DILI, 12 marsu 2021 (TATOLI)-Atu evita propagasaun COVID-19 sa’e maka’as iha komunidade nia-leet, Komandu Polísia Nasionál Timor-Leste (PNTL) Munisípiu Dili, sesta ne’e, halo operasaun tama-sai bairru sira iha Dili laran hodi alerta ba abitante sira kumpre regra saúde públiku no serka sanitaria.
Notísia Relevante : Reuniaun KM: deside serka sanitária iha Dili durante loron hitu
Prosedimentu simples saúde públiku nian iha luta kontra propagasaun COVID-19 no regra sanitaria, maka hakmatek iha uma, fase-liman beibeik ho sabaun, uza máskara bainhira sai ba li’ur, evita halibur malu, no kumpre distánsia fíziku.
Area ne’ebé komandu PNTL Munisípiu Dili halo patrullamentu hodi tama-sai bairru sira mak hanesan iha parte Nain Feto, Cristo Rei no mós merkadu Manleuana ho Taibessi.
Segundu Komandante PNTL Munisípiu Dili, Superintendente Euclides Belo, hateten PNTL kontinua disemina regra prevensaun COVID-19 tuir Ministériu Saúde (MS) ho Organizasaun Mundiál Saúde (OMS) ba komunidade sira atu kumpre no hakmatek iha uma.
Euclides Belo, ba Agência Tatoli hateten komandu PNTL Munisípiu Dili servisu konjunta ho Autoridade Munisípiu Dili ho Jestaun Merkadu Dili kontinua reforsa ninia atividade hodi disemina prosedimentu sira kona-ba prevensaun COVID-19.
Liuhosi atividade ne’e, PNTL Dili mós fó hatene ba loja sira ne’ebé la’ós fa’an nesesidade báziku taka ka suspende sira-nia atividade durante tempu serka sanitaria iha kapitál Dili.
Ba restaurante sira, PNTL husu atu evita halibur ema barak no mantein distánsia fízika. Tanba ne’e, bainhira ema han hotu ona tenke fila tuituir. La bele tuur halibur malu iha restaurante nia laran ho oras barak.
Ba komunidade sira, PNTL Dili husu atu sai ho transporte; karreta ho motór no la’o-ain, tenke uza máskara n sai karik ba nesesidade ne’ebé urjénsia. Ezemplu, ba sosa foos, sosa pulsa eletrisidade, sosa ai-moruk ka sosa nesesidade báziku.
Ekipa Polisiamentu Komunitária Dili (KPK) ho Polísia Task Force Munisípiu Dili ho karreta kontinua tama sai bairru hodi aviza liu hosi mikrofone, nune’e komunidade bele kumpre nafatin serka sanitaria.
Jornalista : Nelson de Sousa
Editór : Francisco Simões
