Primeiru-Ministru, Taur Matan Ruak, prezide reuniaun Konsellu Ministru estaordinária iha salaun Ministériu Finansa, Aitarak-laran, segunda (08/03). Imajen TATOLI/Egas Cristóvão

DILI, 08 marsu 2021 (TATOLI)—Reuniaun Konsellu Ministru (KM) estraordinária deside aplika serka sanitária iha munisípiu Dili durante loron-hitu, hahú hosi oras 00:00 no ramata iha loron 15 marsu tinan ne’e.

“Konsellu Ministru deside katak hahú aban (tersa), sei tama iha vigór inposizasaun serka sanitária no konfinamentu ba iha munisípiu Dili. Ho ida ne’e katak hahú aban to’o loron 15 marsu, hafoin loron hitu maka sei haree fifali iha nesesidade atu kontinua ou lae?,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Ministériu Finansa (MF), Aitarak-laran, segunda ne’e.

Notísia relevante: COVID-19: CIGC blokeia temporária aldeia Terra Santa tanba deteta pozitivu-rua

Durante loron hitu  nia laran sei bandu atu labele sai hosi Dili, ba sira ne’ebé maka atu sai hosi Dili ba munisípiu seluk karik só sira ne’ebé maka lori ai-moruk emerjénsia ou fó seguransa sira, maibé kuandu iha autorizasaun hosi Ministériu Interiór no Sala Situasaun Sentru Integradu Jesraun Krize (CIGC, sigla portugés).

Enkuantu, sira seluk ne’ebé mak daudaun iha munisípiu no rezidente iha Dili bele filafali mai Dili, maibé tenke relata ba Sala Situasaun.

“Iha ámbitu ne’e Konsellu Ministru deside atu impoin konfinamentu obrigatóriu iha ita-nia munisípiu, la autoriza sidadaun sira atu halo atividade kulturál, relijioza durante períodu loron hitu ne’e nia laran, no mós la autoriza atu sai hosi hela fatin no ba fatin públiku sira, ou desloka ba fatin sira sein nesesidade maibé kuandu nesesidade sira hanesan ba hola ai-han, sosa pulsa eletrisidade ou sosa medikamentu sira, kuandu la’o maka pesoál seguransa sira halo auto stop karik tenke fó justifikasaun,” Portavós Governu esplika.

Atividade seluk hanesan merkadu no atividade hanesan ensinu nian sei hatúr tuir despaisu sira ne’ebé maka ministériu relevante sira sei fó sai tanba medida implementasaun Estadu Emerjénsia (EE) ba-11 fó dalan ba ida ne’e.

“Ne’ebé ita iha presupostu ida atu dehan katak atividade sira hotu sei paradu iha loron hitu nia laran, ba efeitu prosesuál maka atividade sira hanesan ensinu eskolár sei hatúr tuir despaisu ministeriál maibé ho konkluzaun ida katak atividade sira ne’e hotu ein pedidu hotu tanba inpoin ona serka sanitária no impoin konfinamentu,”nia hatutan.

Medida hirak ne’e hatúr tuir rezolusaun KM, tanba aleinde medida jerál ba territóriu tomak maibé Governu deside halo medida espesiál sira ba zona espesiál sira liuhosi rezolusaun KM, katak serka sanitária ida-ne’e, konfinamentu obrigatóriu ne’e vale de’it iha munisípiu Dili inklui Ataúro no Metinaru, munisípiu sira seluk bele halo atividade lorloron nian maibé tenke implementa medida sira ne’ebé EE ejize.

Governante ne’e subliña, durante Serka sanitária no konfinamentu obrigatóriu ne’e, gabinete ministeriál sira sei funsiona nafatin.

“Maibé ministru sira sei halo despaisu hodi define katak sira ne’ebé esensiál de’it mak ba serbisu, no ba hirak ne’ebé despensadu bele halo serbisu hosi uma katak halo esforsu hotu atu lebele sai hosi uma, la’ós hela iha uma hodi pasiár fali ba fatin-fatin ou ba fali partisipa iha atividade sira seluk,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here