Koordenadór Forsa-Tarefa ba Prevensaun no Mitigasaun surtu COVID-19 iha Timor-Leste, hosi Sala Situasaun SIJK, Rui Maria de Araújo. Imajen Tatoli/Egas Cristóvão.

DILI, 12 marsu 2021 (TATOLI)—Ohin, Sala Situação Centro Integrado Gestão de Crises (SS-CIGC) rejista tan kazu pozitivu foun hamutuk 11 iha Dili, no númeru ativu ne’ebé iha sala izolamentu aumenta ba 76.

“Hosi horisehik mai ohin iha Dili, amostra ne’ebé rekolla iha atividade buka-tuir kontaktu besik, iha tan kazu positivu na’in 11,” Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo,  fó-sai númeru pozitivu 11 ne’e liu hosi konferénsia imprensa iha Centro Convenções Dili (CCD), sesta ne’e.

Notísia Relevante:SS-CIGC deteta-tan pozitivu 12 iha Dili, rua iha Covalima

Númeru pozitivu 11 ne’ebé iha ho detalla hanesan tuir-mai, kazu pozitivu 1 hosi aldeia 4 Setembru, Suku Comoro, Postu Administrativu Dom Aleixo, Munisipiu Dili. Pozitivu ida ne’e kontaktu besik ho kazu iha cluster Ministériu Transporte no Komunikasaun (MTK). Kazu pozitivu 4 hosi aldeia Frekat, Suku Bairru Pité, Postu Administrativu Dom Aleixo, Munisípiu Dili. Pozitivu haat ne’e kontaktu-besik ho kazu ida iha cluster Ministériu Finansa.

Kazu pozitivu na’in 4, profisionál saúde ne’ebé halo formasaun Emergency Obsterics and Neonatal Care (EMONC) iha HNGV. Sira kontaktu-besik ho profisionál saúde ida ne’ebé mós halo formasaun hanesan iha HNGV, ne’ebé anunsia pozitivu iha 10 marsu. Hamutuk hotu sira na’in 5 ne’ebé tuir formasaun EMONC no detetadu nu’udár kazu pozitivu, la’ós serbisu iha HNGV, maibé nu’udár kontaktu-besik hosi profisionál saúde ida ne’ebé pozitivu iha 9 marsu.

Kazu pozitivu 2, rezultadu hosi vijilánsia sentinela iha Sentru Saúde Formoza, ida hela iha aldeia Materestu, Vila Verde, ida iha Fatuhada.

“Ho nune’e, kazu detetadu ka pozitivu iha Dili hosi 7 marsu to’o ohin, hamutuk  47,” doutór Rui Maria de Araújo hateten.

Ho baze ba informasaun foun ne’ebé ekipa konjunta saúde-nian rekolla, foku ka agrupamentu ka cluster kazu pozitivu iha Dili, hetan revizaun hanesan tuir mai, BTN II-Terra Santa, Suku Madohi kazu 6, aldeia Gólgota, Madohi kazu 3, aldeia Lurumata, Suku Madohi kazu 2, aldeia 4 Setembru Comoro kazu 2, aldeia Fomento I, Suku Comoro kazu 3, aldeia 05, Suku Fatuhada kazu 3, Bebonuk kazu 2, Delta kazu 1, aldeia Frekat, Suku Bairru Pite 3 (cluster foun), Ministériu Finansa (MF) kazu 3, Sekretária Estadu Formasaun Profisionál no Empregu (SEFOPE) kazu 9, Ministériu Transporte no Komunikasaun kazu 2, EMONC (Emergency Obstetrics and Neonatal Care) training/Hospital Nacional Guido Valadares kazu 5, Formoza kazu 2.

“Kazu 47 ne’e fahe ba cluster 14, namkari iha instituisaun 3, eventu 1 no Suku 6 iha Postu Administrativu Dom Aleixo, no mós Postu Administrativu Vera Cruz,” nia sublña.

Parte SS- CIGC  aproveita esplika ba populasaun katak, dadus ne’ebé iha relasiona ho HNGV, hatudu katak seidauk iha profisionál saúde seluk tan, ne’ebé serbisu iha HNGV mak hetan kontájiu hosi kazu pozitivu ida ne’ebé anunsía iha 9 marsu.

“Sira hotu ne’ebé iha kontaktu-besik ho kazu ida ne’e, halo hotu teste ona, no iha hotu ona kuarentena. Kontájiu ne’ebé akontese iha unidade pediatria no maternidade ninia-hun mai hosi liur, no seidauk hatudu katak naklekar ba unidade seluk iha Ospitál-nia laran,” Rui Araújo esplika.

Maski nune’e, nia dehan, dirijente sira iha HNGV, hahú redúz ona prestrasaun asisténsia médika ne’ebé la’ós espesializada iha área maternidade no pediatria, durante loron tolu-nia laran, tuir protokolu kontinjénsia Ospitál-nian rasik.

Serbisu-sira seluk, hanesan emerjénsia, konsulta ambulatória, no servisu iha área espesializada seluk, nafatin funsiona hanesan baibain.

Iha sorin seluk, SS- CIGC  mós atualiza progresu hosi atividade prevensaun no mitigasaun surtu COVID-19 iha Munisípiu Covalima katak, atividade iha Suai vila, no postu administrativu-sira, eseptu Fatumea la’o normál, hahú kedas horisehik.

“Ekipa konjunta saúde horisehik foti kedan amostra hosi kontaktu-besik kazu pozitivu 2 ne’ebé anunsía horisehik. Rezultadu hatudu negativu, maibé sei presiza negativu dala 1 tan, atu bele deklara livre hosi kontájiu,” nia esplika.

Kona-bá Sentru Saúde-sira iha Munisipiu Covalima, ho mós Hospitál Referénsia Suai, nia dehan, nafatin hala’o atividade vijilánsia sentinela.

Alende ne’e, progresu atividade prevensaun no mitigasaun surtu COVID-19 iha Munisípiu sira seluk inklui Rejiaun Administrativa Espesiál Oe-cusse Ambeno (RAEOA), nia esplika, ekipa konjunta saúde iha Munisipiu Baucau buka-tuir kontaktu-besik hosi kazu pozitivu iha Dili, hasai amostra lori mai análiza iha laboratóriu. Kontaktu-besik ida tenki lori mai kuarentena iha Dili 3.

Dadus jerál loron ohin nian, kazu foun 11, kazu rekoperadu 0 no kazu ativu 76.

Apelu

SS-CIGC husu ba populasaun iha Dili laran tomak, atu nafatin kalma, lalika pániku, halo tuir regra konfinamentu domisiliáriu jerál, ba populasaun rezidente iha Munisípiu Dili, fó tempu ba ekipa saúde buka tuir kontaktu-besik sira hotu.

Maski Governu deside ona atu hakotu serka sanitária, hakarak apela ba populasaun iha Covalima, atu nafatin disiplina iha medida protesaun no ijiéne pesoál no evita hakat ba-mai iha fronteira.

Apela mós ba populasaun Timor-Leste tomak, liu-liu iha munisípiu sanulu seluk ho RAEOA tuur hakmatek iha fatin, atu nafatin matan-moris ne’on na’in, pratika nafatin medida sira ne’ebé iha hanesan uza maskara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak, hamri’ik ka tuur dook hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here