosi kontaktu-besik ba kazu pozitivu ne’e.

“Dadus jerál ohin nian, kazu foun ualu,  kazu  rekoperadu rua, kazu ativu ne’ebé baixa iha  izolamentu 82,” nia subliña.

SS-CIGC aproveita fó hanoin ba populasaun katak, rezolusaun Governu Nº12/2021, 8 marsu kona-ba serka sanitária iha Munisipiu Dili, proibe ema atu tama sai hosi Dili. Hotu-hotu tu’ur hakmatek iha fatin.

Autoridade ne’ebé bele autoriza ema nia movimentu maka Diretor Centro Integrado Gestão de Crises, Brigadeiru  Jeneral Aluk,  no resoluzaun   Governu ne’e mós obriga sidadaun hotu iha sidade Dili, atu halo konfinamentu domisiliáriu jerál.

“Ida ne’e signifika, hela iha uma, labele sai. Sai de’it bainhira presiza tanba moras, hola hahán, ka sira ne’ebé halo serbisu esensiál,” nia subliña.

SS-CIGC Informa mós ba públiku katak hahú 13 Marsu ne’e  hamosu ona korredór abastesimentu ba sasán atu sai hosi Dili, no tama mai Dili. Pedidu autorizasaun hotu tenki diriji ba Brigadeiru Jenerál João Miranda ‘Aluk’.

Apelu

Apela ba populasaun Timor-Leste tomak, atu nafatin hakmatek. Maski kazu konfirmadu aumenta ba beibeik, no naklekar mós ona ba munisípiu Baucau, husu atu tu’ur nafatin hakmatek, atu nafatin matan-moris neon na’in.

Fó hanoin atu lalika sé tilun ba lia-anin ka rumór, pratíka nafatin medida uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta-malu, lapresiza ka’er-liman, bensa-liman, rei-malu ka haku’ak-malu, evita halibur-malu barak, hamri’ik ka tuur do’ok hosi ema seluk, mínimu metru ida ho balun.

Jornlista: Nelson de Sousa

Editór: Cancio Ximenes 

HAKEREK NO HATÁN

Please enter your comment!
Please enter your name here